Etsha 27:1-44
27 Lam’ele yɛdikɔ yakɔsama dia sho ntshɔ lo masuwa otsha l’Itali,+ vɔ wakakimɔ Pɔɔlɔ ndo ase lokanu akina le Juliyo, owandji w’olui waki Ogistɛ.
2 Oma la Adaramutiyo, takɔtɔ lo masuwa wakahombe ntshɔ l’abongo wotshikitanyi wele l’omamu wa prɔvɛnsɛ ka Aziya ndo takonɛɛ sho l’Aristarako+ laki ose Makɛdɔniya la la Tɛsalɔnika.
3 La wedi a pindju, takemala lo dibongo dia Sidɔna ndo Juliyo akasalɛ Pɔɔlɔ akambo la ɔlɔlɔ w’otema ndo aketawɔ dia nde ntshɔ le angɛnyi ande ndo dia vɔ mbokimanyiya.
4 Ko takete dia ndjale, ndo takete l’omamu wa Kupiro, nɛ dia lɔpɛpɛ lakayaka oma la ntondo kaso.
5 Ko takete la masuwa l’atei atei wa ndjale, l’omamu wa Kilikiya la Pamufiliya ndo takatemala lo dibongo dia Mira ka la Lukiya.
6 Lɛkɔ owandji w’asɔlayi akatane masuwa w’oma la Alɛksandriya wakatatshɔka otsha l’Itali, ko nde akatɔtshiya lɔkɔ.
7 Oma laasɔ, l’ɔkɔngɔ wa sho ntshɔ nshi efula ɔkɔkɛ, takatokomaka la Kinidɛ l’okakatanu w’efula. Nɛ dia lɔpɛpɛ lakatokaloyaka ɛkɔngɔkɔngɔ, ko takete l’omamu wa Kɛrɛtɛ otsha la Salimɔnɛ.
8 Ndo l’ɔkɔngɔ wa sho mbeta l’omamu wa disɛnga l’okakatanu, takakome lo dihole dimɔtshi dielamɛ ɔnɛ Dibongo dia Dimɛna ndo osomba wa Laseya waki suke la dibongo diakɔ.
9 Etena k’otale kakete ndo aki waale dia ntshɔ la masuwa dikambo kaanga okilelo wa mbo ya ndɛ wa Lushi la Ekombelo ka pɛkato+ wakashile mbeta, ɔnkɔnɛ Pɔɔlɔ akawaewola
10 ate: “Amɛka, dimi mɛnaka dia lɔkɛndɔ lɔnɛ layonga la waale ndo tayoshisha efula, aha tsho masuwa la diangɔ dia lɔkɔ, koko ndo nsɛnɔ yaso.”*
11 Koko owandji w’asɔlayi akahokamɛ paka kɛnɛ kakawotɛ kapitɛnyi ka masuwa la kanga masuwa lo dihole dia mpokamɛ kɛnɛ kakataka Pɔɔlɔ.
12 Lam’ele dibongo sɔ komonga dihole dia dimɛna dia ntshikala lo nshi ya tshitshi, suke l’anto tshɛ wakate dia sho mimɔ oma lɛkɔ dia menda kana tayokoka nkoma la Feniksɛ ndo tetsha nshi ya tshitshi lɛkɔ lo dibongo dia la Kɛrɛtɛ lam’asa nɔrdɛ ɛstɛ ndo lam’asa sidɛ ɛstɛ.
13 Kam’akatatɛ yema ya lɔpɛpɛ l’oma lo sidɛ mpɛpa, vɔ wakafɔnya dia wambokotsha oyango awɔ, ko wakanya longo ndo takete suke la Kɛrɛtɛ l’omamu wa disɛnga.
14 Kombeta edja, lɔpɛpɛ la wolo lelɛwɔ Erakilɔna* lakapɛpɛ lo disɛnga diakɔ.
15 Lam’ele lɔpɛpɛ lakakɔmamaka wolo lo masuwa ndo masuwa kokoka ntshɔ otsha la ntondo, sho takatshike duka ko lɔpɛpɛ lakatɛmbɛ lɛnɛ alangalɔ.
16 Ko takete l’omamu wa disɛnga dimɔtshi dia tshitshɛ dielɛwɔ Kauda ndo taki l’okakatanu w’efula dia mbɔtshiya waato wa tshitshɛ* lo masuwa.
17 Koko l’ɔkɔngɔ wa mbɔtshiya waato lo masuwa, vɔ wakakeleka ɛkɔdi lo masuwa ndo lam’ele wakoke wɔma dia tokakatɛ lo disɛnga dia Suriti,* vɔ wakaholoya dihomɔ dia lo masuwa dia nkitshakitsha lowango, koko lɔpɛpɛ lakatɛmbɛ.
18 Lam’ele lɔpɛpɛ lakatosutshasutshaka wolo, la wedi a pindju, vɔ wakatatɛ minya diangɔ dimɔtshi oma lo masuwa.
19 Ndo lushi la 3, vɔamɛ wakatatɛ mbikasha dihomɔ dia masuwa la anya awɔ.
20 Lam’ele wonya ndo tɔɔtɔ kɔmɛnama l’edja ka nshi efula ndo lɔpɛpɛ la wolo* lakapɛpaka, sho tshɛ takatatɛ nshisha elongamelo ka mbika.
21 L’ɔkɔngɔ w’anto mbetsha etena k’otale aha la ndɛ, Pɔɔlɔ akemala l’atei awɔ ndo akate ate: “Amɛka, lo mɛtɛ nyakahombe ndjela dako diakamanyosha diaha sho mimɔ oma la Kɛrɛtɛ lo mbeta dia ndjale ko ndjonga lo waale wa nganɛ ndo nshisha diangɔ efula.+
22 Kakianɛ, dimi lambonyɔlɔmba dia nyu monga la dihonga, nɛ dia ndooko onto* l’atei anyu layoshisha lɔsɛnɔ, paka masuwa oto mbayolana.
