Etsha 6:1-15
6 Lo nshi shɔ, lam’akatafulanɛka ambeki, ase Juda wakatɛkɛtaka Grɛkɛ wakangunɛngunɛ ase Juda wakatɛkɛtaka Hɛbɛru, nɛ dia wadi waki edo awɔ konongolaka dimɛna yema yawɔ ya diangɔ diakakahanyemaka lushi la lushi.+
2 Ko apɔstɔlɔ 12 wakasanganya leemba l’ambeki ndo wakawatɛ vate: “Bu dimɛna* dia sho ntshika ɔtɛkɛta wa Nzambi dia sho kahanyaka mbo ya ndɛ la mɛsa.+
3 Ɔnkɔnɛ nyu anangɛso, nyɔsɔnɛ apami*+ 7 oma l’atei anyu, wele la lokumu l’ɔlɔlɔ, woludi la nyuma ndo la lomba+ dia sho mbasha olimu w’ohomba ɔsɔ.+
4 Koko, sho pombaka ndjasha tshɛ lo dɔmbɛlɔ ndo l’olimu w’ɔtɛkɛta.”
5 Ko leemba l’anto tshɛ wakangɛnangɛna ɛtɛkɛta ɛsɔ ndo vɔ wakasɔnɛ Stɛfano, pami kaki la mbetawɔ k’efula ndo kakalole la nyuma k’ekila, Filipɛ,+ Prɔkɔrɔ, Nikanɔra, Timɔna, Paramɛna la Nikɔla laki ose Atiyɔka ose wodja lakakome ombetawudi.
6 Vɔ wakaye l’apami akɔ le apɔstɔlɔ ndo l’ɔkɔngɔ wa vɔ nsala dɔmbɛlɔ, vɔ wakawawahɛ anya.+
7 Ɔnkɔnɛ, ɔtɛkɛta wa Nzambi wakatetemala diangana+ ndo lofulo l’ambeki lakatatetemalaka mbidɛ la Jɛrusalɛma lo yɛdikɔ y’efula+ ndo olui a woke w’ɛlɔmbɛdi wakakome ambetawudi.+
8 L’etena kɛsɔ, Stɛfano lakahomɔ lokolo l’ɔlɔ lo washo wa Nzambi ndo lakalodiama la wolo akasalaka akambo wa diambo* efula ndo tolembetelo l’atei w’anto.
9 Koko anto amɔtshi waki oma l’atei wa wanɛ wakawelɛka ɔnɛ Shinangɔnga y’Atshungɔmi wakaye kaamɛ l’ase Kurɛnɛ amɔtshi, ase Alɛksandriya, ase Kilikiya amɔtshi ndo ase Aziya dia ndjodjana la Stɛfano taamu.
10 Koko vɔ kokoka nshika ekolo la ntondo ka lomba lande ndo ka nyuma k’ekila kakɔɔlɔmbɔlaka dia nde ntɛkɛta.+
11 Ko vɔ wakatome anto lo woshɛshɛ dia vɔ tota ɔnɛ: “Takawoki atɛnga Mɔsɛ la Nzambi.”
12 Ndo vɔ wakatshutshuya anto, dikumanyi la afundji, ko vɔ wakaye la shashimoya le nde, wakawonde la wolo ndo wakatshu la nde lo tominadi ta laadiko t’ase Juda.
13 Vɔ wakatondja ɛmɛnyi wa kashi, wanɛ wakate vate: “Pami kɛnɛ tetemalaka ntɛkɛta kɔlɔ dikambo dia dihole nɛ di’ekila ndo dikambo di’Ɛlɛmbɛ.
14 Ɛnyɛlɔ, takawoki ata dia Yeso y’ose Nazarɛtɛ ayonyukola dihole nɛ ndo ayotshikitanya mbekelo yakatotshikɛ Mɔsɛ.”
15 Lam’ele wanɛ tshɛ wakadjasɛ lo tominadi ta laadiko t’ase Juda wakawendaka tɛɛ, vɔ wakɛnyi dia elungi kande kaki oko ka ondjelo.
Nɔtɛ ka l'ɛse ka dikatshi
^ Tshɛk., “Hatɔngɛnyangɛnya.”
^ Kana “apami 7 watɛkɛtawɔ dimɛna dikambo diawɔ.”
^ Kana “wɛnya kɛnɛ kayosalema lo nshi yayaye.”
