Isaya 53:1-12
53 Akɔna akonge la mbetawɔ lo kɛnɛ kakawoke oma le so?*+
Ndo le na akɛnama+ lonya la Jehowa?+
2 Nde ayola oko dimɔnga+ la ntondo kande,* oko odio oma lo nkɛtɛ ya womu.
Nde bu la diema dia diambo ndo bu la lɔnɛnɛ;+Ndo lam’awɛnaso, ɛnamelo kande hatokotola le nde.*
3 Anto wakawɔnyɔla ndo wakɔsɛkɛ,+Onto lakahombe diɛnɛ la* kandji ndo lakekesanɛ la hemɔ.
Aki oko elungi kande kakashɛma oma le so.*
Nde akɔnyɔma ndo takawɔshi oko onto l’anyanya.+
4 Lo mɛtɛ, nde ndamɛ akɛmbɛ hemɔ yaso,+Ndo nde akɛmbɛ paa yaso.+
Koko sho takawɔshi oko onto lambosoyama, lambɔkɔmama oma le Nzambi ndo ɔmɛnyi mfɔnu.
5 Koko nde akongɔma dikɔnga+ l’ɔtɛ wa kɔlɔ yaso;+Nde akaminɔma l’ɔtɛ wa munga yaso.+
Nde akakikɛ dilanya dikambo dia wɔladi aso,+Ndo l’ɔtɛ wa mpota yande sho takakɔnɔ.+
6 Sho tshɛ takanganɛ oko ɛkɔkɔ,+Onto l’onto akatshu lo mboka kande hita,Ko Jehowa akasale dia munga yaso sho tshɛ mpomana la nde.+
7 Nde akasoyama+ ndo aketawɔ nsowa,+Koko nde kombifola onyɔ ande.
Nde akatɔlama oko ɔkɔkɔ otsha lo ediakelo,+Oko ɔkɔkɔ wɔlama ki la ntondo ka ɔnɛ lohembola wɛɔsa,Ndo nde kombifola onyɔ ande.+
8 L’ɔtɛ wa ɔsɔkishelo ndo wa kilombo mbakandatɔlama;Ndo akɔna ayoyakiyanya lo kiambokambo tshɛ yendana la lɔlɔnga lande?*
Nɛ dia nde akanyɛma oma lo wodja wa wanɛ wasɛna;+L’ɔtɛ wa kɔlɔ y’anto ami nde akakɔmama eshingɔ.*+
9 Wakawosha diombo* kaamɛ la akanga wa kɔlɔ,+Ndo kaamɛ la kanga ɔngɔnyi lo nyɔi kande,+Kaanga mbakinde kosala ndooko kɔlɔ*Ndo lokeso kotanema lo onyɔ ande.+
10 Koko Jehowa kakalange* dia mbominola ndo nde aketawɔ dia nde ntata hemɔ.
Naka wɛ ayokimɔ lɔsɛnɔ* lande oko olambo wa onongo,+Nde ayɛna ɔnande,* nde ayotaloya nshi yande,+Ndo lo tshimbo yande kayotondoyama ɔngɛnɔngɛnɔ* wa Jehowa.+
11 L’ɔtɛ wa paa* kande, nde ayɛna ko ayɔngɛnangɛna.
Lo tshimbo ya ewo kande, onto ɔlɔlɔ, okambi ami,+Ayosala dia anto efula monga anto w’ɛlɔlɔ,+Ndo nde ayɛmba munga yawɔ.+
12 L’ɔtɛ wa ɔkɔkɔ ɔsɔ dimi layowosha yema l’atei wa anto efula,Ndo nde ayokahana diangɔ dia dimbo la akanga wa wolo,Nɛ dia nde akakimɔ lɔsɛnɔ* lande polo lo nyɔi+Ndo akadiema l’atei wa atshi wa kɔlɔ;+Nde akɛmbɛ pɛkato ka anto efula,+Ndo akalɔmbɛ lo wahɔ wa atshi wa kɔlɔ.+
Nɔtɛ ka l'ɛse ka dikatshi
^ Kana ondo “lo kɛnɛ kakatoke?”
^ “Kande” koka mendana la ɔsɛdingodi ɔmɔtshi kana la Nzambi.
^ Kana “bu la ɛnamelo ka laande kahombaso mbokombola.”
^ Kana ondo “Nde aki oko onto lele anto wakanya dungi diawɔ oma le nde.”
^ Kana “lakashihodia.”
^ Kana “yoho yande ya lɔsɛnɔ?”
^ Kana “akakɔmama polo lo nyɔi.”
^ Kana “Ndo onto ɔmɔtshi ayokimɔ diombo diande.”
^ Kana “awui wa ngala.”
^ Kana “lolango; kɛnɛ kangɛnangɛna.”
^ Tshɛk., “lɔtɔngɔ lande.”
^ Kana “anima.”
^ Kana “Koko Jehowa akangɛnangɛna.”
^ Kana “okiyanu wa anima ande.”
^ Kana “anima.”
