Osambo 19:1-14
Le ɔnɔmbɔdi. Ngɛngu ka Davidɛ.
19 Olongo wekɔ lo nsanya lotombo la Nzambi;+Loowa* mbewoyaka olimu w’anya ande.+
2 Lushi la lushi ɛtɛkɛta awɔ pongɔka,Ndo otsho la otsho vɔ kɛnɛmɔlaka ewo.
3 Ndooko dui ndo ndooko tshɛkɛta;Dui diawɔ hadiokɛma.
4 Koko londjo* ladjawɔ lambokɛma lo nkɛtɛ k’otondo,Ndo losango lawɔ polo lo tokoma ta nkɛtɛ k’otondo.*+
L’olongo kakandakɛ wonya luudu la dipɛma;
5 Vɔ wekɔ oko otshuki a wadi kayatombe oma lo luudu la ndala laki atshukanyi;Vɔ ngɛnangɛnaka oko pami ka wolo katalawɔ lowango lande.
6 Vɔ tombaka oma lo koma mɔtshi y’olongo,Ko vɔ tshimbaka otsha lo koma+ kina;Ndo ndooko ɛngɔ kashɛma oma lo laladi lawɔ.
7 Ɛlɛmbɛ wa Jehowa wekɔ kokele,+ vɔ kaloyaka wolo.*+
Diohwelo dia Jehowa sunganaka mbɛkɛ otema,+ diɔ mbishaka ɔnɛ lahatahokɔ akambo lomba.+
8 Wadjango wa Jehowa wekɔ esembɔki, vɔ ngɛnyangɛnyaka otema;+Ɛlɛmbɛ wa Jehowa wekɔ pudipudi, vɔ mbetɛka washo ngaingai.+
9 Wɔma wa Jehowa+ wekɔ pudipudi, vɔ tshikalaka pondjo.
Dombwelo dia Jehowa diekɔ mɛtɛ, diɔ tshɛ diekɔ la losembwe.+
10 Diɔ ndeka paonyi nɛmɔ,Ndeka ndo paonyi+ ka dimɛna* nɛmɔ,Ndo diekɔ mpɛ ndeka osanga,+ ɛɛ, osanga wakɛla oma lo ehehe.
11 La diɔ katowɔhɛmɔlaka+ okambi ayɛ;Ɔnɛ ladilama nongolaka difuto+ dia woke.
12 Akɔna akoka nshihodia munga?+
Ta dia dimi bu la onongo wa pɛkato yahameye.
13 Ndo nya okambi ayɛ oma lo akambo w’otako;+Tetawɔke dia vɔ mbahemɛmi.+
Ko dimi layonga aha la ɛkɔmɔ,+Ndo aha la onongo wa pɛkato yɛnama lo sɛkɛ.*
14 Ɛtɛkɛta wa lo onyɔ ami ndo ekanelo ka yimba k’otema amiWakɔngɛnyangɛnya,+ wɛ Jehowa, Dive+ diami ndo Otshungodi+ ami.
Nɔtɛ ka l'ɛse ka dikatshi
^ Kana “Olongo wa la diko.”
^ Kana ondo “ɔkɔdi wa yɛdikɔ.”
^ Kana “nkɛtɛ y’ɛtɛtɔ.”
^ Kana “kaloyaka anima.”
^ Kana “kambɛdiama.”
^ Kana “kɔlɔ k’efula.”
