Osambo 89:1-52
Maskilɛ.* Wa Etana+ oseka Ɛzɛra.
89 Dimi layembaka dia ngandji ka kɔlamelo ka Jehowa pondjo pondjo.
La onyɔ ami, dimi layewoyaka kɔlamelo yayɛ lo nɔnga tshɛ.
2 Nɛ dia dimi lakate nte: “Ngandji ka kɔlamelo kayohikama* pondjo pondjo,+Ndo wɛ akashikikadia kɔlamelo yayɛ nge l’olongo.”
3 “Dimi lakadje sheke la ɔsɔnami+ ami;Dimi lakatshibɛ okambi ami Davidɛ+ nte:
4 ‘Dimi layoshikikadia ɔnayɛ*+ pondjo pondjo,Ndo dimi layohika kiti kayɛ ka lowandji lo nɔnga tshɛ.’”+ (Sela)
5 Jehowa le, olongo tombolaka akambo ayɛ wa diambo,Eelo, kɔlamelo yayɛ lo etshumanelo k’ekilami.
6 Nɛ dia, akɔna ele l’olongo akoka mbɛdikama la Jehowa?+
Akɔna l’atei w’ana wa Nzambi+ ele oko Jehowa?
7 Nzambi mbokamaka wɔma lo olui* w’ekilami;+Nde ekɔ diambo ndo wɔma le wanɛ tshɛ woodingi.+
8 Jehowa Nzambi kanga lolembelembe le,Ele la wolo oko wɛ, wɛ Jah?+
Kɔlamelo yayɛ kodinga.+
9 Wɛ ekɔ lo mbolɛ ndjale kambɔmbɔ;+Etena katonɛka asuku atɔ, wɛ mbaɔladiaka.+
10 Wɛ akaminola Rahaba*+ oko ɔnɛ lambodiakema.+
La lonya layɛ la wolo, wɛ akahandjola atunyi ayɛ.+
11 Olongo wayɛ kewɔ ndo nkɛtɛ kayɛ ketɔ;+Nkɛtɛ y’ɛtɛtɔ ndo kɛnɛ koludi lɔkɔ,+ wɛ kakasale diangɔ sɔ.
12 Wɛ kakatonge nɔrdɛ la sidɛ;Tabɔra+ ndo Hɛrɛmɔna+ tombolaka lokombo layɛ la ɔngɛnɔngɛnɔ.
13 Lonya layɛ lekɔ la wolo;+Lonya layɛ lekɔ la nkudu;+Lonya layɛ l’omi lambodiyama.+
14 Kiti kayɛ ka lowandji mbikama lo losembwe la sambo k’ɔlɔlɔ;+Ngandji ka kɔlamelo la kɔlamelo memala la ntondo kayɛ.+
15 Ɔngɛnɔngɛnɔ le anto weya mbida ekoko w’ɔngɛnɔngɛnɔ.+
Jehowa le, vɔ kɛndakɛndaka lo osase w’elungi kayɛ.
