Etsha 25:1-27
25 Ɔnkɔnɛ, nshi 3 l’ɔkɔngɔ wa Fɛsto+ nkoma lo prɔvɛnsɛ ndo mbɔsa lowandji, nde akamɔ oma la Kayisariya akatshu la Jɛrusalɛma.
2 Ko ewandji w’ɛlɔmbɛdi la ɛnɛnɛ w’ase Juda wakafunde Pɔɔlɔ+ le nde. Vɔ wakatatɛ nsɛngasɛnga Fɛsto
3 dia nde mbasalɛ ɔlɔlɔ* lo ntoma Pɔɔlɔ dia nde ndja oya la Jɛrusalɛma. Koko vɔ wakakongɛ dia polamɛ Pɔɔlɔ ndo dia mbodiaka lo mboka.+
4 Koko Fɛsto akaakadimola dia Pɔɔlɔ ayotolamema la Kayisariya ndo ndamɛ aki suke la ntshɔ lɛkɔ.
5 Nde akate ate: “Ɛnɔmbɔdi anyu kawotshu kaamɛ la mi ndo kawotoofunde naka lo mɛtɛ nde akasale dui dimɔtshi dia kɔlɔ.”+
6 Lam’ele nde kondekanya nshi 8 kana 10 kaamɛ la wɔ, nde akaholɔ otsha la Kayisariya ndo la wedi a pindju nde akadjasɛ lo dihole dia kilombo ndo akate dia vɔ ndja la Pɔɔlɔ.
7 Lam’akɔtɔ Pɔɔlɔ, ase Juda wanɛ wakaye oma la Jɛrusalɛma wakoodinge ndo wakomame akambo efula ndo enongo wa wolo wakiwɔ kokoka mɛnya dia wekɔ mɛtɛ.+
8 Koko Pɔɔlɔ akayaswɛ, ata ate: “Dimi kosalɛ Ɛlɛmbɛ w’ase Juda kana tɛmpɛlɔ kana Kayisa pɛkato.”+
9 Lam’ele Fɛsto akalangaka ngɛnyangɛnya ase Juda,+ nde akatɛ Pɔɔlɔ ate: “Onde wɛ nangaka ntshɔ la Jɛrusalɛma dia tolomboshama lɛkɔ l’ɔtɛ w’akambo asɔ la ntondo kami?”
10 Koko Pɔɔlɔ akate ate: “La ntondo ka dihole diaki Kayisa dia kilombo lɛnɛ ahombami nomboshama kemadimi. Dimi kosalɛ ase Juda ndooko kɔlɔ, oko wamboyodieya wɛmɛ dimɛna.
11 Naka lo mɛtɛ dimi lekɔ otshi wa kɔlɔ ndo naka lakasale dui dimɔtshi diahombami mvɔ,+ dimi haatone mvɔ. Ko naka ndooko kɛnɛ kɛnya mɛtɛ k’akambo wafunda anto anɛ, kete ndooko onto lele la lotshungɔ la kimɔmi le wɔ okimɔkimɔ. Lambɔlɔmba dia Kayisa menda dikambo diami!”+
12 Oma laasɔ, l’ɔkɔngɔ wa Fɛsto nkɛtshanya la olui w’andaki, nde akate ate: “Oko wamboyɔlɔmba dia Kayisa menda dikambo diayɛ, wɛ pombaka ntshɔ le Kayisa.”
13 L’ɔkɔngɔ wa nshi mɔtshi, nkumekanga Angripa nde la Bɛrnisɛ wakaye la Kayisariya dia ndjembola Fɛsto.
14 Lam’akawetsha nshi mɔtshi lɛkɔ, Fɛsto akatɛ nkumekanga dikambo dia Pɔɔlɔ ate:
“Pami kɛmɔtshi kakatatshiki Feliksɛ lo lokanu ekɔ lanɛ,
15 ndo lam’akimi la Jɛrusalɛma, ewandji w’ɛlɔmbɛdi ndo dikumanyi di’ase Juda wakambutɛ akambo wendana la nde+ ndo wakanɔmbɛ dia dimi mbosha dilanya.
