Hangayi 2:1-23
2 Lo ngɔndɔ ka 7 nshi 21, ɔtɛkɛta wa Jehowa wakaye lo tshimbo y’omvutshi Hangayi+ ɔnɛ:
2 “Lam’alangayɛ, mbola Zerubabɛlɛ+ ɔna Shɛalatiyɛlɛ, nguvɛrnɛrɛ ka Juda+ nde la Jashua+ ɔlɔmbɛdi a laadiko, ɔna Jɛhɔzadaka+ ndo anto akina tshɛ wate:
3 ‘Akɔna ambotshikala l’atei anyu akɛnyi luudu* lɔnɛ etena kakilɔ la lotombo ntondo?+ Ngande wonyoliɛna? Shi lɔ lɛnama oko ɛngɔ k’anyanya lo mbɛdika+ la la ntondo?’
4 “Jehowa kata ate: ‘Kakianɛ, Zerubabɛlɛ, keketala ndo Jashua ɔlɔmbɛdi a laadiko ɔna Jɛhɔzadaka, keketala.’
“Jehowa kata ate: ‘Nyu anto tshɛ wa lo wodja,+ nyokeketale ndo nyokambe olimu.’
“‘Nɛ dia dimi lekɔ kaamɛ la nyu,’+ mbata Jehowa kanga lolembelembe.
5 ‘Nyohɔ kɛnɛ kakamanyolake etena kakanyatombe oma l’Edjibito+ ndo kaki nyuma kami l’atei anyu.*+ Tanyokake wɔma.’”+
6 “Nɛ dia Jehowa kanga lolembelembe kata ate: ‘Mbala kekina, keema edja, dimi layosutshasutsha olongo, nkɛtɛ, ndjale ndo nkɛtɛ y’ofumbo.’+
7 “Jehowa kanga lolembelembe kata ate: ‘Dimi layosutshasutsha wedja tshɛ ndo diangɔ di’oshinga wolo* dia wedja diayoya;+ ko dimi layolodia luudu lɔnɛ la lotombo.’+
8 “Jehowa kanga lolembelembe kata ate: ‘Mfɛsa yami mbeyɔ, ndo paonyi yami mbeyɔ.’
9 “Jehowa kanga lolembelembe kata ate: ‘Lotombo la luudu lɔnɛ lo nshi yayaye layoleka la ntondo.’+
“‘Ndo dimi layela wɔladi+ lo dihole nɛ,’ mbata Jehowa kanga lolembelembe.”
10 Lo ngɔndɔ ka 9 nshi 24, lo ɔnɔnyi wa 2 w’ɛlɔmbwɛlɔ ka Dariyo, ɔtɛkɛta wa Jehowa wakaye le omvutshi Hangayi+ ɔnɛ:
11 “Jehowa kanga lolembelembe kata ate: ‘Lam’alangayɛ, mbola ɛlɔmbɛdi lo dikambo di’ɛlɛmbɛ+ wate:
12 “Naka onto ekɔ lo tɛmbɛ nyama k’ekila lo difunda dia dihɔndɔ diande, ko dihɔndɔ diande diambosakana la mapa kana osawo kana wanu kana esɔ kana woho tshɛ w’ɛngɔ ka ndɛ, onde tɔ kayonga ekila?”’”
Ɛlɔmbɛdi wakakadimola vate: “Ndooko!”
13 Oma laasɔ, Hangayi akambola ate: “Naka onto lele mindo l’ɔtɛ wambondosakana la odo* ambosakanya ɛngɔ kɛmɔtshi l’atei wa diangɔ sɔ, onde tɔ kayonga mindo?”+
Ɛlɔmbɛdi wakakadimola vate: “Tɔ kayonga mindo.”
14 Ɔnkɔnɛ Hangayi akate ate: “Jehowa kata ate: ‘Ngasɔ mbele anto anɛ, ngasɔ mbele wodja ɔnɛ la ntondo kami, ndo ngasɔ mbele olimu tshɛ w’anya awɔ. Kɛnɛ tshɛ kalambolawɔ lɛkɔ kekɔ mindo.’
15 “‘Koko lam’alanganyu, oma lo ɛlɔ ndo otsha la ntondo, nyodje etema anyu lo* dikambo nɛ: La ntondo ka dive kitshama laadiko dia dive lo tɛmpɛlɔ ka Jehowa,+
16 ngande waki akambo? Etena kakayaka onto lo tota dia ntɔngɔ, alongamɛ tɛdikɔ 20, aki paka 10; ndo etena kakayaka onto lo diamula dia ndjɔtɛkɔla tɛdikɔ 50 lɔkɔ, aki paka 20.+
17 Dimi lakanyotomɛ nyu, elimu tshɛ w’anya anyu, tanyi talongoya diononɛ, mombolenge+ ndo mvula ka mbɔkɔ, koko ndooko onto l’atei anyu lakakalola le mi,’ mbata Jehowa.
18 “‘Lam’alanganyu, oma lo ɛlɔ ndo otsha la ntondo, nyodje etema anyu lo* dikambo nɛ, oma ko ngɔndɔ ka 9 nshi 24, oma ko lushi lakahikama etshina+ ka tɛmpɛlɔ ka Jehowa; nyodje etema anyu lo dikambo nɛ:
19 Onde woho wekekɔ lo luudu la eombelo?*+ Ɔkɔdi wa vinyɔ, osongo wa fingo, osongo wa pɔmɛgranatɛ ndo osongo w’ɔlivɛ wataatɔ elowa, nshi mɛtɛ? Oma lo ɛlɔ, dimi layotoma ɔtshɔkɔ.’”+
20 Ɔtɛkɛta wa Jehowa wakaye mbala ka 2 le Hangayi lo ngɔndɔ+ kakɔ nshi 24 ɔnɛ:
21 “Tɛɛ Zerubabɛlɛ nguvɛrnɛrɛ ka Juda wate: ‘Dimi layanga nyinginya olongo la nkɛtɛ.+
22 Dimi layokasha kiti ya lowandji ya waolelo ndo layoshidiya wolo wa waolelo wa wedja.+ Dimi layokasha pusupusu l’ambahemi atɔ, ndo mfalasa l’ambahemi ayɔ wayɔkɔ, onto l’onto la lokuwa la ta laki ɔnango.’”+
23 “Jehowa kanga lolembelembe kata ate: ‘Lushi lɔsɔ, dimi layokɔsa wɛ okambi ami Zerubabɛlɛ+ ɔna Shɛalatiyɛlɛ,+ dimi layokɔsa oko mpɛtɛ ka ohomɔ, nɛ dia wɛ ekɔ ɔnɛ lakamasɔnɛ,’ mbata Jehowa kanga lolembelembe.”
Nɔtɛ ka l'ɛse ka dikatshi
^ Kana “tɛmpɛlɔ.”
^ Kana ondo “ndo etena kakemala nyuma kami l’atei anyu.”
^ Kana “dia nɛmɔ.”
^ Kana “la anima.” Enda Elembetshielo.
^ Kana “nyodje yimba y’efula lo.”
^ Kana “nyodje yimba y’efula lo.”
^ Kana “difuku dia ntɔngɔ?”
