Etatelo 48:1-22
48 L’ɔkɔngɔ w’akambo asɔ, wakatɛ Yɔsɛfu vate: “Shɔ ambɔlɛmba efula la hemɔ.” Nde akɔshi anande 2, Manase nde la Efrayimɛ, ko akatshu la wɔ.+
2 Ko wakatɛ Jakɔbɔ vate: “Yɔsɛfu y’ɔnayɛ amboya ndjokenda.” Ko Isariyɛlɛ akayakeketsha ndo akadjasɛ lo mbeto kande.
3 Jakɔbɔ akatɛ Yɔsɛfu ate:
“Nzambi Kanga-Wolo-Tshɛ akɛnama le mi la Luza, lo wodja wa Kanana ko akantshɔkɔla.+
4 Ndo nde akambutɛ ate: ‘Dimi layokosha diwutshi, dimi layokofudia ndo wɛ ayoyala olui wa woke w’anto+ ndo dimi layosha tokanula* tayɛ nkɛtɛ nyɛ pondjo pondjo.’+
5 Ɔnkɔnɛ, anayɛ 2 wakayote lo wodja w’Edjibito la ntondo ka dimi ndja le yɛ l’Edjibito wekɔ anami.+ Efrayimɛ nde la Manase wayonga anami oko wele Rubɛna nde la Simɛyɔna anami.+
6 Koko ana wayoyota l’ɔkɔngɔ awɔ wayonga anayɛ. Vɔ wayelamɛ lo nkombo y’anangɛwɔ ndo vɔ wayolongola etenyi kawɔ k’okitɔ.+
7 Lo kɛnɛ kendana la mi, etena kakamayayaka oma la Padana, Rashɛlɛ wa nyɔ akavu+ lalemi lo wodja wa Kanana, l’ɛtshi ka nkɛtɛ kanganyi etale la Efarata.+ Ko dimi lakookundɛ lo mboka k’otsha l’Efarata, mbuta ate Bɛtɛlɛhɛma.”+
8 Lam’akɛnyi Isariyɛlɛ ana waki Yɔsɛfu, nde akawombola ate: “Akanga ana anɛ?”
9 Yɔsɛfu akatɛ she ate: “Toko anami wamboyombisha Nzambi lendo!”+ Ko nde akate ate: “Lam’alangayɛ, ombishawɔ kele mbatshɔkɔlɛ.”+
10 L’etena kɛsɔ, washo waki Isariyɛlɛ wakayala loonge loto, nɛ dia nde aki osombe ndo nde aki hayɛna. Ɔnkɔnɛ Yɔsɛfu akaasukanya lalende, ko nde akashana la wɔ bizɛ ndo akaakumbatɛ.
11 Isariyɛlɛ akatɛ Yɔsɛfu ate: “Dimi konongamɛka dia layɛna elungi kayɛ nto,+ koko kakianɛ Nzambi ambonkimanyiya dia dimi mɛna ndo anayɛ.”*
12 Ko Yɔsɛfu akanya ana oma lo dihɛlɔ diaki Isariyɛlɛ, ko nde akakɔlama elungi polo la nkɛtɛ.
13 Oma laasɔ, Yɔsɛfu akawaɔshi vɔ akɔ 2, Efrayimɛ+ lo lonya lande l’omi dia nde monga lo lonya la lɔmɔsɔ laki Isariyɛlɛ ndo Manase+ lo lonya lande la lɔmɔsɔ dia nde monga lo lonya l’omi laki Isariyɛlɛ, ko nde akaasukanya lalende.
14 Koko Isariyɛlɛ akonyiya lonya lande l’omi, ko akaliahɛ l’ɔtɛ wa Efrayimɛ kaanga mbakinde kose ndo nde akahɛ lonya lande la lɔmɔsɔ l’ɔtɛ wa Manase. Nde akawawahɛ anya ngasɔ la oyango ɔmɔtshi, nɛ dia Manase mbaki enondo.+
15 Oma laasɔ, nde akatshɔkɔla Yɔsɛfu ndo akate ate:+
“Nzambi ka mɛtɛ kele waa papa, Abrahama la Isaka wakakɛndakɛnda la ntondo kande,+Nzambi ka mɛtɛ kakaname lɔsɛnɔ lami l’otondo polo ndo lushi l’ɛlɔ,+
16 Ondjelo wakambitsha* oma lo mpokoso+ tshɛ tshɔkɔla ana anɛ.+
Lokombo lami, lokombo l’Abrahama wa tshɛmi ndo lokombo la Isaka wa papa leyamake le wɔ.Vɔ wafulane efula la nkɛtɛ.”+
17 Lam’akɛnyi Yɔsɛfu dia lonya l’omi la she lekɔ paka l’ɔtɛ wa Efrayimɛ, dui sɔ kombɔngɛnyangɛnya. Ɔnkɔnɛ, nde akalange minya lonya la she oma l’ɔtɛ wa Efrayimɛ dia liahɛ l’ɔtɛ wa Manase.
18 Yɔsɛfu akatɛ she ate: “Aha ngango Ipa! Ɔnɛ kele enondo.+ Ahɛ lonya layɛ l’omi l’ɔtɛ ande.”
19 Koko she akatone ndo akate ate: “Dimi mbeyaka, ɔnami, dimi mbeyaka. Nde lawɔ ayonga tshondo ya wodja ndo nde lawɔ ayonga wodja wa woke. Koko ɔna la kose ayowoleka+ ndo anande* wayonga efula oko wedja w’etondo.”+
20 Ɔnkɔnɛ, nde akatetemala mbatshɔkɔla lushi lɔsɔ,+ ata ate:
“Ase Isariyɛlɛ wayokambaka la lokombo layɛ etena kayowɔtshɔkwanaka, wata vate:‘Nzambi akɔtshɔkɔlɛ woho wakandatshɔkɔla Efrayimɛ la Manase.’”
Ko nde akatetemala mbetsha Efrayimɛ la ntondo ka Manase.
21 Oma laasɔ, Isariyɛlɛ akatɛ Yɔsɛfu ate: “Dimi layanga mvɔ,+ koko ndooko onyake Nzambi ayotetemala monga kaamɛ la nyu ndo ayonyokaloya lo nkɛtɛ ya watshɛnyu.+
22 Koko dimi lambokosha ɛtshi ka nkɛtɛ kekina oleki ananyɔ, ɛtshi ka nkɛtɛ kakamahɔtɔla ase Amɔra la lokuwa lami la ta ndo la ota ami.”
Nɔtɛ ka l'ɛse ka dikatshi
^ Tshɛk., “lɔtɔngɔ.”
^ Tshɛk., “lɔtɔngɔ.”
^ Kana “wakantshungola.”
^ Tshɛk., “lɔtɔngɔ.”
