Hangayi 1:1-15
1 Lo ɔnɔnyi wa 2 w’ɛlɔmbwɛlɔ ka nkumekanga Dariyo, lo ngɔndɔ ka 6 lushi 1, ɔtɛkɛta wa Jehowa wakaye le omvutshi Hangayi*+ lo dikambo dia Zerubabɛlɛ+ ɔna Shɛalatiyɛlɛ nguvɛrnɛrɛ ka Juda, ndo lo dikambo dia Jashua ɔlɔmbɛdi a laadiko ɔna Jɛhɔzadaka ɔnɛ:
2 “Jehowa kanga lolembelembe kata ate: ‘Anto anɛ wekɔ lo mbuta ɔnɛ: “Etena katakoke ka luudu* la Jehowa mbikama.”’”*+
3 Ɔtɛkɛta wa Jehowa wakaye nto lo tshimbo y’omvutshi Hangayi+ ɔnɛ:
4 “Onde ɔnɛ ekɔ etena ka nyu mbidjasɛ lo mvudu yanyu y’abaya w’oshinga wolo etena kele luudu lɔnɛ lambolana?+
5 Jehowa kanga lolembelembe kata ate: ‘Nyodje etema anyu lo* mboka yanyu.
6 Nyu nyakonɛ woho efula, koko nyakane yema tshitshɛ.+ Nyu nyekɔ lo ndɛ, koko hanyolote. Nyu nyekɔ lo nnɔ, koko hanyodjɔ. Nyu nyekɔ lo nkomba ahɔndɔ, koko ndooko onto loka dungu. Ɔnɛ lafutama mbidjaka difuto diande lo tapa dia wesho wesho.’”
7 “Jehowa kanga lolembelembe kata ate: ‘Nyodje etema anyu lo* mboka yanyu.’
8 “Jehowa kata ate: ‘Nyotshu lo dikona ndo nyotoye la esongo.+ Nyoke luudu+ dia dimi ngɛnangɛna la lɔ ndo tombɔma.’”+
9 “Jehowa kanga lolembelembe kata ate: ‘Nyu nyakalongamɛka efula, koko nyakalongolaka yema tshitshɛ; ndo etena kakanyayiɔtshiya lo luudu, dimi lakayifumboya+ la lɔpɛpɛ. La ɔkɔkɔ akɔna? Nɛ dia luudu lami lambolana etena kele onto l’onto l’atei anyu ndawɔka dia tokokɛ luudu+ lande hita.
10 Ɔnkɔnɛ, olongo wa la diko dianyu wakakakatɛ loonge ndo nkɛtɛ yakakakatɛ tombatomba diayɔ.
11 Ndo dimi lakatetemala mbelɛ ɔwɔ lo nkɛtɛ, lo akona, lo ntɔngɔ, lo wanu w’eyoyo, lo esɔ, lo kɛnɛ katomba oma lo nkɛtɛ, le anto, le dongalonga ndo lo olimu tshɛ wa wolo w’anya anyu.’”
12 Zerubabɛlɛ+ ɔna Shɛalatiyɛlɛ+ nde la ɔlɔmbɛdi Jashua ɔna Jɛhɔzadaka+ ndo anto akina tshɛ wakahokamɛ dui dia Jehowa Nzambi kawɔ ndo ɛtɛkɛta w’omvutshi Hangayi, nɛ dia Jehowa Nzambi kawɔ kakootome; ko anto wakatatɛ mboka Jehowa wɔma.
13 Oma laasɔ, Hangayi ɔkɛndji wa Jehowa akewoya anto losango lɔnɛ lo yoho yɔtɔnɛ la ɔkɛndɛ wakawosha Jehowa ɔnɛ: “Jehowa kata ate: ‘Dimi lekɔ kaamɛ la nyu.’”+
14 Ɔnkɔnɛ, Jehowa akasɛngiya yimba+ ya Zerubabɛlɛ ɔna Shɛalatiyɛlɛ nguvɛrnɛrɛ ka Juda,+ ɔlɔmbɛdi Jashua+ ɔna Jɛhɔzadaka, ndo timba t’anto akina tshɛ; ko vɔ wakaye ndo wakatatɛ olimu wa luudu la Jehowa kanga lolembelembe, Nzambi+ kawɔ.
15 Akambo asɔ wakasalema lo ngɔndɔ ka 6 nshi 24 lo ɔnɔnyi wa 2 w’ɛlɔmbwɛlɔ ka nkumekanga Dariyo.+
Nɔtɛ ka l'ɛse ka dikatshi
^ Kitshimudi ate: “Akotɔ lo Fɛtɛ.”
^ Kana “tɛmpɛlɔ.”
^ Kana “nyomokama.”
^ Kana “Nyodje yambalo y’efula lo.”
^ Kana “Nyodje yambalo y’efula lo.”
