Etatelo 16:1-16
-
Hangara nde la Ishimaɛlɛ (1-16)
16 Sarayi wadi aki Abrama kombota ndooko ɔna,+ koko nde aki la ose olimu w’ose Edjibito, lokombo lande Hangara.+
2 Ko Sarayi akatɛ Abrama ate: “Lam’ele Jehowa kombetawɔ dia dimi mbota ana, lam’alangayɛ, eyana la ose olimu ami. Ondo dimi kokaka monga l’ana lo tshimbo yande.”+ Ɔnkɔnɛ Abrama aketawɔ kɛnɛ kakawotɛ Sarayi.
3 L’ɔkɔngɔ w’Abrama mbidjasɛ ɛnɔnyi 10 lo wodja wa Kanana, Sarayi wadi aki Abrama akɔshi Hangara, ose olimu ande wa womoto w’ose Edjibito, ko akawosha Abrama dia nde monga oko wadɛnde.
4 Nde akeyana la Hangara ko Hangara akatshu diemi. Lam’akeye Hangara dia nde aya la diemi, nde akatatɛ mɔnyɔla nkumɛnde.
5 Ko Sarayi akatɛ Abrama ate: “Lekɔ lo mɔnyɔma l’ɔtɛ ayɛ. Dimi mbakakosha ose olimu ami, ko kam’ambondeya dia nde aya la diemi, nde ambotatɛ mɔnyɔlami. Jehowa atosambole dimi la yɛ.”
6 Abrama akatɛ Sarayi ate: “Wɛ ekɔ la lowandji le ose olimu ayɛ. Salɛnde kɛnɛ tshɛ kafɔnyayɛ wate kekɔ dimɛna.” Ko Sarayi akawosha nsɔnyi. Ɔnkɔnɛ womoto akɔ akalawɔ.
7 L’ɔkɔngɔ diko, ondjelo wa Jehowa akatane womoto akɔ suke la ɛtɛkɔ kɛmɔtshi k’ashi l’oswe wa shɛnga, ɛtɛkɔ kele lo mboka k’otsha la Shura.+
8 Nde akawombola ate: “Hangara ose olimu waki Sarayi, oma lende ayaye ndo otsha lende atayatshu?” Ko nde akakadimola ate: “Lekɔ lo talawɔ Sarayi ka nkumɛmi.”
9 Ondjelo wa Jehowa akawotɛ ate: “Kalola le nkumɛyɛ kele toyakitshakitsha la ntondo kande.”
10 Ko ondjelo wa Jehowa akate ate: “Dimi layofudia tokanula* tayɛ lo yɛdikɔ y’efula woho wele ndooko onto layokoka mbadia lofulo lawɔ.”+
11 Ondjelo wa Jehowa akakotsha ate: “Wɛ ekɔ la diemi ndo wɛ ayota ɔna pami. Kowɔlɛ Ishimaɛlɛ,* nɛ dia Jehowa amboka delo dialelayɛ l’ɔtɛ w’asui ayɛ.
12 Nde ayonga onto lele oko mponda ka l’okonda.* Lonya lande layɔlɔsha anto tshɛ ndo anya w’anto tshɛ wayowɔlɔsha. Nde ayodjasɛ mbɛlanɛ l’anango tshɛ.”*
13 Ko nde akeelɛ* lokombo la Jehowa lakasawolaka la nde, ata ate: “Wɛ ekɔ Nzambi kɛna,”+ nɛ dia nde akate ate: “Onde dimi mɛtɛ lambenda ɔnɛ lamɛna?”
14 Diakɔ dielɛwɔ ɛtɛkɔ kakɔ ɔnɛ Bɛrɛ-Lahai-Rɔyi.* (Tɔ kekɔ lam’asa Kadɛshɛ la Bɛrɛdɛ.)
15 Ko Hangara akotɛ Abrama ɔna pami, ko Abrama akɔlɛ ɔnande lakote Hangara ɔnɛ Ishimaɛlɛ.+
16 Abrama aki la ɛnɔnyi 86 etena kakawotɛ Hangara Ishimaɛlɛ.
Nɔtɛ ka l'ɛse ka dikatshi
^ Tshɛk., “lɔtɔngɔ.”
^ Kitshimudi ate: “Nzambi amboka.”
^ Ondo etelo kɛsɔ nembetshiyaka onto lele la yimba ya dipanda.
^ Kana ondo “nde ayohetshana l’anango tshɛ.”
^ Kana “akatɛndɛɛ.”
^ Kitshimudi ate: “Ɛtɛkɔ ka Ɔnɛ lasɛna ndo lamɛna.”