16 Vɔ ngɛnangɛnaka lo lokombo layɛ lushi l’otondo,Ndo vɔ wambodiyama lo losembwe layɛ.
17 Nɛ dia wɛ kele lotombo laki wolo awɔ,+Ndo wolo* aso wambodiyama la lotshungɔ layɛ.+
18 Nɛ dia engawo kaso kekɔ ka Jehowa,Nkumekanga kaso ekɔ ka l’Ekila la Isariyɛlɛ.+
19 L’etena kɛsɔ, wɛ akatɛ ekambi ayɛ wa kɔlamelo lo ɛnɛlɔ wate:
“Dimi lakasha kanga lokalo wolo;+Dimi lakadiya ɔsɔnami oma l’atei w’anto.+
20 Dimi lakatane okambi ami Davidɛ;+Dimi lakookite esɔ k’ekila.+
21 Lonya lami layowosukɛ,+Ndo lonya lami layowokeketsha.
22 Ndooko otunyi wayolongola olambo oma le nde,Ndo ndooko onto a kɔlɔ layowɔhɛnyɔla.+
23 Dimi layɔtɛtshatɛtsha andɔshi ande oma la ntondo kande+Ndo layodiaka wanɛ woohetsha.+
24 Kɔlamelo yami ndo ngandji kami ka kɔlamelo kekɔ kaamɛ la nde,+Ndo wolo* ande wayodiyama lo lokombo lami.
25 Dimi layokitsha lonya* lande laadiko dia ndjaleNdo lonya lande l’omi laadiko dia ɛkɛdi.+
26 Nde ayombelɛ ate: ‘Wɛ kele Papa kami,Nzambi kami ndo Dive dia panda kami.’+
27 Ndo dimi layowetɛ oko ɔna l’enondo,+Ɔnɛ loleki la diko l’atei wa nkumi ya dikanga ya la nkɛtɛ.+
28 Dimi layolama ngandji ka kɔlamelo kawokami pondjo pondjo,+Ndo sheke yakamadje la nde hayotɔki pondjo.+
29 Dimi layoshikikadia ɔnande* pondjo pondjoNdo layosala dia kiti kande ka lowandji ntshikala edja oko olongo.+
30 Naka anande wambɔsɛka ɛlɛmbɛ amiNdo hawɔkɛndakɛnda lo ndjela tɛdikɔ* tami,
31 Naka vɔ mɔnyɔla wadjango amiNdo hawokitanyiya ɛlɛmbɛ ami,
32 Kete dimi layosha ohendodi* awɔ dilanya la lofimbɔ+Ndo munga kawɔ la ɔhɛhɛla.
33 Koko dimi hantshikaki mbooka ngandji kami ka kɔlamelo pondjo+Kana daka diami monga kashi.*
34 Dimi hantotola sheke yami+Kana ntshikitanya kɛnɛ kakate ɛlɔmɔ ami.+
35 Dimi lakatshibe lo ekila kami mbala ɔtɔi lo pondjo;Dimi hantotɛ Davidɛ kashi.+
36 Ɔnande* ayotshikala pondjo pondjo;+Kiti kande ka lowandji kayotshikala edja oko wonya la ntondo kami.+
37 Oko ngɔndɔ, tɔ kayoshikikɛma nge pondjo pondjoOko ɔmɛnyi wa kɔlamelo l’olongo.” (Sela)
38 Koko wɛ wɛmɛ kakawokasha ndo kakɔɔsɛkɛ;+Wɛ akomalɛ okitami ayɛ w’esɔ.
39 Wɛ akasɛkɛ sheke yakayadje la okambi ayɛ;Wɛ akɔnyɔla dɛmbɔ diande dia nkoso* ko dikasha lo nkɛtɛ.
40 Wɛ akanyukola mpele diande di’ave* tshɛ;Wɛ akalanya ahole ande w’ekokelo.
41 Wanɛ tshɛ weta laawɔ wakambe diangɔ diande;Nde ekɔ ɛngɔ ka lɔtɛngɔ le asukanyi ande.+
42 Wɛ akasale dia andɔshi ande mbidja otshumba;*+Wɛ akasale dia atunyi ande tshɛ ngɛnangɛna.
43 Ndo nto, wɛ akakaloya lokuwa lande la ta ɛkɔngɔkɔngɔ,Wɛ akasale dia nde nshisha nkɛtɛ lo ta.
44 Wɛ akakomiya lɔnɛnɛ landeNdo akasokola kiti kande ka lowandji lo nkɛtɛ.
45 Wɛ akasuse nshi yande ya dikɛnda;Wɛ akɔɔlɔtsha la nsɔnyi. (Sela)
46 Jehowa le, polo l’etena kakɔna kayoyoyashɛ? Onde pondjo pondjo?+
Onde nkɛlɛ kayɛ kayotetemala mpɛta oko dja?
47 Ohɔ woho wele lɔsɛnɔ lami mondo!+
Onde otongatonga kakayatonge anto tshɛ?
48 Onto akɔna akoka nsɛna aha la mɛna nyɔi?+
Onde nde koka ndjashimbɛ* oma lo wolo wa Diombo?* (Sela)
49 Jehowa le, lende ele etsha ayɛ w’edjedja wa ngandji ka kɔlamelo,Wakayatshibɛ Davidɛ lo kɔlamelo yayɛ?+
50 Jehowa le, ohɔ ntɛngɔ yatɛngawɔ ekambi ayɛ;Woho wahombami mbikikɛ* ntɛngɔ y’anto tshɛ;
51 Jehowa le, woho watɛnga atunyi ayɛ;Woho watɛngawɔ wanya tshɛ w’okitami ayɛ w’esɔ.
52 Jehowa atombɔmake pondjo pondjo. Aamɛɛ ndo Aamɛɛ.+
Nɔtɛ ka l'ɛse ka dikatshi
^ Enda Elembetshielo.
^ Kana “kayoviya.”
^ Tshɛk., “lɔtɔngɔ layɛ.”
^ Kana “losanganya.”
^ Ondo mendanaka la Edjibito kana Farawɔ kawɔ.
^ Tshɛk., “loseke.”
^ Tshɛk., “loseke.”
^ Kana “lowandji.”
^ Tshɛk., “lɔtɔngɔ lande.”
^ Kana “dombwelo.”
^ Kana “ɔtɔmbɔkwɛlɔ.”
^ Tshɛk., “Kana monga kashi la kɔlamelo yami.”
^ Tshɛk., “Lɔtɔngɔ lande.”
^ Kana “diadɛmɛ.”
^ Kana “tohombo tande t’ave.”
^ Tshɛk., “akemɛ lonya l’omi la andɔshi ande.”
^ Kana “nshimbɛ anima ande.”
^ Tshɛk., “lonya la Sheɔlɛ,” mbuta ate odimu a pɛngando. Enda Elembetshielo.
^ Tshɛk., “mɛmba lo ntolo kami.”
