Rɔmɔ 5:1-21
5 Ɔnkɔnɛ, etena kɛnɛ kambotɔsama oko anto w’ɛlɔlɔ l’ɔtɛ wa mbetawɔ,+ toyale la wɔladi* lam’asaso la Nzambi lo tshimbo ya Nkumɛso Yeso Kristo,+
2 ɔnɛ lele lo tshimbo yande, diɛsɛ la mbetawɔ mbayaso la diaaso dia vɔ tosalɛ ɔlɔlɔ ɔnɛ waheyama mbɛdika wele la so kakianɛ;+ ndo tɔngɛnɛngɛnɛ* l’ɔtɛ w’elongamelo ka lotombo la Nzambi.
3 Aha laasɔ ato, koko tɔngɛnɛngɛnɛ* etena keso lo asui,+ nɛ dia sho mbeyaka dia asui mbishaka ekikelo;+
4 ekikelo lo wedi atɔ konyaka lo mbetawɔma;+ mbetawɔma lo wedi atɔ konyaka lo elongamelo,+
5 ndo elongamelo hɛndja ɛkɔndjɔ,+ nɛ dia ngandji ka Nzambi kambohongɔ lo etema aso l’ekimanyielo ka nyuma k’ekila kakatalongola.+
6 Nɛ dia lo mɛtɛ, lam’akiso wɔdu,+ Kristo akavu dikambo di’anto wa kɔlɔ lo etena kakashikikɛma.
7 Ekɔ wolo di’onto mvɔ dikambo di’onto lele la losembwe; kaanga mbele ondo lo dikambo di’onto ɔlɔlɔ, onto koka mbetawɔ mvɔ.
8 Koko Nzambi akatɛnya ngandji kande hita lo yoho nyɛ: Kaanga mbakiso atshi wa pɛkato, Kristo akavu dikambo diaso.+
9 Kɛnɛ koleki ele, lam’ele wonya ɔnɛ tambɔsama oko anto w’ɛlɔlɔ oma lo dikila+ diande, tayoshimbamɛ oma lo nkɛlɛ+ kande lo tshimbo yande.
10 Nɛ dia naka etena kakiso atunyi, sho takayokana la Nzambi oma lo nyɔi k’Ɔnande,+ kete hoke nshi nyɛ yambotokana nto la nde! Shi tayoshimbamɛ lo tshimbo ya lɔsɛnɔ lande?
11 Aha laasɔ ato, koko ndo sho ngɛnangɛnaka le Nzambi lo tshimbo ya Nkumɛso Yeso Kristo, ɔnɛ lele oma lo tshimbo yande mbambotokana+ nto wonya ɔnɛ la Nzambi.
12 Diakɔ diele, oko wakɔtɔ pɛkato l’andja oma le onto 1 ndo nyɔi oma lo pɛkato,+ ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.+ . . .
13 Nɛ dia pɛkato kaki lo andja la ntondo k’Ɛlɛmbɛ, koko onto honge la onongo wa pɛkato etena kele ɛlɛmbɛ bu.+
14 Koko, nyɔi kakolɛ oko nkumekanga ntatɛ oma le Adama polo le Mɔsɛ, kaanga le wanɛ waki kosala pɛkato woho wakasale Adama kɔlɔ, ɔnɛ lafɔna la ɔnɛ lakahombe ndja.+
15 Koko, woshasha ntshikitana la pɛkato. Nɛ dia naka anto efula wakavu l’ɔtɛ wa pɛkato k’onto 1, kete hoke ɔlɔlɔ waheyama mbɛdika wa Nzambi ndo losha la woshasha ande lo tshimbo y’ɔlɔlɔ waheyama mbɛdika w’oma le onto 1,+ Yeso Kristo! Shi vɔ wayoleka monga efula* le anto efula?+
16 Ndo nto, etombelo waya oma lo losha la woshasha la wɛnɛ waya oma le onto 1 lakasale pɛkato+ ntshikitana. Nɛ dia elombwelo k’oma lo pɛkato 1 kakakonya lo dianyelo,+ koko woshasha wakaye l’ɔkɔngɔ wa pɛkato efula, aki dia anto mbɔsama oko anto w’ɛlɔlɔ.+
17 Nɛ dia naka oma lo pɛkato k’onto 1 nyɔi kakolɛ anto oko nkumekanga lo tshimbo y’onto ɔsɔ,+ kete hoke wanɛ wasalɛwɔ efula k’ɔlɔlɔ waheyama mbɛdika ndo walongola losha la woshasha wa losembwe!+ Shi vɔ wayoleka mbolɛ oko nkumi ya dikanga+ lo lɔsɛnɔ oma le onto 1, Yeso Kristo?+
18 Ɔnkɔnɛ, oko wele oma lo pɛkato 1 weho tshɛ w’anto wakaanyema,+ woho akɔ waamɛ mbele oma lo tshelo 1 ya losembwe, weho tshɛ w’anto+ wekɔ lo mbɔsama oko anto w’ɛlɔlɔ dia nkondja lɔsɛnɔ.+
19 Nɛ dia oko wele oma lo ohendodi w’onto 1 anto efula wakakome atshi wa pɛkato,+ woho akɔ waamɛ mbele oma lo okitanyiya w’onto 1 anto efula wayokoma anto w’ɛlɔlɔ.+
20 Ɛlɛmbɛ wakayala dia pɛkato mfula.+ Koko lɛnɛ akafule pɛkato, ɔlɔlɔ waheyama mbɛdika wakaleke mfula.
21 La oyango akɔna? Dia oko wele pɛkato la nyɔi+ wakolɛ oko nkumekanga, mbele ɔlɔlɔ waheyama mbɛdika wekɔ lo mbolɛ oko nkumekanga oma lo losembwe lakonya lo lɔsɛnɔ la pondjo oma le Yeso Kristo Nkumɛso.+
Nɔtɛ ka l'ɛse ka dikatshi
^ Kana ondo “tekɔ la wɔladi.”
^ Kana ondo “tekɔ lo ngɛnangɛna.”
^ Kana ondo “tekɔ lo ngɛnangɛna.”
^ Kana “wayofukɔfukɔ.”
