Etsha 4:1-37
4 Etena kakatɛkɛtaka Petero la Joani vɔ l’anto, ɛlɔmbɛdi, ɔnɔmbɔdi w’alami wa lo tɛmpɛlɔ la Asadukɛ+ wakaye le wɔ.
2 Vɔ wakawaomalɛ, nɛ dia apɔstɔlɔ 2 asɔ waketshaka anto ndo wakewoyaka lo sɛkɛ dikambo dia eolwelo ka Yeso oma lo nyɔi.*+
3 Vɔ wakawande* ndo wakawadje lo lokanu+ polo la wedi a pindju, nɛ dia wonya aki aya dikɔlɔ.
4 Koko, efula ka wanɛ wakahokamɛ sawo diawɔ wakonge la mbetawɔ ndo lofulo l’apami lakakome oko nunu tanu (5 000).+
5 La wedi a pindju, ewandji awɔ, dikumanyi la afundji wakasangana kaamɛ la Jɛrusalɛma,
6 kaamɛ ndo Anasi+ laki owandji w’ɛlɔmbɛdi, Kayifasi,+ Joani, Alɛksandɛrɛ ndo ase nkumbo k’owandji w’ɛlɔmbɛdi tshɛ.
7 Vɔ wakemadia Petero ndo Joani l’atei awɔ ndo wakatatɛ mbambola ɔnɛ: “Oma lo wolo akɔna kana lo lokombo l’onto akɔna lakanyasale dikambo nɛ?”
8 Ko Petero lakalodiama la nyuma k’ekila+ akawatɛ ate:
“Ewandji w’anto la dikumanyi le,
9 naka nyu nyotombola ɛlɔ kɛnɛ lo dikambo di’ɔlɔlɔ diakatasalɛ pami kaki ekuse+ ndo naka nyu nangaka mbeya woho wambɔkɔnɔ pami kɛnɛ,
10 nyu tshɛ ndo ase Isariyɛlɛ tshɛ nyeye dia lo lokombo la Yeso Kristo y’ose Nazarɛtɛ,+ ɔnɛ lakanyadiake l’otamba,+ ko Nzambi mboolola oma lo nyɔi,+ lo lokombo lande kambɔkɔnɔ pami kele la ntondo kanyu kɛnɛ.
11 Nde kele ‘dive diakanyɔshi nyu ambiki wa luudu oko dive di’anyanya, koko diɔ diaya dive dia woke dia tshuku.’*+
12 Ndo nto, panda keema oma le onto okina, nɛ dia ndooko lokombo+ lokina lakashama le anto l’ɛse olongo lahomba toshimbɛ.”+
13 Lam’akawɛnyi woho wakatɛkɛtaka Petero la Joani akambo hwe hwe* ndo lam’akaweye dia vɔ haweye mukanda* ndo wekɔ anto k’anto,+ vɔ wakaambe. Vɔ wakeye dia Petero la Joani waki kaamɛ la Yeso.+
14 Lam’akawendaka pami kakakɔnɔ emadi l’atei awɔ,+ vɔ komonga ndooko la dikambo dia mbuta.+
15 Ko vɔ wakaatondja oma lo luudu la tominadi ta laadiko t’ase Juda ndo wakatatɛ nkɛtshanya lam’asawɔ,
16 wata vate: “Ahombaso nsala la apami anɛ?+ Nɛ dia lo mɛtɛ, djembetelo ya mamba yakasalema lo tshimbo yawɔ, yakɛnyi anto tshɛ wa la Jɛrusalɛma+ yahatakoke manguna.
17 Koko, diaha lokumu la dikambo sɔ nyomoleka diangana le anto, nyɛsɔ taahangwe ndo towate diaha vɔ ntɛkɛta nto dikambo dia lokombo lɔsɔ+ le oseka onto tshɛ.”
18 Ko vɔ wakawaelɛ ndo wakawadjangɛ diaha vɔ ntɛkɛta kana mbetsha lo lokombo la Yeso.
19 Koko Petero la Joani wakawatɛ vate: “Naka ekɔ dimɛna lo washo wa Nzambi dia sho nyohokamɛ lo dihole dia mpokamɛ Nzambi, nyuamɛ nyosambole.
20 Koko le so, sho hatototshika mbuta akambo wakatɛnyi ndo wakatoke.”+
21 L’ɔkɔngɔ wa vɔ mbahangwɛ nto, vɔ wakaakimɔ nɛ dia vɔ komonga ndooko l’ɔkɔkɔ wa mbasha dilanya ndo nɛ dia vɔ wakokaka anto wɔma,+ dikambo anto tshɛ wakatombolaka Nzambi l’ɔtɛ wa kɛnɛ kakasalema.
