Isaya 49:1-26
49 Nyompokame nyu asɛnga,Nyodje yimba nyu wedja w’etale.+
Jehowa akambelɛ la ntondo ka dimi mbotɔ.*+
Oma ko etena kakimi lo dikundju dia mama nde akatɛkɛta dia lokombo lami.
2 Nde akasale onyɔ ami oko lokuwa la mpɛmɔ;Nde akambishɛ lo dɛdi dia lonya lande.+
Nde akansale lohito l’ɔsɔdi;Nde akambishɛ lo mpata kande.
3 Nde akambutɛ ate: “Isariyɛlɛ le,+ wɛ kele okambi ami,Ɔnɛ lele oma lo tshimbo yande mbayomɛnya lɔnɛnɛ lami.”+
4 Koko dimi lakate nte: “Dimi lakɛnyi paa wɛnɛna.
Dimi lakakambaka la wolo ami okambakamba lo dui diele bu mɛtɛ.
Koko lo mɛtɛ kilombo kami kekɔ kaamɛ la Jehowa,*Ndo difuto diami diekɔ kaamɛ la Nzambi kami.”+
5 Kakianɛ Jehowa, Ɔnɛ lakankenge oma ko dikundju oko okambi ande,Akambutɛ dia nkaloya Jakɔbɔ le nde,Dia Isariyɛlɛ sanganyema le nde.+
Dimi layotombɔma lo washo wa Jehowa,Ndo Nzambi kami ayonga wolo ami.
6 Nde akate ate: “Atakoke lo woho weyɛ okambi amiDia mbidiya waoho wa JakɔbɔNdo dia nkaloya ase Isariyɛlɛ wakalamema.
Dimi lakakokimɔ nto oko osase wa wedja,+Dia panda kami nkoma lo tokoma ta nkɛtɛ.”+
7 Nganɛ mbatɛ Jehowa, Otshungodi wa Isariyɛlɛ, l’Ekila+ lakinde, ɔnɛ lɔnyɔma,*+ ɔnɛ lahetshama oma le wedja, okambi wa emboledi ate:
“Nkumi ya dikanga wayɛna ko wayonɛɛ,Ndo ewandji wayokusamaL’ɔtɛ wa Jehowa, ɔnɛ lele la kɔlamelo,+L’Ekila la Isariyɛlɛ, ɔnɛ lambokɔsɔna.”+
8 Jehowa kata ate:
“Lo etena k’ɔlɔlɔ dimi lakakokadimola,+Ndo lo lushi la panda, dimi lakakokimanyiya;+Dimi lakatetemala kokokɛ dia kokimɔ oko sheke le anto,+Dia nɔngɔsɔla wodja,Dia nsala dia vɔ mbɔsa tenyi diawɔ di’okitɔ diakalana,+
9 Dia mbutɛ ase lokanu ɔnɛ: ‘Nyotombe!’+
Ndo wanɛ wele lo wodjima ɔnɛ:+ ‘Nyoyaɛnya!’
Koko l’omamu wa mboka mbayowɔlɛ,L’omamu wa mboka tshɛ yambolana kayonga ahole awɔ wa ndesha dongalonga.
10 Vɔ hawotoyala la ndjala kana la mposa k’ashi,+Laladi la wolo kana yanyi hatowakɔmɔla.+
Nɛ dia Ɔnɛ lawaoka kɛtshi ayowalɔmbɔla,+Ndo nde ayowalɔmbɔla suke la tɛkɔ di’ashi.+
11 Dimi layetɛ akona ami tshɛ mboka,Ndo ɛsɛsɛ ami wa weke wayodiyama.+
12 Eenda, wanɛ wekɔ lo ndjaye oma lo etale,+Ndo eenda, wanɛ w’oma lo nɔrdɛ ndo w’oma lo owɛstɛ,Ndo wanɛ w’oma lo wodja wa Sinimɛ.”+
13 Da ekoko w’ɔngɛnɔngɛnɔ, wɛ olongo ndo ngɛnangɛna wɛ nkɛtɛ.+
Akona wangɛnɛngɛnɛ la ekoko w’ɔngɛnɔngɛnɔ.+
Nɛ dia Jehowa ambosamba anto ande,+Ndo nde amboka amɛnyi mfɔnu+ ande kɛtshi.
