Etsha 15:1-41
15 Apami amɔtshi wakaye oma la Judeya wakatatɛ mbetsha anangɛso vate: “Naka hanyonyisha mpota lo ndjela mbekelo ka Mɔsɛ,+ kete hanyokoke shimbamɛ.”
2 Koko l’ɔkɔngɔ wa Pɔɔlɔ la Barnabasɛ mbidjana taamu ta wolo ndo nkakatana efula la wɔ, wakayɔsaka yɛdikɔ ya Pɔɔlɔ la Barnabasɛ ndo anto akina w’oma l’atei awɔ ntshɔ le apɔstɔlɔ la dikumanyi la Jɛrusalɛma+ dia vɔ towatɛ okakatanu ɔsɔ.*
3 Ɔnkɔnɛ, l’ɔkɔngɔ w’ase etshumanelo mbatshindɛ yema, anto asɔ wakatetemala la lɔkɛndɔ lawɔ lo mbeta oma la Fenikiya ndo la Samariya watakɔndɔlɛ anto akambo tshɛ wendana la woho wakakome ase wedja ambetawudi, ko awui asɔ wakashaka anangɛso tshɛ ɔngɛnɔngɛnɔ w’efula.
4 Lam’akawakome la Jɛrusalɛma, ase etshumanelo, apɔstɔlɔ ndo dikumanyi wakaalongola dimɛna ko vɔ wakaakɔndɔlɛ akambo efula wakasale Nzambi lo tshimbo yawɔ.
5 Koko, anto amɔtshi w’oma lo yaato y’ɔtɛmwɛlɔ y’Afarisɛ wakakome ambetawudi wakemala oma l’ahole wakawadjasɛ ndo wakate vate: “Ekɔ ohomba minya anto asɔ mpota ndo mbadjangɛ dia vɔ nkitanyiya Ɛlɛmbɛ wa Mɔsɛ.”+
6 Ko apɔstɔlɔ la dikumanyi wakasangana dia nsɛdingola dikambo sɔ.
7 L’ɔkɔngɔ wa vɔ nkɛtshanya* efula, Petero akemala ndo akawatɛ ate: “Analengo, nyu mbeyaka dimɛna dia oma ko etatelo, Nzambi akansɔnɛ oma l’atei anyu dia ase wedja woke ɔtɛkɛta wa lokumu l’ɔlɔlɔ oma l’onyɔ ami ndo wonge la mbetawɔ.+
8 Nzambi leya otema+ akɛnya dia nde ambowaetawɔ lo mbasha nyuma k’ekila+ oko wakandatosha ndo sho.
9 Nde hasale ndooko otshikitanu lam’asaso la wɔ,+ koko nde akɛdia etema awɔ l’ekimanyielo ka mbetawɔ.+
10 Ko lande na konyodja Nzambi l’ohemba lo mbidja lo nkingo y’ambeki lɔkɔhɔ+ lele watshɛso kana shoamɛ kokoka mɛmba?+
11 Koko, oko weso la mbetawɔ dia shimbamɛ oma lo ɔlɔlɔ waheyama mbɛdika wa Nkumɛso Yeso,+ mbele ndo anto asɔ la mbetawɔ.”+
12 Ko olui w’anto tshɛ wakatshikala ki ndo wakatatɛ mpokamɛ etena kakaakɔndɔlɛka Barnabasɛ nde la Pɔɔlɔ tolembetelo ndo akambo efula wa diambo* wakasalɛ Nzambi ase wedja lo tshimbo yawɔ.
13 L’ɔkɔngɔ wa vɔ nshidiya ntɛkɛta, Jakɔba akate ate: “Analengo, nyompokame.
14 Simɛyɔna+ akakɔndɔla dimɛna woho wakadje Nzambi ase wedja yimba mbala ka ntondo dia nsɔna anto amɔtshi oma l’atei awɔ dikambo dia lokombo lande.+
15 Ndo dui sɔ mbɔtɔnɛka l’ɛtɛkɛta w’Amvutshi, oko wofundamidiɔ ɔnɛ:
16 ‘L’ɔkɔngɔ w’akambo asɔ, dimi layokalola ndo layonyiya nto luudu la dipɛma* la Davidɛ lakanyukɔ, dimi layoka nto ahole wakalana ndo layolionyiya nto
17 dia atshikadi nyanga Jehowa* l’otema ɔtɔi, kaamɛ l’anto wa lo wedja tshɛ welamɛ lo lokombo lami, mbata Jehowa,* ɔnɛ lasala dia akambo anɛ+
18 mbeyama ntatɛ oma ko nshi y’edjedja.’+
19 Ɔnkɔnɛ, yɛdikɔ* yami ele diaha mɛnya ase wedja wanɛ wakadimɔ le Nzambi paa,+
20 koko towafundee dia vɔ nsɛka diangɔ diakadjama mindo oma le dikishi,+ awui wa mindo wa dieyanelo,*+ nyama y’esena* ndo dikila.+
21 Nɛ dia oma ko nshi y’edjedja, anto wekɔ lo nsambisha awui wendana la Mɔsɛ lo osomba l’osomba nɛ dia lushi la sabato+ tshɛ vɔ wekɔ lo mbadia awui akɔ la dui dia wolo lo toshinangɔnga.”
