Etsha 13:1-52
13 L’Atiyɔka aki amvutshi ndo embetsha waketshaka l’etshumanelo+ ɛnɛ: Barnabasɛ, Simɛyɔna lakawelɛka nto Ningɛrɛ, Lukiyo l’ose Kurɛnɛ, Manaɛna lakɔtɔ kalasa kaamɛ la Hɛrɔdɛ ɔnɛ laki owandji wa distrikɛ ndo Saolo.
2 Etena kakawakambɛka Jehowa* olimu* ndo kakawakilaka mbo ya ndɛ, nyuma k’ekila kakate ɔnɛ: “Nyonkitshe Barnabasɛ la Saolo+ laande dikambo dia olimu wakamaasɔnɛ.”+
3 L’ɔkɔngɔ wa vɔ nkila mbo ya ndɛ ndo wa nɔmba, vɔ wakawawahɛ anya ndo wakaakɛndja.
4 Apami asɔ wakatomama oma le nyuma k’ekila wakaholɔ otsha la Sɛlukiya ndo oma lɛkɔ, vɔ wakatshu lo masuwa otsha la Kupiro.
5 Lam’akawakome la Salami, vɔ wakatatɛ nsambisha ɔtɛkɛta wa Nzambi lo toshinangɔnga t’ase Juda. Ndo Joani akatawakimanyiyaka.*+
6 Lam’akawatenyanya disɛnga di’otondo polo la Pafo, vɔ wakahomana la pami kɛmɔtshi k’ose Juda kakawelɛka Bara-Yeso. Nde aki dɔka ndo omvutshi wa kashi.
7 Nde aki kaamɛ la prɔkɔsilɛ* Sɛrɛngiyo Paolosɛ, pami ka yimba. Nde akelɛ Barnabasɛ la Saolo oya le nde, nɛ dia nde akakombolaka l’otema ɔtɔi dia mpokamɛ ɔtɛkɛta wa Nzambi.
8 Koko Elimasɛ laki dɔka (ngasɔ mbakadimɔma lokombo lande) akatatɛ mbalɔsha lo nyanga dia nshimba prɔkɔsilɛ diaha nde monga la mbetawɔ.
9 Ko Saolo lelamɛ nto Pɔɔlɔ lakalodiama la nyuma k’ekila akawende tɛɛ
10 ndo akate ate: “Wɛ pami koludi la weho tshɛ wa nkeso ndo weho tshɛ w’akambo wa kɔlɔ, wɛ ɔna Diabolo,+ wɛ otunyi wa dikambo tshɛ di’ɔlɔlɔ, onde wɛ hatotshika dia mengesola mboka yosembwe ya Jehowa?*
11 Eenda, lonya la Jehowa* lambonga laadiko diayɛ ndo wɛ ayonga tshungu, wɛ hatɛna osase wa wonya l’etena kɛmɔtshi.” Ko mbala kakɔ ɔtɔi loonge la wodjima lakoohotamɛ ko nde akatatɛ mamamba, ayanga onto la mbokimɛ lo lonya dia mbɔlɔmbɔla.
12 Lam’akɛnyi prɔkɔsilɛ kɛnɛ kakatombe, nde akakome ombetawudi, nɛ dia nde akanandema efula la wetshelo wa Jehowa.*
13 Pɔɔlɔ la asekande wakande lɔkɛndɔ lo ndjale oma la Pafo ndo wakakome la Pɛrɛnga ka la Pamufiliya. Koko Joani+ akakakitɔna la wɔ ndo akakalola la Jɛrusalɛma.+
14 Koko vɔ wakamɔ oma la Pɛrɛnga ko wakakome l’Atiyɔka wa la Pisidiya ndo wakatshu lo shinangɔnga+ lushi la Sabato ko wakatodjasɛ lɛkɔ.
15 L’ɔkɔngɔ wa vɔ mbadia Ɛlɛmbɛ+ la Amvutshi lo sɛkɛ, ewandji wa shinangɔnga wakaatomɛ dui ɔnɛ: “Anangɛso le, naka nyekɔ la dui dimɔtshi dia nkeketsha anto, nyodite.”
16 Ko Pɔɔlɔ akemala, akɛnya anto la lonya dia vɔ mbɔlama, ko nde akate ate:
“Nyu ase Isariyɛlɛ la anto akina woka Nzambi wɔma le, nyohokame.
