Etsha 19:1-41
19 Oma laasɔ, etena kaki Apolo+ la Kɔrɛtɔ, Pɔɔlɔ akete lo lɛkɛ l’akona ko nde akakome l’Ɛfɛsɔ.+ Nde akatane ambeki amɔtshi lɛkɔ
2 ndo akawambola ate: “Onde nyakalongola nyuma k’ekila lam’akanyakome ambetawudi?”+ Vɔ wakawotɛ vate: “Ndooko, sho tatokaka dia nyuma k’ekila kekɔ.”
3 Ko nde akate ate: “Ko batisimu ka ngande kakanyabatizama?” Vɔ wakawotɛ vate: “Batisimu ka Joani.”+
4 Pɔɔlɔ akate ate: “Joani akabatizaka anto batisimu ka djembetelo ya ndjatshumoya,+ atɛ anto dia vɔ monga la mbetawɔ le ɔnɛ lakahombe ndja l’ɔkɔngɔ ande,+ mbuta ate Yeso.”
5 Lam’akawoke ngasɔ, vɔ wakabatizama lo lokombo la Nkumadiɔndjɔ Yeso.
6 Ndo lam’akahɛ Pɔɔlɔ ambeki asɔ anya, nyuma k’ekila kakaholɔ le wɔ+ ko vɔ wakatatɛ ntɛkɛta l’ɛtɛkɛta ekina ndo wakatatɛ mbuta prɔfɛsiya.+
7 Vɔ tshɛ waki apami oko 12.
8 Nde akɔtɔka lo shinangɔnga+ ndo akatɛkɛtaka la dihonga tshɛ l’edja ka ngɔndɔ 3, asha asawo ndo akamba la yoho y’ekanelo ka yimba yetawoya lo kɛnɛ kendana la Diolelo dia Nzambi.+
9 Koko, lam’akakeketsha anto amɔtshi etema diaha mbetawɔ,* watɛkɛta kɔlɔ lo dikambo dia Mboka+ la ntondo ka olui w’anto, nde akamɔ oma le wɔ+ ndo akakakitola ambeki la wɔ ndo nde akashaka asawo lushi la lushi lo luudu la kalasa ya Tirano.
10 Dikambo sɔ diakasalema l’edja k’ɛnɔnyi 2 dia anto tshɛ waki lo prɔvɛnsɛ ka Aziya, oyadi ase Juda kana ase Ngirika mboka ɔtɛkɛta wa Nkumadiɔndjɔ.
11 Nzambi akatetemala nsala akambo wa diambo lo tshimbo y’anya wa Pɔɔlɔ,+
12 diakɔ diele anto wakatɔlaka oyadi ahɔndɔ kana ahɔndɔ w’olimu wakasakana la demba diande le ɛkɔnyi,+ ko ɛkɔnyi wakakɔnɔka ndo ɛdiɛngɛ wakatombaka.+
13 Koko ase Juda amɔtshi waketetaka dia tatondjaka ɛdiɛngɛ wakahembe nkamba vɔ lawɔ la lokombo la Nkumadiɔndjɔ Yeso le wanɛ waki l’ɛdiɛngɛ, wata vate: “Lambokodjangɛ lo lokombo la Yeso, ɔnɛ lele Pɔɔlɔ ekɔ lo nsambisha.”+
14 L’etena kɛsɔ, ana 7 waki owandji ɔmɔtshi w’ɛlɔmbɛdi w’ose Juda, lokombo lande Skeva wakasalaka dikambo sɔ.
15 Koko ɔdiɛngɛ akawatɛ ate: “Dimi mbeyaka Yeso+ ndo dimi mbeyaka Pɔɔlɔ,+ ko nyu waa na wenyu?”
16 Ko pami kakɔ kaki l’ɔdiɛngɛ akakungusɔ oya le wɔ, akawande ɔtɔi ɔtɔi, akaaleke wolo ko wakalawɔ oma lo luudu lakɔ etakataka, wele la mpota.
17 Dikambo sɔ diakeyama le anto tshɛ, oyadi ase Juda kana ase Ngirika waki l’Ɛfɛsɔ, ko vɔ tshɛ wakandama la wɔma ndo wakatombolaka lokombo la Nkumadiɔndjɔ Yeso.
18 Efula k’anto wakakome ambetawudi wakayaka ndjoshola kɔlɔ yawɔ ndo wakataka hwe hwe kɛnɛ kakawasalaka.
19 Lo mɛtɛ, anto efula wakasalaka akambo wa maji wakatshumanya abuku awɔ ndo wakaatshumbe la ntondo k’anto tshɛ.+ Vɔ wakakambe akumi dia mbeya oshinga w’abuku asɔ ndo wakɛnyi dia aki falanga ya mfɛsa nunu akumi atanu (50 000).
20 Ɔnkɔnɛ, ɔtɛkɛta wa Jehowa* wakatatetemalaka mpama ndo nkeketala lo yoho ya wolo.+
21 L’ɔkɔngɔ w’akambo asɔ salema, Pɔɔlɔ akɔshi yɛdikɔ lo yimba yande dia l’ɔkɔngɔ wa nde mbeta la Makɛdɔniya+ ndo la Akaya, nde pombaka ntshɔ la Jɛrusalɛma.+ Nde akate ate: “L’ɔkɔngɔ wa dimi ntshɔ lɛkɔ, dimi pombaka tɛna ndo Rɔmɔ.”+
22 Ɔnkɔnɛ, nde akatome Timɔte+ la Erasto+ anto 2 oma l’atei wa wanɛ wakookimanyiyaka otsha la Makɛdɔniya, koko ndamɛ akatshikala lo tshanda mɔtshi lo prɔvɛnsɛ ka Aziya.
