Isaya 36:1-22
36 L’ɔnɔnyi wa 14 w’ɛlɔmbwɛlɔ ka nkumekanga Hɛzɛkiya, Sɛnakɛribɛ nkumekanga k’Asuriya+ akaye ndjɔlɔsha esomba tshɛ w’ase Juda wakadingama la mpele ndo akawaɔshi.+
2 Oma laasɔ, nkumekanga k’Asuriya akatome Rabishakɛ*+ kaamɛ la olui wa woke w’asɔlayi w’oma la Lakishi+ otsha le nkumekanga Hɛzɛkiya la Jɛrusalɛma. Vɔ wakatemala suke la ɔlɔnda watɔla ashi otsha lo difuku di’ashi dia la diko+ diele lo mboka ka woke k’otsha lo ekambɔ k’osodi w’ahɔndɔ.+
3 Ko Eliyakima+ ɔna Hilikiya laki owandji w’ase luudu* la nkumekanga, Shebina+ laki ofundji ndo Joa ɔna Asafu laki ɔkɔndɔdi wakatombe oya le nde.
4 Ko Rabishakɛ akawatɛ ate: “Lam’alanganyu, nyote Hɛzɛkiya nyate: ‘Nkumekanga ka woke, nkumekanga k’Asuriya kata ate: “Lende ohikami wɛkamu ayɛ?+
5 Wɛ ekɔ lo mbuta wate: ‘Lekɔ la diewo ndo la wolo wa ndɔ ta,’ koko ɔsɔ ekɔ ɛtɛkɛta w’anyanya. Le na amboyoyaɛkɛ katoyosombɔ tɔmbɔkwɛmi?+
6 Eenda, wɛ ekɔ lo ndjaɛkɛ lo osukɔ w’Edjibito, lɔkɔmbɛ lambɔtɛtshatɛtshama lele naka onto liɛkama, kete layowɔtɔ lo diwambo ndo layowotondola. Ngasɔ mbele Farawɔ nkumekanga k’Edjibito le wanɛ tshɛ wayaɛkɛ le nde.+
7 Ndo naka nyu mbutɛmi nyate: ‘Tekɔ lo ndjaɛkɛ le Jehowa Nzambi kaso,’ shi nde kakanga ahole wa la diko ndo dilambwelo diambonya Hɛzɛkiya+ etena katɛnde Juda la Jɛrusalɛma ate: ‘Nyu pombaka nkusama la ntondo ka elambwelo kɛnɛ’?”’+
8 Ɔnkɔnɛ lam’alangayɛ, nyɔkɔhɛ wɛ la nkumɛmi nkumekanga k’Asuriya nganɛ:+ Dimi layokosha mfalasa nunu pende (2 000) naka wɛ kokaka ntana ambahemi ayɔ.
9 Ko ngande wayoyokoka mbitshanya kaanga nguvɛrnɛrɛ 1 koleki tshitshɛ l’atei w’ekambi wa nkumɛmi lo ndjaɛkɛ le Edjibito dia kosha pusupusu ndo ambahemi wa mfalasa?
10 Shi la lotshungɔ l’oma le Jehowa kamomoya ndjɔlɔsha wodja ɔnɛ dia mbolanya? Jehowa ndamɛ akambutɛ ate: ‘Tshɔka tɔlɔsha wodja ɔnɛ kele towolanya.’”
11 Ko Eliyakima nde la Shebina+ ndo Joa wakatɛ Rabishakɛ vate:+ “Lam’alangayɛ, tɛkɛta la ekambi ayɛ lo Arameyɛ*+ dikambo sho mbokaka ɔtɛkɛta akɔ. Tɔtɛkɛtake la so l’ɔtɛkɛta w’ase Juda diaha anto wele lo ehele mboka.”+
12 Koko Rabishakɛ akate ate: “Onde paka le yɛ wɛ la nkumɛyɛ oto mbakantome nkumɛmi dia ndjota ɛtɛkɛta ɛsɔ? Shi ndo le apami wodjashi lo ehele, wanɛ wayɔlɛ tumi tawɔ hita ndo wayɔnɔ wanyi awɔ hita kaamɛ la nyu?”
13 Oma laasɔ, Rabishakɛ akemala ndo akawelɛ l’ɔtɛkɛta w’ase Juda+ ate: “Nyohokame dui dia nkumekanga ka woke, nkumekanga k’Asuriya.+
14 Nkumekanga kata ate: ‘Tanyetawɔke dia Hɛzɛkiya nyokesa, nɛ dia nde bu la akoka wa nyotshungola.+
15 Ndo tanyetawɔke dia Hɛzɛkiya nyokonya dia nyu ndjaɛkɛ le Jehowa+ lo mbuta ɔnɛ: “Ndooko onyake Jehowa ayototsha ndo osomba ɔnɛ hawotokimɔma lo anya wa nkumekanga k’Asuriya.”
16 Tanyohokamɛke Hɛzɛkiya, nɛ dia nkumekanga k’Asuriya kata ate: “Nyodje ki la mi ndo nyoyakimɔ* ko onto l’onto ayɔlɛka diangɔ di’oma lo ɔkɔdi ande wa vinyɔ, di’oma l’osongo ande wa fingo ndo ayɔnɔka ashi w’oma lo ɛtɛkɔ kande hita,
17 polo lam’ayomoya ko ndjonyɔsa dia nyɔtɔla otsha lo wodja wele oko wodja anyu hita,+ wodja wele la ntɔngɔ ndo la wanu w’eyoyo, wodja wele la mbo ya ndɛ ndo la dikambɔ dia vinyɔ.
18 Tanyetawɔke dia Hɛzɛkiya nyokesa lo nyotɛ ate: ‘Jehowa ayototshungola.’ Onde ekɔ jambizambi mɔtshi y’ase wedja yambotshungolaka wodja ayɔ oma lo anya wa nkumekanga k’Asuriya?+
19 Lende ele tozambizambi ta Hamatɛ ndo ta Arapadɛ?+ Lende ele tozambizambi ta Sefaravayima?+ Onde tɔ takatshungola Samariya oma lo anya ami?+
20 Akɔna l’atei wa tozambizambi tshɛ ta wedja ɛsɔ akatshungola wodja awɔ oma lo anya ami, dia Jehowa ndjotshungola Jɛrusalɛma oma lo anya ami?”’”+
21 Koko vɔ wakɔlama ki ndo vɔ kombokadimola ndooko dui, nɛ dia nkumekanga akate ate: “Tanyookadimolake.”+
22 Koko Eliyakima ɔna Hilikiya laki owandji w’ase luudu* la nkumekanga, Shebina+ laki ofundji ndo Joa ɔna Asafu laki ɔkɔndɔdi, wakaye le Hɛzɛkiya la ahɔndɔ awɔ wa batatɛ ko wakawotɛ ɛtɛkɛta wa Rabishakɛ.
Nɔtɛ ka l'ɛse ka dikatshi
^ Kana “kapita k’amangudi wa wanu.”
^ Kana “luudu l’owandji.”
^ Kana “Suriya.”
^ Tshɛk., “Nyosale ɔtshɔkɔ kaamɛ la mi ndo nyoye le mi.”
^ Kana “luudu l’owandji.”