23 Lotsho w’ɛlɔ, ondjelo+ wa Nzambi katɛmɔlami ndo kakambɛmi olimu w’ekila akemadi suke la mi
24 ko akatshi ate: ‘Pɔɔlɔ, tokake wɔma. Wɛ ayemala la ntondo ka Kayisa+ ndo Nzambi ayokokɛ wanɛ tshɛ watatshu la yɛ lo masuwa l’ɔtɛ ayɛ.’
25 Ɔnkɔnɛ amɛka, nyonge la dihonga, nɛ dia lekɔ la mbetawɔ le Nzambi nte akambo tshɛ wayosalema oko wakawambute.
26 Koko sho pombaka temala lo disɛnga dimɔtshi.”+
27 Lam’akadje wonya lushi la 14 ndo lam’ele takatekekɔka lo Ndjale ka Adariya, la midi k’otsho ase masuwa wakafɔnya dia tekɔ suke la dibongo.
28 Vɔ wakɛdika dingunda dia ashi ndo wakɛnyi dia ekɔ fatomɛ 20,* vɔ wakatshu yema ko wakɛdika dingunda dia ashi nto ndo wakɛnyi dia ekɔ fatomɛ 15.*
29 Lam’ele waki la wɔma wa sho tɔkɔmama l’ave, vɔ wakaholoya nkongo 4 oma l’ɔkɔngɔ wa masuwa ndo takakongaka dia wonya mpotɔ.
30 Koko lam’akayangaka ase masuwa dia ntomba oma lo masuwa ndo mpoloya waato wa tshitshɛ lo ndjale oko anto walanga toholoya nkongo y’oma la ntondo ka masuwa l’ashi,
31 Pɔɔlɔ akatɛ owandji w’asɔlayi ndo asɔlayi ate: “Naka anto anɛ hawotshikadi lo masuwa, kete hanyotokoka mbika.”+
32 Ko asɔlayi wakahembola ɛkɔdi wa waato wa tshitshɛ ndo wakɔɔkɔsha l’ashi.
33 Yema tshitshɛ la ntondo ka wonya mpotɔ, Pɔɔlɔ akakeketsha anto tshɛ dia vɔ ndɛ yangɔ, ata ate: “Ɛlɔ aya lushi la 14 lenyu lo nkonga l’okiyanu ndo lambonyotshikala aha la ndɛ kaanga ɛngɔ.
34 Ɔnkɔnɛ, dimi lambonyokeketsha dia nyu ndɛ yangɔ, dui sɔ diayonyokimanyiya dia nyu monga l’alemba wa wolo, nɛ dia ndooko wɔɔngi wa divo wa l’ɔtɛ w’ɔmɔtshi la l’atei anyu wayoshishɔ.”
35 L’ɔkɔngɔ wa nde mbuta ngasɔ, nde akɔshi mapa, akasha Nzambi losaka la ntondo kawɔ vɔ tshɛ, akoohembola ndo akatatɛ ndɛ.
36 Ko anto tshɛ wakonge la dihonga ndo wakale yangɔ.
37 Sho tshɛ wanɛ waki lo masuwa taki anto* 276.
38 Lam’akawalote, vɔ wakatatɛ nkitshakitsha wotsho waki lo masuwa lo mbikasha eponga lo ndjale.+
39 Lam’akahotɔ wonya, vɔ kɔmɛna dibongo+ koko wakɛnyi paka diɛngɔ dimɔtshi diaki la lɔsɛnga l’omamu ndo wakɔshi yɛdikɔ ya temadia masuwa lɛkɔ, naka ayokoka.
40 Ɔnkɔnɛ, vɔ wakahembola ɛkɔdi wa nkongo ndo wakatshike dia vɔ ntambɛ lo ndjale ndo l’etena kakɔ kaamɛ, vɔ wakakelekola ɛkɔdi wa kahi ndo l’ɔkɔngɔ wa vɔ mbidiya dipɛma dia la ntondo, vɔ wakatshu otsha lo disɛnga.
41 Lam’akawakɔmama lo lɔkɔngɔ lakayaka oma lo asuku wa ndjale wakayaka wedi akɔ tshɛ, masuwa wakakakatɛ laawɔ ndo ɔtɛ awɔ wakahandjɔ vwa la asuku.+
42 Asɔlayi wakɔshi yɛdikɔ ya ndjaka ase lokanu diaha kaanga ɔtɔi ɔmɔtshi l’atei awɔ nsala osale ko ndawɔ.
43 Koko owandji w’asɔlayi akasale tshɛ dia mpandja Pɔɔlɔ, ɔnkɔnɛ nde akaashimbe diaha vɔ nsala dikambo sɔ. Nde akatɛ wanɛ tshɛ wakakokaka nsala osale dia vɔ mimbɛ l’ashi ndo ntehɔ ntondo,
44 ndo anto akina wakayotehɔka l’ɔkɔngɔ, amɔtshi l’abaya ndo akina lo bɛtshi dia masuwa. Ko vɔ tshɛ wakatombe etondo eto l’okongo.+
Nɔtɛ ka l'ɛse ka dikatshi
^ Kana “amina.”
^ Mbuta ate “lɔpɛpɛ l’oma lo nɔrdɛ ɛstɛ.”
^ Ɔsɔ ekɔ waato wa tshitshɛ wakokawɔ nkamba la wɔ dia nkokɛ anto wambombɔ la masuwa.
^ Enda Elembetshielo.
^ Tshɛk., “aha la tshitshɛ.”
^ Kana “anima.”
^ Kana “anima.”
