Etsha 2:1-47
2 Lushi la Fɛtɛ ka Pɛntɛkɔsta,+ vɔ tshɛ wakasangana lo dihole 1,
2 ndo mbala kakɔ ɔtɔi, londjo lakokɛma oma l’olongo oko watɔpɛpaka lɔpɛpɛ la wolo ndo lakalole lo luudu l’otondo lakawadjasɛ.+
3 Ndo nemi yele oko ya dja yakɛnama le wɔ ndo yakakahanyema, ko yakahema onto tshɛ la l’atei awɔ,
4 ko vɔ tshɛ wakalodiama la nyuma k’ekila+ ndo wakatatɛ ntɛkɛta lo ɛtɛkɛta ekina oko wakaakimanyiya nyuma dia vɔ ntɛkɛta.+
5 L’etena kɛsɔ, ase Juda wakokaka Nzambi wɔma w’oma lo wedja tshɛ wa l’ɛse olongo waki la Jɛrusalɛma.+
6 Ɔnkɔnɛ, lam’akokɛ londjo lɔsɔ, olui w’anto wakatshumana ndo vɔ wakaambe, nɛ dia onto l’onto akawaokaka watɛkɛta l’ɔtɛkɛta ande wa lootɔ.
7 Lo mɛtɛ, vɔ wakaambe efula ndo wakate vate: “Ohonyenda, shi anto anɛ tshɛ watɛkɛta wekɔ ase Ngalileya?+
8 Ko woho akɔna wele onto l’onto l’atei aso ekɔ lo mboka ɔtɛkɛta ande wa lootɔ?
9 Sho ase Paratiya, ase Mediya,+ ase Elama,+ ase Mezɔpɔtamiya, ase Judeya, ase Kapadɔsɛ, ase Poto, ase prɔvɛnsɛ ka Aziya,+
10 ase Firingiya, ase Pamufiliya, ase Edjibito, ase ɛtshi ka nkɛtɛ ka Libiya kele suke la Kurɛnɛ, angɛndangɛnda w’oma la Rɔmɔ wele lanɛ, oyadi ase Juda kana ase wedja wakakome ambetawudi,+
11 ase Kɛrɛtɛ ndo ase Arabiya, tekɔ lo mbaoka watɛkɛta akambo wa diambo waki Nzambi lo ɛtɛkɛta aso.”
12 Eelo, vɔ tshɛ wakaambe ndo wakatshikala l’okandokando watanɛ lam’asawɔ vate: “Diakɔna nɛ?”
13 Koko anto akina wakawaɔlaka ndo wakate vate: “Vɔ wambodjɔ wanu wa mpɛ.”*
14 Ko Petero akemala nde l’apɔstɔlɔ akina 11+ ndo nde akawatɛ la dui dia wolo ate: “Nyu ase Judeya ndo ase Jɛrusalɛma tshɛ, nyeye ndo nyohokame dimɛna kɛnɛ kayangami mbuta.
15 Lo mɛtɛ, anto anɛ hawodjwe wanu oko wafɔnyanyu, nɛ dia teke wonya wa 3.*
16 Koko kɛnɛ kɛnanyu kakatatami lo tshimbo y’omvutshi Jɔɛlɛ ɔnɛ:
17 ‘Nzambi ate: “Lo nshi y’ekomelo, dimi layotshola nyuma kami le weho w’anto tshɛ, ko ananyu w’apami l’ananyu wa wamato wayota prɔfɛsiya ndo ɛlɔngɔ anyu w’apami wayɛna waɛnɛlɔ ndo esombe anyu wayɛna alɔ.+
18 Ndo kaanga le ekambi ami w’apami ndo wa wamato, dimi layotshola nyuma kami lo nshi shɔ, ko vɔ wayota prɔfɛsiya.+
19 Ndo dimi layɛnya akambo wa diambo* l’olongo ndo tolembetelo la nkɛtɛ, dikila, dja ndo wange w’edinga.
20 Wonya wayokadimɔ wodjima ndo ngɔndɔ kayokadimɔ dikila la ntondo ka lushi la woke ndo la diambo la Jehowa* ndja.
21 Ndo onto tshɛ lelɛ* lokombo la Jehowa* ayoshimbamɛ.”’+
22 “Ase Isariyɛlɛ le, nyohokame ɛtɛkɛta ɛnɛ: Yeso y’ose Nazarɛtɛ, aki pami kele Nzambi akanyɛnyande lo sɛkɛ lo tshimbo y’ahindo, akambo wa diambo, akambo wa mamba* la tolembetelo takasale Nzambi lo tshimbo yande l’atei anyu+ oko wadieyanyu nyuamɛ.
23 Pami kɛsɔ akakimɔma le atunyi ande. Nzambi+ akashikikɛ dikambo* sɔ ndo akadieyaka la ntondo. Nyu nyakoohanɛ l’otamba lo tshimbo y’anya w’amɔnyɔdi w’ɛlɛmbɛ ndo nyu nyakoodiake.+
24 Nzambi akootshungola oma lo kandji* ka nyɔi lo mboolola,+ dikambo tɔ kokoka mbokimɛ.+
25 Nɛ dia Davidɛ akate lo dikambo diande ate: ‘Dimi mbetɛka Jehowa* wonya tshɛ la ntondo kami,* nɛ dia nde ekɔ lo lonya lami l’omi diaha dimi sutshasutshama.
