Isaya 41:1-29
41 “Nyɔlɛmbɔhale, nyompokame* nyu asɛnga;Wedja wakondja wolo awɔ nto.
Vɔ wasukane; oma laasɔ vɔ watɛkɛtɛ.+
Nyoye tosukane kaamɛ lo kilombo.
2 Akɔna akonyiya onto ɔmɔtshi oma lo ehotwelo ka wonya,*+Lo mbeelɛ la losembwe oya lo ekolo Ande,*Dia nkimɔ wedja le ndeNdo dia mbokimanyiya dia nde nɛndja nkumi ya dikanga?+
Awaetɛ otoko oto la ntondo ka lokuwa lande la ta,Oko watɛmbamaka lɔsɔdu la lɔpɛpɛ la ntondo k’ota ande?
3 Nde mbayelaka, mbetaka aha la wekamuLo mboka yahatetaka ekolo ande.
4 Akɔna akatshe ndo akasale dui nɛ,Lo mbelɛ nɔnga oma ko etatelo?
Dimi Jehowa, kele La Ntondo;+Ndo otsha le w’ekomelo, dimi haatshikitana.”+
5 Asɛnga wambodiɛna ndo wamboka wɔma.
Tokoma ta nkɛtɛ tambotatɛ didima.
Tɔ tambosukana ndo tamboya oya la ntondo.
6 Onto l’onto kimanyiyaka osekandeNdo mbutɛka ɔnango ate: “Keketala.”
7 Ɔnkɔnɛ, Otshudi w’abaya keketshaka otshudi wa mbolo;+Ɔnɛ latshula yaandjo la maditɔKeketshaka ɔnɛ latshula la nyondo
Nde mbutaka dikambo di’ɔsɔngɛlɔ ate: “Ekɔ dimɛna.”
Oma laasɔ, vɔ kakatanyemaka la nsɛti diaha vɔ nsukasuka.
8 “Koko Isariyɛlɛ le, wɛ ekɔ okambi ami,+Jakɔbɔ le, wɛ kakamasɔnɛ,+Ɔna* Abrahama, ɔngɛnyi ami,+
9 Wɛ lakamɔshi oma lo tokoma ta nkɛtɛ,+Ndo wɛ lakamelɛ oma lo ahole atɔ woleki etale.
Dimi lakakotɛ nte: ‘Wɛ kele okambi ami;+Dimi lakakɔsɔnɛ; dimi kokɔsɛka.+
10 Tokake wɔma, nɛ dia dimi lekɔ kaamɛ la yɛ.+
Toyakiyanyake, nɛ dia dimi kele Nzambi kayɛ.+
Dimi layokokeketsha, eelo, dimi layokokimanyiya,+Lo mɛtɛ dimi layokokimɛ la lonya lami l’omi la losembwe.’
11 Eenda, wanɛ tshɛ woka nkɛlɛ wayoshama nsɔnyi ndo wayɔnywama.+
Wanɛ walɔ la yɛ wayolanyema ndo wayoshishɔ.+
12 Wɛ ayoyanga anto walɔ la yɛ koko wɛ hatowatana;Anto walɔ la yɛ wayonga oko ɛngɔ kahongaka, oko ndooko ɛngɔ.+
13 Nɛ dia dimi Jehowa Nzambi kayɛ kokimɛka lo lonya layɛ l’omi,Dimi kotɛka nte: ‘Tokake wɔma. Dimi layokokimanyiya.’+
14 Tokake wɔma, wɛ ɔsɔhɔ* Jakɔbɔ,+Apami w’Isariyɛlɛ le, dimi layonyokimanyiya,” mbata Jehowa, Otshungodi+ anyu, l’Ekila la Isariyɛlɛ.
15 “Eenda, dimi lamboketɛ ɔhɛlɔ w’esuswelo,+Ehomɔ k’oyoyo k’esuswelo kele la ehembo 2 wa wanyu.
Wɛ ayɔhɔtshahɔtsha akona ndo ayowaminolaNdo ayetɛ tokonakona oko fufudi.
16 Wɛ ayotifufola,Ko lɔpɛpɛ layotiɛmba;Lɔpɛpɛ la wolo layotihandjola.
Wɛ ayɔngɛnangɛna le Jehowa,+Ndo wɛ ayoyafuna le l’Ekila la Isariyɛlɛ.”+
17 “Amɛnyi mfɔnu ndo ase wola wekɔ lo nyanga ashi, koko ndooko kaanga piɔpɔ.
