Osambo 95:1-11
95 Nyoye todee Jehowa ekoko w’ɔngɛnɔngɛnɔ!
Nyɛsɔ todee Dive diaso dia panda+ ekoko w’otshumba.
2 Nyɛsɔ totshu la ntondo* kande la eokelo ka losaka;+Nyɛsɔ towembee ndo towodee ekoko w’otshumba.
3 Nɛ dia Jehowa ekɔ Nzambi ka woke,Nkumekanga ka woke kaheme tozambizambi tokina tshɛ.+
4 Lo lonya lande mbele ɛhɔngɔ wa nkɛtɛ;Tɔsɔdi t’akona, tande mbetɔ.+
5 Ndjale kakandasale, kande ketɔ,+Ndo anya ande mbakakenge nkɛtɛ y’ofumbo.+
6 Nyoye tɔtɛmɔlɛ ndo tokusame;Nyɛsɔ toke adwe la ntondo ka Jehowa Osadi aso.+
7 Nɛ dia nde ekɔ Nzambi kaso,Ndo tekɔ anto walongande,Ɛkɔkɔ walamande.*+
Ɛlɔ, naka nyu mpokamɛ dui diande,+
8 Tanyokeketshake etema anyu oko la Meriba,*+Oko lo lushi la Masa* l’oswe wa shɛnga,+
9 Etena kakambidje watshɛnyu l’ohemba;+Vɔ wakambidje tɔfwɛfwɛ kaanga mbakawɛnyi etsha ami.+
10 L’edja ka ɛnɔnyi 40, dimi lakahetsha lɔlɔnga lɔsɔ, ndo lakate nte:
“Vɔ wekɔ anto wele etema awɔ takɔka mboka nshi tshɛ;Vɔ wateye mboka yami.”
11 Ɔnkɔnɛ, dimi lakatshibe lo nkɛlɛ kami nte:
“Vɔ hawotɔtɔ lo momuya kami.”+
Nɔtɛ ka l'ɛse ka dikatshi
^ Tshɛk., “la ntondo k’elungi.”
^ Tshɛk., “wa lo lonya lande.”
^ Kitshimudi ate: “Owanu.”
^ Kitshimudi ate: “Mbidja l’ohemba; mpemba.”