14 Koko Siɔna akatetemala mbuta ate:
“Jehowa ambɔnsɛka+ ndo Jehowa ambombohɛ.”+
15 Onde womoto koka mbohɛ ɔnande lalɔnyandeKana onde nde hatoka ɔna l’oma lo dikundju diande kɛtshi?
Oyadi kaanga wamato asɔ wayohɛ, dimi hakohɛki pondjo.+
16 Eenda, dimi lakakofunde la otshimɔ lo awambo ami.
Mpele diayɛ diekɔ nshi tshɛ la ntondo kami.
17 Anayɛ wambokalola la lowango.
Wanɛ wakakonyukola ndo wakakohandjola wayomɔ oma le yɛ.
18 Edia washo ayɛ kele enda lo bɛkɛ tshɛ.
Vɔ tshɛ wekɔ lo ntshumana kaamɛ.+
Vɔ wekɔ lo ndjaye le yɛ.
Jehowa kata ate: “Lo mɛtɛ oko wemi la lɔsɛnɔ,Wɛ ayoyalɔtsha la wɔ vɔ tshɛ oko dɛngalɛnga,Ndo wɛ ayoyakelekawɔ oko watosalaka womoto layanga ntshukama.
19 Kaanga mbele ahole ayɛ wakahandjɔma ndo wakalanyema ndo wodja ayɛ wakalanyema,+Kakianɛ vɔ wayanga monga mpika efula le wanɛ wadjasɛ lɛkɔ,+Ndo wanɛ wakakɔmɛnɛ+ wayonga etale.+
20 Ana wakotɔ lam’akiyɛ la otanda wayokotɛ vate:‘Dihole nɛ diamboleka mpika le mi.
Onyange dihole kele mbidjasɛ lanɛ.’+
21 Ko wɛ ayota l’otema ayɛ wate:‘Akɔna akambotɛ ana anɛ,Lam’ele dimi lekɔ womoto lele lo otanda w’anande ndo lele ekomba,Mfumbe ndo ose lokanu?
Akɔna akodia ana anɛ?+
Eenda, dimi lakatshikala dimɛ,+Ko oma lende oye wanɛ?’”+
22 Nkum’Olongo Nkumadiɔndjɔ Jehowa kata ate:
“Eenda, dimi layonyiya lonya lami otsha le wedja,Ndo dimi layodiya djembetelo* yami otsha le anto.+
Vɔ wayɛmba anayɛ w’apami lo ahɛlɔ* awɔNdo wayɛmba anayɛ wa wamato lo ahɛka awɔ.+
23 Nkumi ya dikanga wayonga alami ayɛ,+Ndo ana wa wamato wa nkumekanga wayonga ɛndɛdi ayɛ.
Vɔ wayokokusamɛ dungi polo la nkɛtɛ+Ndo wayɔlɔmbɔla ditshu dia l’ekolo ayɛ,+Ko wɛ ayohomba mbeya dia dimi kele Jehowa;Wanɛ walongamɛ le mi hawotoshama nsɔnyi.”+
24 Onde wanɛ wakashile mindama oma le pami ka wolo koka tshungɔma,Kana onde mfumbe ya kanga hiadi koka tshungɔma?
25 Koko Jehowa kata ate:
“Kaanga mfumbe ya pami ka wolo yayotshungɔma,+Ndo wanɛ wakandama oma le kanga hiadi wayotshungɔma.+
Dimi layɔlɔsha wanɛ wakɔlɔsha,+Ndo dimi layoshimbɛ anayɛ.
26 Dimi layosala dia wanɛ wakɔhɛnyahɛnya ndɛ emunyi awɔ hita,Ndo oko wanu wa mpɛ, vɔ wayodjɔ la dikila diawɔ hita.
Ko anto* tshɛ wayohomba mbeya dia dimi kele Jehowa,+Oshimbedi ayɛ+ ndo Otshungodi ayɛ,+Kanga Wolo laki Jakɔbɔ.+
Nɔtɛ ka l'ɛse ka dikatshi
^ Tshɛk., “oma lo dikundju.”
^ Kana “Jehowa ayombisha losembwe.”
^ Kana “lɔnyɔma lo anima.”
^ Tshɛk., “ntolo.”
^ Kana “ekundji ka djembetelo.”
^ Tshɛk., “emunyi.”