Wodi awɔ wamboma la mposa k’ashi.+
Dimi Jehowa layowakadimola.+
Dimi Nzambi ka Isariyɛlɛ hantowasɛka.+
18 Dimi layosala dia ɛkɛdi nkɛla lo tokonakona ta hwe+Ndo tɛkɔ lo ekidi.+
Dimi layokadimola oswe wa shɛnga difuku di’ashi diele la asɔpɔNdo nkɛtɛ ya womu tɛkɔ di’ashi.+
19 Lo oswe wa shɛnga, dimi layonɛ osongo w’olondo,Osongo wa akasia ndo mirtɛ ndo osongo wa pinɛ.+
Lo laandja l’oswe, dimi layonɛ osongo wa dihake,Kaamɛ la osongo wa frɛnɛ* ndo osenge,+
20 Kele anto tshɛ kawɛnyi ndo kaweyeNdo kawodje yimba ndo kawoshihodiaDia lonya la Jehowa mbosadi dui diakɔ,L’Ekila la Isariyɛlɛ mbakaditonge.”+
21 “Nyote akambo anyu,” mbata Jehowa.
“Nyotondja tokanyi tanyu,” mbata nkumekanga ka Jakɔbɔ.
22 “Nyotondja djembetelo ndo nyotote akambo wayotomba.
Nyotote akambo wakete,*Dia sho nkana yimba lɔkɔ* ndo mbeya etombelo awɔ.
Kana nyotote akambo wayaye.+
23 Nyotote kɛnɛ kayosalema lo nshi yayaye,Kele teye dia nyekɔ tozambizambi.+
Eelo, nyosale dui dimɔtshi di’ɔlɔlɔ kana dia kɔlɔ,Dia sho mamba lam’ayotodiɛna.+
24 Nyende, nyu nyekɔ ɛngɔ kahongaka,Ndo kɛnɛ kasalanyu kekɔ anyanya.+
Onto tshɛ lanyɔsɔna ekɔ wɔnɔnyi.+
25 Dimi lakonyiya onto ɔmɔtshi oma lo nɔrdɛ ndo nde ayokoma,+Ɔmɔtshi oma lo ehotwelo ka wonya,*+ ɔnɛ layelɛ* lokombo lami.
Nde ayɔhɔtshahɔtsha emboledi wate kana diwomba,+Oko okengi wa mpoke kahɔtshahɔtsha diwomba.
26 Akɔna akate akambo anɛ oma ko etatelo dia sho mbeya,Kana oma lo tena diakete dia sho mbuta shate: ‘Nde kasɔ’?+
Lo mɛtɛ, ndooko onto lakadiewoya!
Ndooko onto lakadite!
Ndooko onto lakoke dui dimɔtshi oma le nyu!”+
27 Dimi kaki onto la ntondo la mbutɛ Siɔna nte: “Eenda, vɔ anɛ!”+
Ndo dimi layotomɛ Jɛrusalɛma ɔmɛmbi wa lokumu l’ɔlɔlɔ.+
28 Koko dimi lakatetemala menda, koko ndooko onto lakikɔ;Komonga ndooko ɔtɔi l’atei awɔ dia mbisha dako.
Ndo dimi lakatetemalaka mbalɔmba dia nkadimola.
29 Eenda, vɔ tshɛ wekɔ ɛngɔ kele bu mɛtɛ.*
Elimu awɔ wekɔ anyanya.
Dikishi diawɔ dia la mbolo diekɔ lɔpɛpɛ ndo kɛnɛ kele bu mɛtɛ.+
Nɔtɛ ka l'ɛse ka dikatshi
^ Kana “Nyɔlɛmbɔhale la ntondo kami.”
^ Kana “oma lo ɛstɛ.”
^ Mbuta ate dia mbokambɛ.
^ Tshɛk., “lɔtɔngɔ.”
^ Mbuta ate lele bu la ekokelo ndo lele l’ɛse.
^ Osongo wa woke wola polo mɛtrɛ 15. Vɔ wekɔ la akatshi w’ɛlɛsɛlɛsɛ ndo la ntahe y’ɛkɛsɛkɛsɛ oko otoko.
^ Tshɛk., “wa ntondo.”
^ Kana “mbidja etema aso.”
^ Kana “oma lo ɛstɛ.”
^ Kana “layɔtɛndɛ.”
^ Kana “ɛngɔ kahatongaka.”
