Etsha 18:1-28
18 L’ɔkɔngɔ wa laasɔ, Pɔɔlɔ akamɔ oma l’Atɛna ko akatshu la Kɔrɛtɔ.
2 Nde akatane ose Juda ɔmɔtshi lokombo lande Akula+ nde la wadɛnde Piriskila. Akula aki ose Poto laki eke kandja l’Itali, nɛ dia Klodiyo akadjanga dia ase Juda tshɛ mimɔ oma la Rɔmɔ. Ɔnkɔnɛ, nde akatshu le wɔ,
3 ndo lam’ele nde akakambaka olimu waamɛ la wɔ, nde akatshikala lakawɔ ko vɔ wakakambaka kaamɛ,+ nɛ dia vɔ wakasalaka mvudu y’apɛma.
4 Nde akashaka sawo* lo shinangɔnga+ lushi la sabato+ tshɛ ndo aketawoyaka ase Juda ndo ase Ngirika.
5 Lam’akaholɔ Silasɛ+ la Timɔte+ oma la Makɛdɔniya, Pɔɔlɔ akatatɛ ndjasha tshɛ lo ɔtɛkɛta wa Nzambi, asambisha ase Juda dia mbashikikɛ dia Yeso kele Kristo.+
6 Koko lam’ele vɔ wakatetemala mbɔlɔsha ndo ntɛkɛta kɔlɔ lo lokombo lande, nde akanyinginya ahɔndɔ ande+ ndo akawatɛ ate: “Dikila dianyu diayale l’ɛtɛ anyu nyuamɛ.+ Dimi keema l’onongo.+ Ntatɛ oma ko kakianɛ, dimi layanga ntshɔ le ase wedja.”+
7 Ko nde akamɔ oma lɛkɔ,* akatshu lo luudu la pami kɛmɔtshi kakatɛmɔlaka Nzambi, lokombo lande Titiyo Jusito ɔnɛ lele luudu lande laki suke la shinangɔnga.
8 Krispo,+ owandji wa shinangɔnga akakome ombetawudi lo Nkumadiɔndjɔ nde la ase luudu lande tshɛ. Ase Kɔrɛtɔ efula wakahokamɛ waketawɔ ndo wakabatizama.
9 Ndo nto l’otsho, Nkumadiɔndjɔ akatɛ Pɔɔlɔ lo ɛnɛlɔ ate: “Tokake wɔma, tetemala ntɛkɛta ndo tɔlɛmbɔhalake,
10 nɛ dia dimi lekɔ kaamɛ la yɛ+ ndo ndooko onto layokɔlɔsha dia kosalɛ kɔlɔ, dikambo dimi lekɔ l’anto efula l’osomba ɔnɛ.”
11 Ɔnkɔnɛ, nde akatshikala lɛkɔ ɔnɔnyi la ngɔndɔ 6, awaetsha ɔtɛkɛta wa Nzambi.
12 Etena kaki Ngaliyo prɔkɔsilɛ* ka Akaya, ase Juda wakatɔmbɔkwɛ Pɔɔlɔ ko wakatshu la nde lo dihole dia kilombo,
13 wata vate: “Onto ɔnɛ ekɔ lo mbetawoya anto dia vɔ ntɛmɔla Nzambi lo yoho yotshikitanyi la ɛlɛmbɛ.”
14 Koko lam’akalange Pɔɔlɔ ntɛkɛta, Ngaliyo akatɛ ase Juda ate: “Ase Juda le, otondongaka onongo ɔmɔtshi mbokongodinde kana dikambo dia kɔlɔ efula mbosadinde, tshike lotonga l’ɛkɔkɔ w’eshika wa nyohokamɛ la solo dia lotutsha tshɛ.
15 Ko naka ekɔ dikambo dia otshikitanu wa tɔtɛkɛta, wa nkombo ndo w’ɛlɛmbɛ anyu,+ kete nyuamɛ nyende dikambo sɔ. Dimi haalange monga shushi y’akambo asɔ.”