22 Nɛ dia pami kakawakɔnɔla lo dihindo* aki aya l’ɛnɔnyi ndekana 40.
23 L’ɔkɔngɔ wa vɔ mbatshungola, vɔ wakatshu le asekawɔ ndo wakataasanyɛ akambo wakawatɛ ewandji w’ɛlɔmbɛdi la dikumanyi.
24 Lam’akawoke akambo asɔ, vɔ tshɛ kaamɛ wakalɔmbɛ Nzambi la dui dia wolo ɔnɛ:
“Nkum’Olongo Nkumadiɔndjɔ, Wɛ kakatonge olongo, nkɛtɛ, ndjale ndo diangɔ tshɛ diele lɔkɔ,+
25 ndo lo tshimbo ya nyuma k’ekila, wɛ akate l’onyɔ wa tshɛso Davidɛ,+ okambi ayɛ wate: ‘Lande na kambɔtɔ lofunguso le ase wedja ndo lande na kakanyiya anto awui w’anyanya?
26 Nkumi ya dikanga ya la nkɛtɛ wambemala ndo ewandji wa weke wambosangana kaamɛ oko onto 1 dia ndɔsha Jehowa* nde la okitami ande w’esɔ.’*+
27 Nɛ dia lo mɛtɛ Hɛrɔdɛ la Pɔsɔ Pilato+ kaamɛ l’ase wedja ndo ase Isariyɛlɛ wakatshumana l’osomba ɔnɛ dia ndɔsha Yeso, okambi ayɛ w’ekila wakayakite esɔ,+
28 dia nsala akambo wakashikikɛ lonya layɛ ndo dako diayɛ la ntondo dia salema.+
29 Jehowa* le, ohokame woho wataanɛwɔ ndo kimanyiya ekambi ayɛ dia vɔ ntetemala nsambisha ɔtɛkɛta ayɛ la dihonga tshɛ,
30 etena kasembolayɛ lonya layɛ dia nkɔnɔla ndo etena kasalema tolembetelo ndo akambo wa diambo*+ lo lokombo la Yeso, okambi ayɛ w’ekila.”+
31 Lam’akawashidiya nsala dɔmbɛlɔ di’ɔsɛngɔsɛngɔ* sɔ, dihole diakawasangana diakasukasuka ndo vɔ tshɛ wakalodiama la nyuma k’ekila+ ndo wakewoyaka ɔtɛkɛta wa Nzambi la dihonga tshɛ.+
32 Ndo nto, leemba l’anto waketawɔ waki la otema ndo anima* 1, ndo ndooko onto lakataka dia ɛngɔ kaki la nde kaki kande ndamɛ. Vɔ wakasanganyaka diangɔ tshɛ kaamɛ.+
33 Laadiko dia laasɔ, apɔstɔlɔ wakatetemala nsambisha la wolo w’efula akambo wendana la eolwelo ka Nkumadiɔndjɔ Yeso,+ ndo ɔlɔlɔ waheyama mbɛdika waki le wɔ vɔ tshɛ lo yɛdikɔ y’efula.
34 Lo mɛtɛ, ndooko onto la l’atei awɔ+ lakahombaka ɛngɔ, nɛ dia wanɛ tshɛ waki la dikambɔ kana mvudu wakasondjaka ndo wakelaka falanga y’oma lɔkɔ,
35 ndo wakayishaka apɔstɔlɔ.+ Ko vɔ wakayikahanyaka le onto l’onto lo ndjela ehomba ande.+
36 Ɔnkɔnɛ, Yɔsɛfu lele apɔstɔlɔ wakawɔlɛ nto ɔnɛ Barnabasɛ,+ (kitshimudi ate: “Ɔna Esambelo”), ose Lɛwi lakotɔ la Kupiro,
37 aki la ɛtshi ka nkɛtɛ. Nde akakisondja, akela falanga y’oma lɔkɔ ndo akayosha apɔstɔlɔ.+
Nɔtɛ ka l'ɛse ka dikatshi
^ Kana “eolwelo k’oma lo nyɔi lo dikambo dia Yeso.”
^ Kana “wakawadje anya.”
^ Tshɛk., “ɔtɛ wa tshuku.”
^ Kana “la dihonga.”
^ Kana “anto waki kombeka mukanda,” mbuta ate waki kɔmbɔtɔ lo kalasa y’ewandji w’ɔtɛmwɛlɔ; kɛsɔ hɛnya dia vɔ kombeyaka mbadia la mfunda.
^ Kana “djembetelo.”
^ Kana “Kristo kande.”
^ Kana “wɛnya kɛnɛ kayosalema lo nshi yayaye.”
^ Kana “akawasalaka dɔmbɛlɔ l’otema ɔtɔi.”
^ Enda Elembetshielo.
