Habakuka 1:1-17
1 Ɔnɛ ele diewoyelo diakalongola omvutshi Habakuka* lo ɛnɛlɔ:
2 Jehowa le, polo l’etena kakɔna kayomolela dia nyanga ekimanyielo, koko wɛ hoke?+
Polo l’etena kakɔna kahombami nɔmba ekimanyielo l’ɔtɛ w’akambo wa ngala, koko wɛ hekɛ lonya?*+
3 Lande na kamɛnyayɛ awui wa kɔlɔ?
Ndo lande na katshikayɛ ɔhɛnyɔhɛnyɔ?
Lande na kele elanyelo ndo awui wa ngala la ntondo kami?
Ndo lande na kambofula ewanu la ɔlɔshanelo?
4 Ɔnkɔnɛ, ɛlɛmbɛ wambɔnywama,Ndo losembwe hayodjama yimba nto.
Nɛ dia kanga kɔlɔ ambodinga onto ɔlɔlɔ;Diakɔ diele losembwe lambolanyema.+
5 “Nyende l’atei wa wedja ndo nyodje yimba!
Nyende la diambo tshɛ ndo nyokashimɔ;Nɛ dia dui dimɔtshi diayosalema lo nshi yanyuDiahanyatetawɔ oyadi vɔ konyotɛkadiɔ.+
6 Nɛ dia dimi layanga ntondja ase Kaladiya,+Wodja w’esehe ndo womala esadi.
Vɔ mbetaka esadi lo bɛtshi dia nkɛtɛ dia wekeDia mbɔsa mvudu yele bu yawɔ.+
7 Vɔ satshaka lokomba ndo mbokiyaka wɔma.
Vɔ shikikɛka losembwe ndo lowandji*+ lawɔ hita.
8 Mfalasa yawɔ ndawɔka ndeka nkɔi,Ndo yɔ yekɔ ngala ndeka ndjaondo l’otsho.+
Mfalasa yawɔ ya ta fumbɔka otsha la ntondo;Mfalasa yawɔ ndja oma l’etale;
Yɔ polɔka oko watoholɔka mpongo esadi dia ndɛ.+
9 Yɔ tshɛ mbɛlɛ lo akambo wa ngala.+
Osanganelo wa dungi diawɔ wekɔ oko lɔpɛpɛ+ l’oma lo ɛstɛ,Ndo vɔ mindaka mfumbe oko ditshu.
10 Vɔ mɔnyɔlaka nkumi ya dikangaNdo vɔ mbɔlaka ewandji+ wa weke.
Vɔ mbɔlaka dihole tshɛ diodingami la mpele;+Vɔ tshumanyaka tota dia ditshu ndo mbɔsaka dihole diakɔ.
11 Oma laasɔ, vɔ tshɔka otsha la ntondo oko lɔpɛpɛ ndo mbetaka lɔkɔ,Koko vɔ wayonga l’onongo,+Nɛ dia vɔ mbutaka dia wolo awɔ ndja oma le jambizambi+ yawɔ.”*
12 Jehowa+ le, onde wɛ bu oma ko mɔmbɔkɔmbɔla?
Nzambi kami le, lakimi l’Ekila, wɛ havu.*+
Jehowa le, wɛ akaasɔnɛ dikambo dia kilombo;Dive+ diami le, wɛ akaakitsha dia mbasha dilanya.*+
13 Washo ayɛ wekɔ pudipudi k’efula kahakoke menda kɛnɛ kele kɔlɔ,Ndo wɛ hakoke ntshika kɛnɛ kele kɔlɔ.+
Ko lande na katshikayɛ lokeso+Ndo kɔlamayɛ etena kele kanga kɔlɔ ekɔ lo tamɛnɛ ɔnɛ lowoleki ɔlɔlɔ?+
14 Lande na ketɛyɛ onto oko lose la lo ndjale,Oko dikɛndakɛnda diayakotola diele bu la ɔnɔmbɔdi?
15 Nde* dikotolaka diɔ tshɛ la yɔdi.
Nde dindaka lo ɔtɛyi ande,Ndo nde ditshumanyaka lo ɔtɛyi ande wa nse.
Diakɔ diangɛnangɛnande efula.+
16 Diakɔ dialambolɛnde ɔtɛyi ande elamboNdo dialambolɛnde* ɔtɛyi ande wa nse elambo;Nɛ dia oma le wɔ mbele kɛnɛ kele la nde efula,*Ndo mbo yande ya ndɛ yekɔ amɛna.
17 Ko onde nde ayotetemala ntshika ɔtɛyi ande hwe?*
Onde nde ayotetemala ndjaka wedja aha la kɛtshi?+
Nɔtɛ ka l'ɛse ka dikatshi
^ Ondo kitshimudi ate: “Okumbatelo wa la wolo.”
^ Kana “hashimbɛ.”
^ Kana “kɛnɛmɔ.”
^ Kana ondo “jambizambi yawɔ kele wolo awɔ.”
^ Kana ondo “sho hatotovɔ.”
^ Kana “dia mbahangwɛ.”
^ Mbuta ate otunyi w’ose Kaladiya.
^ Kana “diatshumbɛnde.”
^ Tshɛk., “kitama esɔ dimɛna.”
^ Kana ondo “ayotetemala nsɔmɔla lokuwa lande la ta?”