17 Nzambi ka wodja ɔnɛ w’Isariyɛlɛ akasɔnɛ watshɛso ndo nde akadiya anto ande lam’akiwɔ angɛndangɛnda lo wodja w’Edjibito ndo akaatondja oma lɛkɔ la lonya la wolo.+
18 L’edja k’ɛnɔnyi oko 40, nde akakikɛ lɔkɛwɔ laki la wɔ l’oswe wa shɛnga.+
19 L’ɔkɔngɔ wa ndanya wedja 7 lo nkɛtɛ ya Kanana, nde akawasha ɛtshi kawɔ ka nkɛtɛ oko okitɔ.+
20 Akambo asɔ tshɛ wakasalema l’edja k’ɛnɔnyi oko 450.
“L’ɔkɔngɔ wa laasɔ, nde akawasha toshushi polo lo nshi y’omvutshi Samuɛlɛ.+
21 Koko lam’ele vɔ wakayange nkumekanga,+ Nzambi akawasha Saolo ɔna Kisha, laki lo dioho dia Bɛnjamina+ l’edja k’ɛnɔnyi 40.
22 L’ɔkɔngɔ wa nde mbonya, nde akawaonyiyɛ Davidɛ dia nde monga nkumekanga.+ Nde akate lo dikambo diande ate: ‘Dimi lambotana Davidɛ ɔna Jɛse,+ pami kangɛnyangɛnya otema ami;+ nde ayosala akambo tshɛ walangami.’
23 Lo ndjela daka diande, lo tshimbo ya kanula* yaki pami kɛsɔ, Nzambi akasha Isariyɛlɛ oshimbedi, Yeso.+
24 La ntondo ka onto ɔsɔ ndja, Joani akasambishaka ase Isariyɛlɛ tshɛ lo sɛkɛ dia vɔ batizama oko djembetelo ya ndjatshumoya.+
25 Koko otsha l’ekomelo k’olimu ande, Joani akambolaka ate: ‘Afɔnyanyu, eemi? Aha dimi kele nde. Koko nyolonge, Ɔnɛ layaye l’ɔkɔngɔ ami, dimi haasungana nkelekola+ kaanga ɛkɔdi wa sabata yande.’
26 “Nyu analengo, tokanula ta lo nkumbo k’Abrahama ndo anto akina wele l’atei anyu wanɛ woka Nzambi wɔma le, le so+ mbakatomama ɔtɛkɛta wa panda kɛsɔ.
27 Nɛ dia ase Jɛrusalɛma ndo ewandji awɔ kombeya onto ɔsɔ, koko lam’akawasalaka akambo oko toshushi, vɔ wakakotsha kɛnɛ kakate Amvutshi.+ Akambo akɔ mbaadiema lushi la sabato tshɛ la dui dia wolo.
28 Kaanga mbakiwɔ kombotana ndooko la dikambo dia mbodiaka,+ vɔ wakalɔmbɛ Pilato dia nde ndjakema.+
29 Ndo lam’akawakotsha akambo tshɛ wakafundama lo dikambo diande, vɔ wakoohanola oma l’otamba* ko wakatookundɛ lo diombo.*+
30 Koko Nzambi akawolola oma lo nyɔi,+
31 ndo l’edja ka nshi efula, nde akɛnamaka le wanɛ wakatshu kaamɛ la nde oma la Ngalileya otsha la Jɛrusalɛma. Vɔ mbele ɛmɛnyi ande le anto+ wonya ɔnɛ.
32 “Diakɔ dianyewoyaso lokumu l’ɔlɔlɔ lendana la daka diakawalake watshɛso.
33 Nzambi ambodikotsha tshɛ lo tshɛ le so sho anawɔ lo mbolola Yeso,+ oko wakadiafundama l’osambo wa 2 ɔnɛ: ‘Wɛ ekɔ ɔnami; ɛlɔ dimi laya shɔ.’+
34 Ndo woho wakandawolola oma lo nyɔi diaha nde nkalola nto lo ɛhɔndɛlɔ, Nde akate ate: ‘Dimi layonyoka ngandji ka kɔlamelo kakamalake Davidɛ, tɔ kekɔ kɔlamelo.’*+
35 Diakɔ diakandate l’osambo okina ɔnɛ: ‘Wɛ hatetawɔ dia okambi ayɛ wa kɔlamelo mɛna ɛhɔndɛlɔ.’+
36 Davidɛ akakambɛ Nzambi olimu* lo lɔlɔnga lande ko nde akalale djɔ lo nyɔi ndo akakundɛma suke la watshɛnde ko akɛnyi ɛhɔndɛlɔ.+
37 Koko ɔnɛ lele Nzambi akawolola oma lo nyɔi kɔmɛna ɛhɔndɛlɔ.+
38 “Analengo, nyeye nyate, lo tshimbo y’onto ɔsɔ mbambowonyewoya+ edimanyielo ka pɛkato,
39 ndo oma l’akambo tshɛ wele Ɛlɛmbɛ wa Mɔsɛ+ takawakoke nyokonya anto w’ɛlɔlɔ, lo tshimbo y’onto ɔsɔ,+ onto tshɛ lele la mbetawɔ ambɔsama oko onto ɔlɔlɔ.
