Etsha 14:1-28
14 Lam’aki Pɔɔlɔ la Barnabasɛ l’Ikɔniyo, vɔ tshɛ wakɔtɔ lo shinangɔnga y’ase Juda ndo wakatɛkɛta lo yoho yele leemba la woke l’ase Juda ndo l’ase Ngirika wakakome ambetawudi.
2 Koko ase Juda waki kombetawɔ wakomala ndo wakatshutshuya anto* wa lo wedja dia vɔ tɔmbɔkwɛ anangɛso.+
3 Ɔnkɔnɛ, vɔ wakatshikala etena k’otale laawɔ lo ntɛkɛta la dihonga oma lo wolo wa Jehowa,* ɔnɛ lakewoya ɔtɛkɛta wa ɔlɔlɔ ande waheyama mbɛdika, lo mbetawɔ dia tolembetelo la akambo wa diambo* salema lo tshimbo yawɔ.+
4 Koko leemba l’anto wa l’osomba wakatɔna: Amɔtshi waki lo wedi w’ase Juda ndo akina waki lo wedi w’apɔstɔlɔ.
5 Lam’akayange ase wedja, ase Juda ndo ewandji awɔ dia mbasalɛ akambo l’esehe ndo mbaoka ave+ la ngala tshɛ,
6 vɔ wakoke dui sɔ ndo vɔ wakalawɔ otsha l’osomba wa Lukaoniya, Lustɛra, Dɛrɛbɛ ndo lo ngelo yakasukana la wɔ.+
7 Vɔ wakewoyaka lokumu l’ɔlɔlɔ lɛkɔ.
8 La Lustɛra aki pami kɛmɔtshi kaki ekuse. Nde kɔkɛndakɛndaka ntatɛ lam’akandotɔ.
9 Pami kɛsɔ akahokamɛka etena kakatɛkɛtaka Pɔɔlɔ. Pɔɔlɔ akawende tɛɛ ndo akɛnyi dia nde ekɔ la mbetawɔ kakokande nkɔnɔ,+
10 nde akate la dui dia wolo ate: “Emala lo ekolo ayɛ.” Ko pami kakɔ akemala ndo akatatɛ nkɛndakɛnda.+
11 Lam’akɛnyi elui w’anto kɛnɛ kakasale Pɔɔlɔ, vɔ wakate la dui dia wolo l’ɔtɛkɛta w’ase Lukaoniya vate: “Tozambizambi taya oko anto ndo tamboholɔ le so!”+
12 Vɔ wakatatɛ mbelɛ Barnabasɛ ɔnɛ Zeusɛ ndo Pɔɔlɔ ɔnɛ Hɛrɛmɛsɛ, dikambo Pɔɔlɔ mbakalekaka ntɛkɛta.
13 Ndo ɔlɔmbɛdi wa Zeusɛ wele tɛmpɛlɔ kawɔ kaki la ntondo k’osomba akaye la ngɔmbɛ ndo l’alɛmbɔlɛmbɔ* lo ɛɔtwɛlɔ k’osomba, ndo nde la elui w’anto wakalange mbalambola elambo.
14 Koko lam’akoke ɔpɔstɔlɔ Barnabasɛ nde la ɔpɔstɔlɔ Pɔɔlɔ dikambo sɔ, vɔ wakatshatsha ahɔndɔ awɔ ndo wakatshu la lowango otsha le olui w’anto, wawelɛ vate:
15 “Amɛka, lande na kasalanyu nganɛ? Ndo sho mbele anto wele la wɛɔdu oko nyu.+ Tekɔ lo nyewoya lokumu l’ɔlɔlɔ dia nyu ntshika akambo anɛ w’anyanya ndo nyu nkadimɔ le Nzambi kasɛna, ɔnɛ lakatonge olongo, nkɛtɛ, ndjale ndo diangɔ tshɛ diele lɔkɔ.+
16 Lo nɔnga yakete, nde akatshikaka dia wedja tshɛ ndjela mboka yawɔ,+
17 kaanga mbele, nde kondjatshika aha la djembetelo+ lo woho wakandasale akambo w’ɛlɔlɔ lo nyɔlɔshɛ avula oma l’olongo, lo nyosha deko diangɔnya diangɔ+ ndo lo ndodia etema anyu la mbo ya ndɛ ndo l’ɔngɛnɔngɛnɔ.”+
18 Kaanga mbakawate akambo asɔ, komonga dikambo dia tshitshɛ dia elui w’anto ntshika mbalambola elambo.
19 Koko ase Juda wakaye oma l’Atiyɔka ndo oma l’Ikɔniyo waketawoya elui w’anto,+ ko vɔ wakoke Pɔɔlɔ ave ndo wakatootshika l’andja w’osomba, wafɔnya dia nde ambovɔ.+
20 Koko lam’akakome ambeki lalende, nde aketɔ ndo akakalola l’osomba. La wedi a pindju, nde la Barnabasɛ wakatshu otsha la Dɛrɛbɛ.+
21 L’ɔkɔngɔ wa vɔ mbewoya lokumu l’ɔlɔlɔ l’osomba ɔsɔ ndo mbetɛ anto kambe ambeki, vɔ wakakalola la Lustɛra, l’Ikɔniyo ndo l’Atiyɔka.
22 Vɔ wakakeketsha ambeki*+ ndo wakawaɛnya ohomba wa ntshikala lo mbetawɔ, wata vate: “L’atei w’asui efula+ mbahombaso mbɔtɔ lo Diolelo dia Nzambi.”
23 Ndo nto, vɔ wakasɔnɛ dikumanyi lo etshumanelo+ tshɛ ndo wakasale dɔmbɛlɔ kaamɛ la ekilelo ka mbo ya ndɛ+ ko wakaakitsha l’anya wa Jehowa,* ɔnɛ lakawakome ambetawudi ande.
24 Oma laasɔ, vɔ wakalekana la Pisidiya ko wakakome la Pamufiliya,+
25 ndo l’ɔkɔngɔ wa vɔ mbewoya ɔtɛkɛta wa Nzambi la Pɛrɛnga, vɔ wakaholɔ l’Ataliya.
26 Oma lɛkɔ, vɔ wakatshu lo masuwa l’Atiyɔka lɛnɛ akawataakimɔ lo ɔlɔlɔ waheyama mbɛdika waki Nzambi l’ɔtɛ w’olimu wakawashidiya nkamba.+
27 Lam’akawakome l’Atiyɔka ndo lam’akawasanganya ase etshumanelo, vɔ wakakɔndɔla akambo efula wakasale Nzambi lo tshimbo yawɔ ndo ɔnɛ nde akadiholɛ ase wedja lokuke dia vɔ monga la mbetawɔ.+
28 Ko vɔ wakatshikala etena k’otale kaamɛ la ambeki.
Nɔtɛ ka l'ɛse ka dikatshi
^ Kana “anima w’anto.”
^ Kana “wɛnya kɛnɛ kayosalema lo nshi yayaye.”
^ Kana “olui w’alɛmbɔlɛmbɔ.”
^ Kana “anima w’ambeki.”