23 L’etena kɛsɔ, ofukutanu+ wa wolo wakatombe lo kɛnɛ kendana la Mboka.+
24 Nɛ dia pami kɛmɔtshi, lokombo lande Dɛmɛtɛriyo, akakambaka la mfɛsa dia nsala diangɔ diaki oko tɛmpɛlɔ ka Artɛmi, jambizambi ya womoto, ndo olimu ɔsɔ waki la wahɔ efula le etshudi.+
25 Nde akatshumanya etshudi w’asekande ndo wanɛ tshɛ wakasalaka diangɔ dia woho ɔsɔ ko akawatɛ ate: “Amɛka, nyu mbeyaka dimɛna dia oma l’olimu ɔnɛ mbeso la ɔngɔnyi.
26 Ndo nto, nyekɔ lo mɛna ndo nyekɔ lo mboka woho wele aha l’Ɛfɛsɔ+ oto, koko ndo suke la prɔvɛnsɛ k’otondo ka Aziya mbele Pɔɔlɔ nyɛ ambetawoya olui w’anto ndo ambaatshikitanya kanyi yawɔ lo mbuta dia nzambi yasalema la anya bu mɛtɛ nzambi.+
27 Ndo waale okina ele, aha tsho olimu aso wayoshila nɛmɔ, koko ndo tɛmpɛlɔ ka Artɛmi, nzambi kaso ka womoto ka wolo kayɔsama oko ɛngɔ k’anyanya ndo kaanga lotombo lande lele prɔvɛnsɛ ka Aziya ndo nkɛtɛ k’otondo wekɔ lo litɛmɔla lekɔ suke la mbɔtɔ l’ashi.”
28 Lam’akawoke akambo asɔ, vɔ wakadunganɛ la nkɛlɛ ndo wakatatɛ mpangɔhangɔ vate: “Artɛmi kele nzambi ka wolo k’ase Ɛfɛsɔ!”
29 Ko lofunge la mamba lakɔtɔ l’osomba ndo vɔ tshɛ kaamɛ wakalawɔ otsha lo dihole dia tɔkɛnyɔ ndo wakande Ngayo nde la Aristarako,+ ase Makɛdɔniya wakatatshindɛka Pɔɔlɔ, ko wakatshu la wɔ la wolo.
30 Pɔɔlɔ lo wedi ande, akalange dia ntshɔ l’atei w’olui w’anto, koko ambeki wakooshimbe.
31 Kaanga ɛnɔmbɔdi ɛmɔtshi wa fɛtɛ ndo wa tɔkɛnyɔ wakokanaka la nde wakootomɛ dui ndo wakɔɔsɛngasɛnga diaha nde ndjadja lo waale lo ntshɔ lo dihole dia tɔkɛnyɔ.
32 Lo mɛtɛ, anto amɔtshi wakahangɔhangɔka, wanɛ wata akambo akina ndo anto akina wata akambo akina, nɛ dia leemba l’anto waki l’ofukutanu ndo efula ka l’atei awɔ kombeyaka lande na kakawasangana.
33 Ko vɔ wakatondja Alɛksandɛrɛ oma l’atei w’olui w’anto ndo ase Juda wakootshindjiya otsha la ntondo, ko Alɛksandɛrɛ akawaɛnya la lonya dia vɔ mbɔlama ndo akalangaka ndjaswɛ la ntondo k’anto.
34 Koko lam’akaweye dia nde ekɔ ose Juda, vɔ tshɛ kaamɛ wakahangɔhangɔka la dui dia wolo l’edja ka wenya wa ntango oko 2 ɔnɛ: “Artɛmi kele nzambi ka wolo k’ase Ɛfɛsɔ!”
35 Lam’akayɔladiaka ofundji wa l’osomba olui w’anto, nde akate ate: “Ase Ɛfɛsɔ le, onto akɔna mɛtɛ lele lanɛ l’atei w’anto laheye dia osomba w’Ɛfɛsɔ kalama tɛmpɛlɔ ka Artɛmi, nzambi ka wolo la lohingu lakakɔ oma l’olongo?
36 Lam’ele ndooko lakoka mbidja taamu l’akambo asɔ, nyu pombaka mbɔlama ndo aha nsala akambo la ekombakomba.
37 Nɛ dia nyu nyakaye la apami anɛ wele bu anto wava diangɔ lo tɛmpɛlɔ kana watɛnga nzambi kaso ka womoto.
38 Ɔnkɔnɛ, naka Dɛmɛtɛriyo+ nde l’asekande etshudi wekɔ la dikambo dimɔtshi dia mfunda onto ɔmɔtshi, nshi ya dombo yekɔ ndo prɔkɔsilɛ* yekɔ. Ɔnkɔnɛ watofundane le wɔ.
39 Ko naka dikambo dikina mbayanganyu oma laasɔ, kete diɔ pombaka kandɔma lo nsanganya ya mbala la mbala.
40 Nɛ dia lo mɛtɛ, tekɔ lo waale wa fundama ɔnɛ tekɔ lo ntɔmbɔsha anto l’ɔtɛ wa dikambo diambotomba ɛlɔ, nɛ dia ndooko ɔkɔkɔ watosha lotshungɔ la sho ntshumanya anto wadja lofunge la nganɛ.”
41 L’ɔkɔngɔ wa nde mbuta akambo asɔ, nde akahandjola olui w’anto wakasangana.
Nɔtɛ ka l'ɛse ka dikatshi
^ Kana “wakayaetɛ wolo ndo kombetawɔka.”
^ Prɔkɔsilɛ aki nguvɛrnɛrɛ ka prɔvɛnsɛ ka la Rɔmɔ. Enda Elembetshielo.