26 Diakɔ diele otema ami wambolola tɔɔ l’ɔngɛnɔngɛnɔ ndo lolemi lami lambɔngɛnangɛna efula. Ndo dimi* layongaka lo elongamelo;
27 nɛ dia wɛ hatontshika* lo Diombo* ndo wɛ hatetawɔ di’okambi ayɛ wa kɔlamelo mɛna ɛhɔndɛlɔ.+
28 Wɛ akamɛnya mboka ka lɔsɛnɔ ndo wɛ ayondodia l’ɔngɛnɔngɛnɔ w’efula laleyɛ.’*+
29 “Analengo le, sunganaka nyotɛ awui hwe hwe lo kɛnɛ kendana la owandji wa nkumbo Davidɛ: Nde akavu, wakookundɛ+ ndo diombo diande diekɔ kaamɛ la so polo ndo ɛlɔ.
30 Lam’ele nde aki omvutshi ndo akeyaka dia Nzambi akatshibe ndo akatshike dɔkɔlɔkɔ dia mbidjashiya kanula* yande mɔtshi lo kiti ka lowandji,+
31 nde akɛnyi la ntondo ko akatɛkɛta dikambo dia eolwelo ka Kristo dia Nzambi hatowotshika lo Diombo* ndo demba diande hadiotɛna ɛhɔndɛlɔ.+
32 Nzambi akolola Yeso yakɔ ndo sho tshɛ tekɔ ɛmɛnyi+ wa dikambo sɔ.
33 Ɔnkɔnɛ, lam’ele nde akadiyama lo lonya l’omi la Nzambi+ ndo akalongola nyuma k’ekila kakoolake She,+ nde ambotshola kɛnɛ kɛnanyu ndo kokanyu.
34 Nɛ dia Davidɛ kombidɛ l’olongo, koko ndamɛ akate ate: ‘Jehowa* akatɛ Nkumɛmi ate: “Djasɛ lo lonya lami l’omi
35 polo lam’ayomokitsha atunyi ayɛ oko kihona k’ekolo ayɛ.”’+
36 Ɔnkɔnɛ, luudu l’Isariyɛlɛ l’otondo leye lo mɛtɛ dia Nzambi aketɛ Yeso lakanyadiake l’otamba+ Nkumadiɔndjɔ+ ndo Kristo.”
37 Lam’akawoke akambo asɔ, etema awɔ wakanandema ndo vɔ wakatɛ Petero l’apɔstɔlɔ akina vate: “Ko ahombaso nsala na, anangɛso?”
38 Petero akawatɛ ate: “Nyoyatshumoya+ ndo onto l’onto abatizame+ lo lokombo la Yeso Kristo dikambo dia edimanyielo ka pɛkato yanyu,+ ko nyayolongola losha la woshasha wa nyuma k’ekila.
39 Nɛ dia daka+ diekɔ dikambo dianyu, di’ananyu, di’anto tshɛ wele etale ndo di’anto efula wele Jehowa* Nzambi kaso ayowaelɛ le nde.”+
40 Ndo la ɛtɛkɛta ekina efula, nde akasambishaka dimɛna dimɛna ndo akaakeketshaka, ata ate: “Nyoyashimbee oma lo lɔlɔnga lɔnɛ la kɔlɔ.”+
41 Ko wanɛ waketawɔ ɛtɛkɛta ande l’ɔngɛnɔngɛnɔ wakabatizama+ ndo lushi lɔsɔ anto* oko nunu sato (3 000) wakakotshama.+
42 Vɔ wakatetemalaka ndjasha tshɛ lo wetshelo w’apɔstɔlɔ, lo monga kaamɛ lam’asawɔ, lo oleelo+ ndo l’alɔmbɛlɔ.+
43 Ko anto* tshɛ wakandama la wɔma, nɛ dia akambo wa diambo* efula ndo tolembetelo takatatɛ salema lo tshimbo y’apɔstɔlɔ.+
44 Anto tshɛ wakakome ambetawudi waki kaamɛ ndo wakasanganyaka diangɔ tshɛ kaamɛ.
45 Vɔ wakasondjaka dikambɔ diawɔ la diangɔ diawɔ+ ndo wakakahanaka kɛnɛ kakawakondjaka lo ndjela ehomba w’onto l’onto.+
46 Ndo lushi la lushi, vɔ wakasanganaka lo tɛmpɛlɔ l’oyango waamɛ ndo vɔ wakalɛka lo mvudu yotshikitanyi ndo wakakahanaka mbo ya ndɛ l’ɔngɛnɔngɛnɔ w’efula ndo l’otema ɔtɔi,
47 wakatombolaka Nzambi ndo wakahomɔka lokolo l’ɔlɔ lo washo w’anto tshɛ. L’etena kakɔ kaamɛ, Jehowa* akatetemalaka mbakotshɛ lushi la lushi wanɛ wakashimbamɛka.+
Nɔtɛ ka l'ɛse ka dikatshi
^ Kana “wanu w’eyoyo.”
^ Mbuta ate oya lo eshidi 9 wa pindju.
^ Kana “wɛnya kɛnɛ kayosalema lo nshi yayaye.”
^ Kana “latɛndɛ.”
^ Kana “wɛnya kɛnɛ kayosalema lo nshi yayaye.”
^ Kana “dako.”
^ Kana ondo “ɛkɔdi.”
^ Kana “la ntondo ka washo ami.”
^ Tshɛk., “emunyi ami.”
^ Kana “Hadɛsɛ,” mbuta ate odimu a pɛngando. Enda Elembetshielo.
^ Kana “anima ami.”
^ Kana “la ntondo k’elungi kayɛ.”
^ Tshɛk., “onto ɔmɔtshi l’oma lo elowa w’oma lo lokende lande.”
^ Kana “Hadɛsɛ,” mbuta ate odimu a pɛngando. Enda Elembetshielo.
^ Kana “anima.”
^ Kana “anima.”
^ Kana “wɛnya kɛnɛ kayosalema lo nshi yayaye.”