40 Ɔnkɔnɛ, nyoyalame diaha kɛnɛ kakatama lo Amvutshi nyokomɛ:
41 ‘Nyende, nyu amɔnyɔdi, nyambe ndo nyoshishɔ nɛ dia dimi lekɔ lo nkamba olimu lo nshi yanyu, olimu wele, lo weho akɔ tshɛ nyu hanyotetawɔ oyadi kaanga onto nyɔkɔndɔlɛ kiambokambo tshɛ yendana la wɔ.’”+
42 Lam’akawatombe, anto wakaasɛngasɛnga dia vɔ ndjowatɛ akambo asɔ nto lo Sabato kayela.
43 Ɔnkɔnɛ, l’ɔkɔngɔ w’anto wakasangana lo shinangɔnga mpandjɔ, ase Juda efula ndo ase wedja wakakome ambetawudi wakayele Pɔɔlɔ la Barnabasɛ. Pɔɔlɔ la Barnabasɛ wakaakeketsha lam’akawatɛkɛtaka la wɔ dia vɔ ntshikala lo ɔlɔlɔ waheyama mbɛdika waki Nzambi.+
44 Lo Sabato kakayele, suke l’osomba w’otondo wakasangana dia mboka ɔtɛkɛta wa Jehowa.*
45 Lam’akɛnyi ase Juda elui w’anto, vɔ wakalole la kandjema ko wakatatɛ mɔnyɔla kɛnɛ kakataka Pɔɔlɔ ndo wakɔɔtɛngɛ.+
46 Koko la dihonga tshɛ, Pɔɔlɔ la Barnabasɛ wakawatɛ vate: “Aki ohomba dia ɔtɛkɛta wa Nzambi sambishama ntondo le nyu.+ Koko lam’ele nyu hanyetawɔ ɔtɛkɛta akɔ ndo nyambɛnya dia hanyosungana nkondja lɔsɛnɔ la pondjo, nyolonge, sho tambokadimɔ otsha le ase wedja.+
47 Nɛ dia Jehowa* akatodjangɛ lo mbuta ate: ‘Dimi lakakɔsɔnɛ oko osase wa wedja dia wɛ monga panda polo lo tokoma ta nkɛtɛ.’”+
48 Lam’akoke ase wedja dikambo sɔ, vɔ wakangɛnangɛna ndo wakatombola ɔtɛkɛta wa Jehowa,* ko wanɛ tshɛ waki suke dia mbetawɔ akambo wa mɛtɛ wakonya lo lɔsɛnɔ la pondjo wakakome ambetawudi.
49 Ndo nto, ɔtɛkɛta wa Jehowa* wakatetemala diangana lo wodja w’otondo.
50 Koko, ase Juda wakatɔmbɔsha wamato wa lokumu wakokaka Nzambi wɔma ndo ɛnɛnɛ wa l’osomba, ko vɔ wakatshutshuya anto dia mpɛnyahɛnya+ Pɔɔlɔ la Barnabasɛ ndo wakawatshanya oma lo nkɛtɛ yawɔ.
51 Ɔnkɔnɛ, vɔ wakahomɛ ditshu dia l’ekolo awɔ ko wakatshu l’Ikɔniyo.+
52 Ambeki wakatetemala ndola l’ɔngɛnɔngɛnɔ+ ndo la nyuma k’ekila.
Nɔtɛ ka l'ɛse ka dikatshi
^ Kana “olimu wa lo sɛkɛ.”
^ Kana “akawashaka lonya.”
^ Nguvɛrnɛrɛ ka prɔvɛnsɛ ka la Rɔmɔ. Enda Elembetshielo.
^ Tshɛk., “lɔtɔngɔ.”
^ Kana “osongo.”
^ Kana “diombo diohɔma.”
^ Kana “sunganaka mbɛkɛ otema; k’oshika.”
^ Kana “akakambɛ lolango laki Nzambi.”