16 Koko, dimi lakaakadimola nte lo ndjela ɛlɛmbɛ w’ase Rɔmɔ, hawanya onto wanyanya la ntondo ka nde nsamba kaamɛ la wanɛ woofunda ndo monga la diaaso dia ndjaswɛ lo dikambo diofundawɔ.+
17 Ɔnkɔnɛ, lam’akawaye lanɛ, dimi kotshimbatshimba. La wedi a pindju, dimi lakadjasɛ lo dihole dia kilombo ndo lakadjanga dia vɔ mbela pami kakɔ.
18 Lam’akandemala, wanɛ wakoofunde kombɔsɔngwɛ ndooko dikambo dia kɔlɔ ɔtɔi diakamafɔnyaka dia nde akasale.+
19 Vɔ wakadjanaka la nde taamu tsho lo kɛnɛ kendana la ɔtɛmwɛlɔ wa tozambizambi*+ tawɔ hita ndo lo kɛnɛ kendana la onto ɔmɔtshi lakavu lelɛwɔ Yeso, koko Pɔɔlɔ akashikikɛka dia nde ekɔ la lɔsɛnɔ.+
20 Lam’ele dimi kombeya yɛdikɔ ya mbɔsa lo kɛnɛ kendana la taamu takawadjana l’akambo asɔ, lakawombola dia kana nde ayolanga ntshɔ la Jɛrusalɛma ndo tolomboshama lɛkɔ l’ɔtɛ w’akambo asɔ.+
21 Koko, lam’akalɔmbɛ Pɔɔlɔ dia vɔ mbolama lo lokanu polo lam’akahombe owandji Ogistɛ*+ mbɔsa yɛdikɔ, dimi lakadjanga dia nde namema polo lam’akamahombe mbotoma le Kayisa.”
22 Ko Angripa akatɛ Fɛsto ate: “Dimi dimɛ nangaka mpokamɛ pami kɛsɔ.”+ Nde akawotɛ ate: “Wɛ ayowohokamɛ loyi.”
23 Ɔnkɔnɛ la wedi a pindju, Angripa nde la Bɛrnisɛ wakaye lo yoho ya lokumu ko wakɔtɔ lo luudu la tominadi vɔ la kɔmanda y’asɔlayi kaamɛ l’apami wa lokumu wa l’osomba, ndo lam’akadjanga Fɛsto, vɔ wakɔtshiya Pɔɔlɔ.
24 Ko Fɛsto akate ate: “Nkumekanga Angripa ndo nyu apami tshɛ wele kaamɛ la so lanɛ, nyekɔ lo mɛna pami kɛnɛ kele leemba l’ase Juda tshɛ w’oma la Jɛrusalɛma ndo wa lanɛ wakaye le mi wahangɔhangɔ ɔnɛ nde hahombe ntshikala la lɔsɛnɔ.+
25 Koko, dimi lakɛnyi dia nde kosala ndooko dikambo diakokande mvɔ.+ Ɔnkɔnɛ, lam’akalɔmbɛ pami kɛnɛ dia owandji Ogistɛ menda dikambo diande, dimi lakɔshi yɛdikɔ ya mbotoma.
26 Koko, dimi bu ndooko la dikambo shikaa diendana la nde dia fundɛ Nkumɛmi. Ɔnkɔnɛ, dimi lambowɔtshiya le nyu ndo djekoleko le yɛ, wɛ nkumekanga Angripa dia dimi monga la dikambo dimɔtshi dia mfunda l’ɔkɔngɔ wa kilombo.
27 Nɛ dia bu dimɛna dia dimi ntoma ose lokanu aha la nembetshiya kɛnɛ koofundawɔ.”
Nɔtɛ ka l'ɛse ka dikatshi
^ Tshɛk., “wakɔlɔmbɛ lo dikambo diande.”
^ Kana “ɔtɛmwɛlɔ awɔ hita.”
^ Titrɛ ka nkumekanga ka Rɔmɔ.