22 Ɔnkɔnɛ, apɔstɔlɔ la dikumanyi kaamɛ la etshumanelo k’otondo wakɔshi yɛdikɔ ya nsɔna anto amɔtshi oma l’atei awɔ ndo mbatoma kaamɛ la Pɔɔlɔ la Barnabasɛ l’Atiyɔka. Vɔ wakatome Judasɛ lakelamɛka nto Barasaba la Silasɛ,+ apami wakalɔmbɔlaka anangɛso.
23 Vɔ wakawasha mukanda wakawafunde vate:
“Sho anangɛnyu, apɔstɔlɔ ndo dikumanyi tambonyotomɛ nyu anangɛso w’ase wedja wa l’Atiyɔka,+ wa la Suriya ndo wa la Kilikiya mɔyɔ!
24 Lam’ele takoke dia anto amɔtshi w’oma l’atei aso wakanyɛnya paa oma lo kɛnɛ kakawetshaka+ lo nyanga dia nyonganyiya* kaanga mbele sho kombatɛ ndooko dui,
25 sho tshɛ kaamɛ tambɔsa yɛdikɔ ya nsɔna apami amɔtshi dia nyotomɛwɔ kaamɛ la anangɛso wa ngandji Barnabasɛ nde la Pɔɔlɔ,
26 apami wakakimɔ nsɛnɔ* yawɔ dikambo dia lokombo la Nkumɛso Yeso Kristo.+
27 Ɔnkɔnɛ, tambotoma Judasɛ nde la Silasɛ dia ndo vɔ lawɔ ndjonyotɛ akambo akɔ l’onyɔ.+
28 Nɛ dia nyuma k’ekila+ ndo shoamɛ tambɛna dia bu ohomba nyahatanyɛ wotsho laadiko di’akambo w’ohomba anɛ:
29 Nyɔsɛkɛ diangɔ diakawalambola dikishi,+ dikila,+ nyama y’esena*+ ndo awui wa mindo wa dieyanelo.*+ Naka nyu ndjalama dimɛna l’akambo asɔ, kete nyayohama. Nyolongole mɔyɔ!”
30 Ɔnkɔnɛ, lam’akawalakana la wɔ, apami asɔ wakaholɔ otsha l’Atiyɔka ndo wakatshumanya olui w’anto ko wakawasha mukanda.
31 L’ɔkɔngɔ wa vɔ mbadia mukanda akɔ, vɔ wakangɛnangɛna l’ɔtɛ w’ekeketshelo kaki lɔkɔ.
32 Ndo lam’ele Judasɛ la Silasɛ waki ndo amvutshi, vɔ wakakimanyiya anangɛso lo mbisha asawo efula ndo lo mbakeketsha.+
33 L’ɔkɔngɔ wa vɔ mbetsha etena kɛmɔtshi lɛkɔ, anangɛso wakaakɛndja dia vɔ nkalola la ki otsha le wanɛ wakaatome.
34 *——
35 Koko Pɔɔlɔ la Barnabasɛ wakatshikala l’Atiyɔka wetsha ndo wasambisha kaamɛ l’anto akina efula lokumu l’ɔlɔlɔ lendana la ɔtɛkɛta wa Jehowa.*
36 L’ɔkɔngɔ wa nshi mɔtshi, Pɔɔlɔ akatɛ Barnabasɛ ate: “Kakianɛ* tokalole totende anangɛso wa l’esomba tshɛ wakatasambisha ɔtɛkɛta wa Jehowa* dia teya woho wewɔ.”+
37 Barnabasɛ akasale tshɛ dia ntshɔ la Joani lakelamɛka nto Makɔ.+
38 Koko Pɔɔlɔ kɔmɛna dimɛna dia Makɔ ntshɔ la wɔ, lam’ele nde akataatshika lam’akiwɔ la Pamufiliya ndo nde kombatshindɛ l’olimu.+
39 L’ɔtɛ wa dikambo sɔ, vɔ wakokana nkɛlɛ k’efula. Ɔnkɔnɛ vɔ wakakakitɔna, Barnabasɛ+ akɔshi Makɔ ko akatshu la nde lo masuwa otsha la Kupiro.
40 Pɔɔlɔ akasɔnɛ Silasɛ ko wakatshu, l’ɔkɔngɔ w’anangɛso mbokimɔ lo ɔlɔlɔ waheyama mbɛdika waki Jehowa.*+
41 Nde akete la Suriya ndo la Kilikiya atakeketsha tshumanelo.
Nɔtɛ ka l'ɛse ka dikatshi
^ Kana “owanu ɔsɔ.”
^ Kana “nkakatana efula.”
^ Kana “wɛnya kɛnɛ kayosalema lo nshi yayaye.”
^ Kana “tshombotombo; luudu.”
^ Kana “kanyi.”
^ Kana “yodiakemi aha la nsedia dikila diayɔ.”
^ Grɛkɛ, por·neiʹa. Enda Elembetshielo.
^ Kana “anima anyu.”
^ Kana “anima.”
^ Grɛkɛ, por·neiʹa. Enda Elembetshielo.
^ Kana “yodiakemi aha la nsedia dikila diayɔ.”
^ Kana ondo “aha la ntshimbatshimba.”
