Etsha 11:1-30
11 Apɔstɔlɔ ndo anangɛso waki la Judeya wakoke dia ndo ase wedja wambetawɔ ɔtɛkɛta wa Nzambi.
2 Ɔnkɔnɛ, lam’akaye Petero la Jɛrusalɛma, wanɛ wakasukɛka wonyelo wa mpota+ wakatatɛ mbɔɔnyɔla,*
3 wata ɔnɛ: “Wɛ akatshu lo luudu l’anto waki kominya mpota ndo akale kaamɛ la wɔ.”
4 Ko Petero akaalembetshiya kiambokambo tshɛ ya dikambo diakɔ, ata ate:
5 “Dimi lakalɔmbaka l’osomba wa Jɔpa, etena kakamandama la nende, dimi lakɛnyi ɛnɛlɔ, ɛngɔ* kɛmɔtshi kele oko dihɔndɔ dia woke dia linɛnɛ diakawayaholoyaka lo atshuku adiɔ 4 oma l’olongo, ko tɔ kakaye polo lam’akimi.+
6 Lam’akamakishishima, dimi lakɛnyi nyama ya la nkɛtɛ yele l’ekolo 4, nyama ya l’okonda, dikɛndakɛnda dialamba* ndo tofudu ta l’olongo.
7 Ndo nto, dimi lakoke dui diambutɛ ɔnɛ: ‘Petero, emala, diakadiɔ kele lɛka!’
8 Koko dimi lakate nte: ‘Keema, Nkumadiɔndjɔ, nɛ dia ndooko lushi lakɔtɔ ɛngɔ kakadjama mindo ndo kele bu pudipudi l’onyɔ ami.’
9 Mbala ka 2 nto, dimi lakoke dui oma l’olongo diambutɛ ɔnɛ: ‘Tshika mbelɛ diangɔ diele Nzambi ambodiɛdia ɔnɛ diangɔ dia mindo.’
10 Dikambo sɔ diakasalema mbala ka 3, ko diangɔ diakɔ tshɛ diakakotɔma otsha l’olongo.
11 Ndo nto, ko wonya akɔ, apami 3 wakatomama oma la Kayisariya+ oya le mi wakemala la soko dia luudu lakatadjasɛ.
12 Ko nyuma kakambutɛ dia dimi ntshɔ kaamɛ la wɔ aha la mbidja taamu. Ndo anangɛso 6 anɛ wakatshu kaamɛ la mi ko takɔtɔ lo luudu la pami kakɔ.
13 “Nde akatɔkɔndɔlɛ woho wakandɛnyi ondjelo emadi lo luudu lande awotɛ ɔnɛ: ‘Toma anto la Jɔpa kele watele Simɔna lelamɛ nto Petero,+
14 ko nde ayoyokotɛ akambo wahombayɛ wɛ la wa lo luudu layɛ tshɛ nsala dia shimbamɛ.’
15 Koko lam’akamatatɛ ntɛkɛta, nyuma k’ekila kakaholɔ le wɔ oko wakadiasalema le so ntondo.+
16 Ko dimi lakohɔ ɛtɛkɛta wa Nkumadiɔndjɔ wakandataka ate: ‘Joani akabatizaka anto la ashi,+ koko nyu nyayobatizama la nyuma k’ekila.’+
17 Ko naka Nzambi akawasha losha la woshasha akɔ waamɛ oko wakandatosha sho wanɛ waketawɔ Nkumadiɔndjɔ Yeso Kristo, ko dimi eemi kahombami nshimba dia lolango la Nzambi salema?”*+
18 Lam’akawoke akambo asɔ, vɔ wakatshike mbidja taamu* ndo wakatombola Nzambi, wata vate: “Nzambi ambosha ndo ase wedja ndjatshumoya kakonya lo lɔsɛnɔ.”+
19 Ko wanɛ wakahandjɔnɛ+ l’ɔtɛ w’asui wakatombe lo dikambo dia Stɛfano wakatshu polo ndo la Fenikiya, la Kupiro ndo l’Atiyɔka, koko vɔ wakatasambishaka ɔtɛkɛta wa Nzambi paka le ase Juda ato.+
20 L’atei awɔ mbaki ndo apami amɔtshi wa la Kupiro ndo wa la Kurɛnɛ wakaye l’Atiyɔka ndo wakatatɛ mbewoya anto wakatɛkɛtaka Grɛkɛ lokumu l’ɔlɔlɔ la Nkumadiɔndjɔ Yeso.
21 Ndo nto, lonya la Jehowa* laki kaamɛ la wɔ ndo lokema l’anto wakakome ambetawudi ndo wakakadimɔ le Nkumadiɔndjɔ.+
22 Lokumu lawɔ lakokɛma l’etshumanelo ka la Jɛrusalɛma, ko vɔ wakatome Barnabasɛ+ polo l’Atiyɔka.
23 Lam’akandakome, nde akɛnyi ɔlɔlɔ waheyama mbɛdika waki Nzambi, ko nde akangɛnangɛna ndo akatatɛ mbakeketsha vɔ tshɛ dia vɔ mbɔsa yɛdikɔ y’oma k’ɛse otema+ dia vɔ ntshikala lo Nkumadiɔndjɔ.
24 Nɛ dia nde aki onto ɔlɔlɔ ndo akalole la nyuma k’ekila ndo la mbetawɔ. Ndo olui a woke w’anto wakakotshama le Nkumadiɔndjɔ.+
25 Ko nde akatshu otsha la Taraso dia toyangiayangia Saolo.+
26 L’ɔkɔngɔ wa nde mbɛɛna, nde akaye la nde l’Atiyɔka. Ɔnkɔnɛ, l’edja ka ɔnɔnyi w’otondo, vɔ wakasanganaka kaamɛ la wɔ l’etshumanelo ndo waketshaka olui a woke w’anto. L’Atiyɔka mbakelamɛ ambeki mbala ka ntondo l’ɛlɔmbwɛlɔ ka Nzambi ɔnɛ Akristo.+
27 Lo nshi shɔ, amvutshi+ amɔtshi wakaye oma la Jɛrusalɛma oya l’Atiyɔka.
28 Ɔmɔtshi la l’atei awɔ lokombo lande Angabo,+ nde akemala ndo akate l’ekimanyielo ka nyuma dia ndjala ka kasha kaki suke la ndja lo nkɛtɛ k’otondo.+ Ndjala kakɔ kakayoyaka mɛtɛ lo nshi ya Klodiyo.
29 Ɔnkɔnɛ, ambeki wakɔshi yɛdikɔ ya ntomɛ anangɛwɔ wakadjasɛka la Judeya ekimanyielo,+ onto l’onto lo ndjela ekondjelo kande.+
30 Ko vɔ wakasale dui sɔ, wakatome ekimanyielo kakɔ le dikumanyi lo tshimbo ya Barnabasɛ nde la Saolo.+
Nɔtɛ ka l'ɛse ka dikatshi
^ Kana “nkakatana la.”
^ Tshɛk., “woho ɔmɔtshi wa dɔnga.”
^ Kana “diangɔ diayakotola.”
^ Kana “nkengɛ lo mboka ka Nzambi?”
^ Tshɛk., “vɔ wakatshikala ki.”
