Etsha 10:1-48
10 La Kayisariya kaki pami kɛmɔtshi lokombo lande Kɔnɛliyo, owandji* w’asɔlayi wakawelɛka ɔnɛ olui* w’ase Itali.
2 Nde aki onto lakayashaka le Nzambi ndo nde l’ase luudu lande tshɛ wakokaka Nzambi wɔma. Nde akashaka anto weshasha efula wa kɛtshi ndo akasalaka alɔmbɛlɔ w’ɔsɛngɔsɛngɔ le Nzambi la etete.
3 Lushi lɔmɔtshi oya lo wonya wa 9,*+ nde akɛnyi lo ɛnɛlɔ ondjelo wa Nzambi amboya le nde ndo awotɛ ate: “Kɔnɛliyo!”
4 Kɔnɛliyo akawende tɛɛ, ele la wɔma w’efula ndo akambola ate: “Kakɔna kɛnɛ na, Nkumadiɔndjɔ?” Nde akawotɛ ate: “Nzambi amboka alɔmbɛlɔ+ ayɛ ndo nde ambohɔ weshasha wa kɛtshi washayɛ anto.
5 Ɔnkɔnɛ, toma anto la Jɔpa kele watele Simɔna lelamɛ nto Petero.
6 Nde mpanga oko ɔngɛndangɛnda laka* Simɔna ɔnɔngɔsɔdi wa dikoho, lele la luudu suke la ndjale.”
7 Kam’akatshu ondjelo wakatɛkɛta la nde, nde akelɛ ase olimu ande 2 ndo ɔsɔlayi wakokaka Nzambi wɔma oma l’atei wa wanɛ wakoolamaka,
8 ko nde akaakɔndɔlɛ akambo tshɛ ndo akaatome la Jɔpa.
9 La wedi a pindju, lam’akawatatetemalaka la lɔkɛndɔ lawɔ ndo lam’akiwɔ suke la nkoma l’osomba, Petero akadɛ lo tshoto ya luudu la la diko oya lo wonya wa 6* dia tɔlɔmba.
10 Ko nde akoke ndjala ka mamba ndo akakombola ndɛ yangɔ. Etena kakawakatɛka diangɔ, nde akandama la nende+
11 ndo akɛnyi olongo wambodihɔ ko ɛngɔ kɛmɔtshi* kele oko dihɔndɔ dia woke dia linɛnɛ diakawayaholoyaka lo atshuku adiɔ 4 oya la nkɛtɛ.
12 Weho tshɛ wa dikɛndakɛnda diele l’ekolo 4 ndo dikɛndakɛnda dialamba* la nkɛtɛ diaki lɔkɔ, kaamɛ ndo tofudu ta l’olongo.
13 Oma laasɔ, nde akoke dui diawotɛ ɔnɛ: “Petero, emala, diakadiɔ kele lɛka!”
14 Koko Petero akate ate: “Keema, Nkumadiɔndjɔ. Nɛ dia ndooko lushi lakamale ɛngɔ kambodjama mindo ndo kele bu pudipudi.”+
15 Ko nde akoke dui mbala ka 2 diawotɛ ɔnɛ: “Tshika mbelɛ diangɔ diele Nzambi ambodiɛdia ɔnɛ diangɔ dia mindo.”
16 Dui sɔ diakasalema mbala ka 3, ko mbala kakɔ ɔtɔi ɛngɔ* kakɔ kakɔsama otsha l’olongo.
17 Etena kaki Petero l’okandokando dia mbeya kitshimudi ya ɛnɛlɔ kakandɛnyi, ko wonya akɔ anto wakatomama oma le Kɔnɛliyo wakambola dia mbeya lɛnɛ aki luudu laki Simɔna ko vɔ wakayemala la soko dia lokombo lande.+
18 Vɔ wakawelɛ la dui dia wolo ndo wakambola dia mbeya kana laawɔ mbakahange Simɔna lakawelɛka nto Petero oko ɔngɛndangɛnda.