16 Ko nde akawatshanya oma lo dihole dia kilombo.
17 Vɔ tshɛ wakande Sostɛnɛ+ laki owandji wa shinangɔnga, ko wakatatɛ mbɔkɔmɔla mbɛlɛnganɛ la dihole dia kilombo. Koko Ngaliyo kondjatambiya lo akambo asɔ.
18 L’ɔkɔngɔ wa nde ntshikala nshi mɔtshi, Pɔɔlɔ akalakana l’anangɛso, ko akatshu lo masuwa otsha la Suriya kaamɛ la Piriskila nde la Akula. Nde akatanyisha divo la Kɛnɛkɛrɛya,+ nɛ dia nde akatshike dɔkɔlɔkɔ.
19 Ɔnkɔnɛ, vɔ wakakome l’Ɛfɛsɔ ko nde akaatshike lɛkɔ, koko nde akɔtɔ lo shinangɔnga ndo akakanaka yimba l’ase Juda.+
20 Kaanga mbakawatetemalaka mbɔlɔmba dia nde nyomotshikala la wɔ nshi efula, nde kombetawɔ,
21 nde akalakana la wɔ ndo akawatɛ ate: “Layokalola le nyu nto naka Jehowa* alanga.” Ko nde akamɔ oma l’Ɛfɛsɔ lo mbeta lo ndjale
22 ndo akakome la Kayisariya. Nde akadɛ,* akasha ase etshumanelo mɔyɔ ko akaholɔ otsha l’Atiyɔka.+
23 L’ɔkɔngɔ wa nde mbetsha nshi mɔtshi lɛkɔ, nde akatshu ndo akatetetaka lo dihole la dihole l’ɛtshi ka nkɛtɛ ka la Ngalatiya ndo ka la Firingiya+ atakeketsha ambeki tshɛ.+
24 Ose Juda ɔmɔtshi lokombo lande Apolo+ lakotɔ l’Alɛksandriya akakome l’Ɛfɛsɔ. Nde aki la yimba efula ndo akayashaka tshɛ l’Afundelo.
25 Pami kɛsɔ aketshama* mboka ka Jehowa* ndo lam’ele nde ‘akahɛtahɛtaka la nyuma,’ nde akatɛkɛtaka ndo aketshaka akambo wendana la Yeso woho wewɔ mɛtɛ, koko nde akeyaka paka batisimu ka Joani.
26 Nde akatatɛ ntɛkɛta la dihonga tshɛ lo shinangɔnga ndo lam’akoke Piriskila la Akula+ kɛnɛ kakandataka, vɔ wakawɔshi ndo wakoolembetshiya mboka ka Nzambi woho wetɔ mɛtɛ.
27 Ndo nto, lam’ele nde akalange ntenyanya otsha la Akaya, anangɛso wakafundɛ ambeki wa lɛkɔ mukanda dia mbakeketsha dia vɔ mbolongola dimɛna. Ɔnkɔnɛ, lam’akandakome lɛkɔ, nde akakimanyiya lo yɛdikɔ y’efula wanɛ wakakome ambetawudi lo tshimbo ya ɔlɔlɔ waheyama mbɛdika waki Nzambi,
28 nɛ dia la dihonga tshɛ ndo lo sɛkɛ, nde akɛnyaka dia ase Juda waki lo dindja, awaɛnya oma l’Afundelo dia Yeso mbele Kristo.+
Nɔtɛ ka l'ɛse ka dikatshi
^ Kana “Nde akakanaka la wɔ yimba.”
^ Mbuta ate shinangɔnga.
^ Nguvɛrnɛrɛ ka prɔvɛnsɛ ka la Rɔmɔ. Enda Elembetshielo.
^ Ondo otsha la Jɛrusalɛma.
^ Kana “aketshama la onyɔ.”
