Rɔmɔ 6:1-23
6 Ko ayotota? Onde sho pombaka ntetemala lo pɛkato dia ɔlɔlɔ waheyama mbɛdika mfula?
2 Ndooko! Lam’ele sho takavu lo kɛnɛ kendana la pɛkato,+ woho akɔna watototetemala nsɛna lɔkɔ nto?+
3 Kana onde nyu hanyeye dia sho wanɛ tshɛ wakabatizama lo Kristo Yeso+ takabatizama lo nyɔi kande?+
4 Ɔnkɔnɛ, sho takakundɛma kaamɛ la nde lo woho wakatabatizama lo nyɔi kande,+ kele oko wakolɔ Kristo oma lo nyɔi lo lotombo la She, sho lawɔ tɔkɛndɛkɛndɛ lo yoho ya lɔsɛnɔ y’oyoyo.+
5 Naka tambonga kaamɛ la nde lo ɔfɔnɛlɔ wa nyɔi kande,+ kete lo weho akɔ tshɛ tayonga kaamɛ la nde lo ɔfɔnɛlɔ wa eolwelo+ kande.
6 Nɛ dia sho mbeyaka dia lonto laso l’edjedja lakakɔkɔma nsɛti kaamɛ la nde l’otamba+ dia demba diaso dia pɛkato monga wɔdu,+ diaha sho ntetemala monga mfumbe ya pɛkato.+
7 Nɛ dia onto lambovɔ ambotshungɔ* oma lo pɛkato yande.
8 Ndo nto, naka tambovɔ kaamɛ la Kristo, sho mbetawɔka nto dia tayɔsɛna kaamɛ la nde.
9 Dikambo sho mbeyaka dia lam’ele Kristo akolɔ oma lo nyɔi,+ nde hayovɔ nto;+ ndo nyɔi hayowahemɛ nto.
10 Nɛ dia nyɔi kakandavu, nde akavu lo kɛnɛ kendana la pɛkato* mbala ɔtɔi lo pondjo,+ koko lɔsɛnɔ lasɛnande, nde ekɔ lo lisɛna lo kɛnɛ kendana la Nzambi.
11 Woho akɔ waamɛ mbele, nyu lawɔ nyoyaɔshi oko nyambovɔ lo kɛnɛ kendana la pɛkato, koko nyekɔ lo nsɛna lo kɛnɛ kendana la Nzambi oma le Kristo Yeso.+
12 Ɔnkɔnɛ, tanyetawɔke dia pɛkato ntetemala mbahemɛ alemba+ anyu wokovɔ oko nkumekanga dia nyu nkitanyiya nsaki yawɔ.
13 Ndo tanyotetemalake nkimɔ alemba* anyu lo pɛkato oko dihomɔ dia ta dia kɔlɔ, koko nyoyakimɔ le Nzambi oko anto waya la lɔsɛnɔ oma lo nyɔi ndo nyokimɔ alemba* anyu le Nzambi oko dihomɔ dia ta di’ɔlɔlɔ.+
14 Nɛ dia pɛkato hahombe nyahemɛ lam’ele nyaya bu l’ɛse k’ɛlɛmbɛ,+ koko l’ɛse k’ɔlɔlɔ waheyama mbɛdika.+
15 Ko ayomota nto? Onde sho pombaka nsala pɛkato dikambo taya bu l’ɛse k’ɛlɛmbɛ, koko l’ɛse k’ɔlɔlɔ waheyama mbɛdika?+ Ndooko!
16 Onde nyu hanyeye dia naka nyu ndjakimɔ le onto ɔmɔtshi oko ɛhɔmbɔ wele l’okitanyiya, kete nyekɔ ɛhɔmbɔ wa ɔnɛ lakitanyiyanyu,+ oyadi pɛkato+ kakonya lo nyɔi+ kana okitanyiya wakonya lo losembwe?
17 Koko Nzambi losaka nɛ dia kaanga mbakinyu ɛhɔmbɔ wa pɛkato, nyu nyaya la okitanyiya w’oma k’ɛse otema lo woho wa wetshelo wakanyalongola.
18 Eelo, lam’ele nyakatshungɔ oma lo pɛkato,+ nyaya ɛhɔmbɔ wa kɛnɛ kele ɔlɔlɔ.+
19 Dimi lekɔ lo ntɛkɛta woho watɛkɛta anto l’ɔtɛ wa wɔdu w’alemba anyu; nɛ dia oko wakanyakimɔ tenyi dianyu dia demba oko ɛhɔmbɔ l’akambo wa mindo ndo wa kɔlɔ wakonya lo kɔlɔ, ɔnkɔnɛ, kakianɛ nyokimɔ tenyi dianyu dia demba oko ɛhɔmbɔ w’akambo w’ɛlɔlɔ wakonya lo eongelo k’ekila.+
20 Nɛ dia lam’akinyu ɛhɔmbɔ wa pɛkato, nyu nyaki la lotshungɔ lo kɛnɛ kele ɔlɔlɔ.
21 Ko elowa akɔna wakanyatondjaka etena kɛsɔ? Toko akambo wonyoka nsɔnyi kakianɛ. Nɛ dia ekomelo k’akambo asɔ ele nyɔi.+
22 Koko lam’ele nyakatshungɔ oma lo pɛkato ndo nyaya ɛhɔmbɔ wa Nzambi, nyu nyekɔ lo ntondja elowa lo yoho y’ekila,+ ndo ekomelo ele lɔsɛnɔ la pondjo.+
23 Nɛ dia difuto dia pɛkato ele nyɔi,+ koko woshasha washa Nzambi ele lɔsɛnɔ la pondjo+ oma le Kristo Yeso Nkumɛso.+
Nɔtɛ ka l'ɛse ka dikatshi
^ Kana “amboyindjama; ambodimanyiyama.”
^ Mbuta ate dia minya pɛkato.
^ Tshɛk., “tenyi dia demba.”
^ Tshɛk., “tenyi dia demba.”