19 Lam’akakanyiyaka Petero dikambo dia ɛnɛlɔ kɛsɔ, nyuma+ kakawotɛ ɔnɛ: “Eenda, apami 3 wekɔ lo koyanga.
20 Ɔnkɔnɛ emala, holɔ otsha le wɔ aha la mbidja taamu, nɛ dia dimi mbaatomi.”
21 Ko Petero akaholɔ otsha le apami akɔ ndo akate ate: “Dimi layanganyu, dimi ɔnɛ. Lande na kamonyoya lanɛ?”
22 Vɔ wakate vate: “Kɔnɛliyo+ ekɔ owandji w’asɔlayi ndo onto ɔlɔlɔ loka Nzambi wɔma ndo wodja wa Juda w’otondo tɛkɛtaka dimɛna lo dikambo diande. Nzambi akatome ondjelo ande w’ekila ndo akayowotɛ dia nde kelɛ lo luudu lande ndo dia nde tohokamɛ akambo wahombayɛ mbuta.”
23 Ɔnkɔnɛ, nde akawaɔtshiya ndo akawasha mpango oko angɛndangɛnda ande.
La wedi a pindju, nde akonɛ kaamɛ la wɔ ndo anangɛso amɔtshi wa la Jɔpa wakatshu kaamɛ la nde.
24 La wedi a pindju okina, nde akakome la Kayisariya. Lo mɛtɛ, Kɔnɛliyo akaakongaka ndo nde akasanganya ewotɔ ande kaamɛ la angɛnyi ande wa ma ma.
25 Lam’akɔtɔ Petero, Kɔnɛliyo akoolongola, akakusama l’ekolo ande ndo akɔɔlɛmiya.*
26 Koko Petero akawonyiya ndo akate ate: “Emala, dimi lawɔ lekɔ tsho onto oko wɛ.”+
27 L’ɔkɔngɔ wa Petero nsawola la nde, vɔ wakɔtɔ lo luudu ndo wakatane anto efula wosanganyi.
28 Nde akawatɛ ate: “Nyu mbeyaka dimɛna dia keema ɔlɔlɔ dia ose Juda nsangana kana monga kaamɛ la dioho di’anto dikina,+ koko Nzambi akamɛnya diaha mbelɛ ndooko onto ɔnɛ mindo kana bu pudipudi.+
29 Diakɔ diakamaye aha la monga la taamu lam’akawatome anto dia tɔmbɔsa. Ɔnkɔnɛ, ombute ɔkɔkɔ wakayambelɛ.”
30 Ko Kɔnɛliyo akate ate: “Ambeta nshi 4, lo wonya wele oko weso ɔnɛ, dimi lakalɔmbaka lo luudu lami oya lo wonya wa 9,* mbala kakɔ ɔtɔi pami kɛmɔtshi kakalɔtɛ ahɔndɔ wa ngaingai akemala la ntondo kami,
31 ko nde akate ate: ‘Kɔnɛliyo, Nzambi amboka alɔmbɛlɔ ayɛ ndo nde ambohɔ weshasha wa kɛtshi washayɛ anto.
32 Ɔnkɔnɛ, toma anto la Jɔpa kele watele Simɔna lelamɛ nto Petero. Nde mpanga laka ɔnɔngɔsɔdi ɔmɔtshi wa dikoho, lokombo lande Simɔna lele l’omamu wa ndjale.’+
33 Ko mbala kakɔ ɔtɔi, dimi lakatome anto le yɛ ndo wɛ ambosala dimɛna woho wamboyoya lanɛ. Ɔnkɔnɛ, wonya ɔnɛ sho tshɛ tekɔ la ntondo ka Nzambi dia mpokamɛ akambo tshɛ wambokodjangɛ Jehowa* dia mbuta.”
