Osambo 22:1-31
Le ɔnɔmbɔdi; kongɛma lo “Lofumbɔ la Yosose.”* Ngɛngu ka Davidɛ.
22 Nzambi kami le, Nzambi kami le, lande na kamboyɔnsɛka?+
Lande na kamboyangana etale dia shimbɛmi,Etale mangana la ekoko ami wa shɔkɔ?+
2 Nzambi kami katetemalami mbelɛ la yanyi, koko wɛ hankadimola;+Ndo l’otsho dimi halɔlama.
3 Koko wɛ ekɔ ekila,+Nyingama la* lotombo la Isariyɛlɛ.
4 Le yɛ mbakayaɛkɛ+ washɛso;Vɔ wakayaɛkɛ, ko wɛ akatetemala mbatsha.+
5 Vɔ wakakolelɛ, ko vɔ wakashimbamɛ;Vɔ wakayaɛkɛ le yɛ, ko vɔ kɔmɛmba ɛkɔndjɔ.*+
6 Koko dimi lekɔ ɔsɔhɔ, aha onto,Laya ɛngɔ ka diɔnyɔ* le anto ndo ɛngɔ k’anyanya le wodja.+
7 Wanɛ tshɛ wamɛna mbɔlakami;+Vɔ shilɛkami amɛku ndo vɔ nyinginyaka ɛtɛ awɔ la diɔnyɔ+ vate:
8 “Nde akayaɛkɛ le Jehowa. Aya Nde mbotshaka!
Nde awoshimbee, nɛ dia Nde+ mbɔngɛnangɛnaka!”
9 Wɛ kakantondja oma lo dikundju,+Wɛ kakasale dia dimi ndjaoka lo ekokelo lo awɛlɛ wa mama.
10 Dimi lokoyaɛkɛka lo ekokelo kayɛ* oma ko eotwelo;Oma ko dikundju dia mama, wɛ aki Nzambi kami.
11 Tanganake etale la mi, nɛ dia paa kekɔ suke+Ndo dimi bu la okimanyedi+ okina.
12 Ɛsɔngɔ efula wa ngɔmbɛ ya waomi wambonyinga;+Ngɔmbɛ ya waomi ya wolo y’oma la Bashana yambontshimba djwɛ.+
13 Yɔ yambombasolɛ enyɔ ayɔ hwe,+Oko ntambwɛ kadikita kaatshatsha+ nyama kondjitɔ.
14 Dimi lambotshulɔ oko ashi;Weka ami tshɛ wambɔsɔngɔ.
Otema ami waya oko wata;*+Vɔ wambɔlɛlɔ l’etei kami.+
15 Wolo ami wamboma oko ɛtshi ka diwomba;+Lolemi lami lambomamatana la eshingi ami;+Wɛ ekɔ lo tampoloya lo ditshu dia nyɔi.+
16 Nɛ dia mfɔ yambonyinga;+Yɔ yamboleka nsukana la mi oko olui w’atshi wa kɔlɔ,+Oko ntambwɛ, yɔ yekɔ lo anya la ekolo ami.+
17 Dimi koka mbadia weka+ ami tshɛ.
Vɔ mendakami ndo shishimakami.
18 Vɔ wambokahana ahɔndɔ ami lam’asawɔ,Ndo vɔ wamboka owale dia mbɔsa dihɔndɔ+ diami.
19 Koko Jehowa le, totshikalake etale.+
Wɛ kele wolo ami; samanya dia ndjonkimanyiya.+
20 Onshimbee* oma lo lokuwa la ta,Lɔsɛnɔ lami la nɛmɔ* oma lo nkala* ya mfɔ;+
21 Onshimbee oma l’onyɔ wa ntambwɛ+ ndo oma lo nseke ya ndjate;Onkadimole ndo onshimbee.
22 Dimi layewoya analengo+ lokombo layɛ;Layokotombola l’atei w’etshumanelo.+
23 Nyu wanɛ woka Jehowa wɔma, nyootombole!
Nyu ana* tshɛ wa Jakɔbɔ, nyootombole!+
Nyowooke wɔma wɔsɔhanyemi la dilɛmiɛlɔ, nyu ana* tshɛ w’Isariyɛlɛ.
24 Nɛ dia nde hɔnyɔla ndo hoke asui w’osoyami+ wɔnɔnyi;Nde hashɛ elungi kande oma le nde.+
Etena kakandoolelɛ dia nyanga ekimanyielo, nde akooke.+
25 Dimi layokotombola lo etshumanelo+ ka woke;Dimi layoshidiya alɔkɔlɔkɔ ami la ntondo ka wanɛ wawooka wɔma.
26 Akanga wa memakana wayɔlɛ, ko wayolota;+Wanɛ wayanga Jehowa wayowotombola.+
Nyongake la lɔsɛnɔ* pondjo pondjo.
27 Tokoma tshɛ ta nkɛtɛ tayohɔ ndo tayokadimɔ le Jehowa.
Nkumbo tshɛ ya wedja yayokusama la ntondo kayɛ.+
28 Nɛ dia Jehowa kakanga lowandji;+Nde koolɛ wedja.
29 Akanga w’ɛngɔnyi* tshɛ wa la nkɛtɛ wayɔlɛ ndo wayokusama;Wanɛ tshɛ wataholɔ otsha lo ditshu wayoka adwe la ntondo kande;Ndooko onto l’atei awɔ lakoka nshimbɛ nsɛnɔ* yawɔ.
30 Tokanula* tawɔ wayowokambɛ;Wayotɛ lɔlɔnga layaye awui wendana la Jehowa.
31 Vɔ wayoya ko wayota awui wendana la losembwe lande.
Vɔ wayotɛ anto wahaatotɔ kɛnɛ kamondosala.
Nɔtɛ ka l'ɛse ka dikatshi
^ Ondo ohomelo kana okongelo wa mishiki.
^ Kana “Mbidjasɛ lo kiti l’atei wa (lo).”
^ Kana “kɔmbɔsa nsɔnyi.”
^ Kana “lɔtɛngɔ.”
^ Tshɛk., “lakakashema.”
^ Ondo ɔsɔ mendanaka la ehehe k’osanga wa ndjwe kalɛlɔ esadi.
^ Kana “oshimbee anima ami.”
^ Tshɛk., “Tshɔi yakɔ yami,” lo ntɛkɛta dikambo dia anima kana lɔsɛnɔ lande.
^ Tshɛk., “lonya.”
^ Tshɛk., “lɔtɔngɔ.”
^ Tshɛk., “lɔtɔngɔ.”
^ Tshɛk., “Etema anyu wasɛnake.”
^ Tshɛk., “Akanga wa wata.”
^ Kana “anima.”
^ Tshɛk., “Lɔtɔngɔ.”