34 Ko Petero akatatɛ ntɛkɛta ndo nde akate ate: “Lo mɛtɛ, dimi lamboshihodia dia Nzambi keema la shɔnɔdi,+
35 koko lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde.+
36 Nde akatome dui le ana w’ase Isariyɛlɛ dia towaewoya lokumu l’ɔlɔlɔ la wɔladi+ waya lo tshimbo ya Yeso Kristo ɔnɛ, nde kele Nkumadiɔndjɔ k’anto tshɛ.+
37 Nyu mbeyaka dikambo diakatɛkɛtamaka la Judeya y’otondo, ntatɛ oma la Ngalileya+ l’ɔkɔngɔ wa batisimu kakasambishaka Joani,
38 lo dikambo dia Yeso laki ose Nazarɛtɛ. Nzambi akookite esɔ la nyuma k’ekila+ ndo la wolo ndo nde aketeta lo wodja w’otondo, atasale akambo w’ɛlɔlɔ ndo atakɔnɔla wanɛ tshɛ wakahɛnyahɛnyamaka oma le Diabolo,+ nɛ dia Nzambi aki kaamɛ la nde.+
39 Sho tekɔ ɛmɛnyi w’akambo tshɛ wakandasale lo wodja w’ase Juda ndo la Jɛrusalɛma, koko vɔ wakoodiake lo mbohanɛ l’otamba.*
40 Nzambi akawolola lushi la 3+ ndo akawosha lotshungɔ la nde mɛnama,
41 aha le anto tshɛ, koko le so, sho ɛmɛnyi wakasɔnama ntondo oma le Nzambi, mbuta ate sho wanɛ wakale ndo wakanɔ kaamɛ la nde l’ɔkɔngɔ wa nde mbolɔ oma lo nyɔi.+
42 Ndo nto, nde akatodjangɛ dia sho nsambisha anto ndo mbewoya dimɛna dimɛna+ dia nde mbakasɔnama oma le Nzambi dia nombosha wanɛ wasɛna ndo wanɛ wakavu.+
43 Dikambo diande mbele amvutshi tshɛ wakatɛkɛta+ ɔnɛ onto tshɛ longa la mbetawɔ le nde dimanyiyamaka pɛkato lo tshimbo ya lokombo lande.”+
44 Etena kakatɛkɛtaka Petero akambo asɔ, nyuma k’ekila kakaholɔ le anto tshɛ wakoke ɔtɛkɛta.+
45 Ndo ambetawudi* wakanyɛma mpota wakaye kaamɛ la Petero wakaambe, nɛ dia losha la woshasha wa Nzambi la nyuma k’ekila lakashama ndo le ase wedja.
46 Nɛ dia vɔ wakawaoke watɛkɛta lo ɛtɛkɛta ekina ndo watombola Nzambi.+ Ko Petero akate ate:
47 “Onde onto ɔmɔtshi kokaka nshimba ashi diaha anto anɛ wambolongola nyuma k’ekila oko sho batizama?”+
48 Ko nde akawadjangɛ dia vɔ batizama lo lokombo la Yeso Kristo.+ Oma laasɔ, vɔ wakɔɔlɔmbɛ dia nde ntshikala nshi mɔtshi.
Nɔtɛ ka l'ɛse ka dikatshi
^ Kana “ɔnɔmbɔdi w’asɔlayi,” akalɔmbɔlaka asɔlayi 100.
^ Kana “nkamba kaamɛ,” olui 1 w’asɔlayi w’ase Rɔmɔ waki la asɔlayi 600.
^ Mbuta ate oya lo eshidi 3 wa dikɔlɔ.
^ Kana “pangiyama oma le.”
^ Mbuta ate oya lo eshidi 12 wa yanyi.
^ Tshɛk., “woho ɔmɔtshi wa dɔnga.”
^ Kana “diangɔ diayakutola.”
^ Tshɛk., “dɔnga.”
^ Kana “akookusamɛ.”
^ Mbuta ate oya lo eshidi 3 wa dikɔlɔ.
^ Kana “osongo.”
^ Kana “akanga wa kɔlamelo.”
