Isaya 59:1-21
59 Eenda, lonya la Jehowa bu mondo dia nshimbɛ,+Ndo atoyi ande hawodihami* dia mboka.+
2 Keema. Munga yanyu hita mbambonyokakitola la Nzambi kanyu.+
Pɛkato yanyu mbambookonya dia nde mbishɛ elungi kande oma le nyu,Ko nde hayolanga nyohokamɛ.+
3 Nɛ dia anya anyu wambɔtɔ mindo la dikila+Ndo mpita yanyu la munga.
Ɛlɔmɔ anyu mbutaka kashi+ ndo nemi yanyu tɛkɛtaka awui wa kɔlɔ.
4 Ndooko onto lawelɛ l’ɔtɛ wa losembwe,+Ndo ndooko onto latshɔ lo kilombo lo mɛtɛ.
Vɔ ndjaɛkɛka lo kɛnɛ kele bu mɛtɛ*+ ndo tɛkɛtaka kɛnɛ kele anyanya.
Vɔ tshɔka paa diemi ndo mbotaka kɛnɛ kele kɔlɔ.+
5 Vɔ mpoholaka ekele wa oloyi wa lɔlɛngɔ,Ndo vɔ wakɛlɛ ɔtɛyi wa dihoha.+
Onto tshɛ lalɛ ekele awɔ ayovɔ,Ndo okele wambohohɔma tondjaka tshuha.
6 Ɔtɛyi awɔ wa dihoha hawotonga oko dihɔndɔ,Ndo vɔ hawotoyakomba la kɛnɛ kasalawɔ.+
Elimu awɔ wekɔ kɔlɔ,Ndo etsha wa ngala wekɔ lo anya awɔ.+
7 Ekolo awɔ ndawɔka dia tosala kɔlɔ,Ndo vɔ samanyaka dia tɔkɛdia dikila diaha la onongo.+
Tokanyi tawɔ tekɔ tokanyi ta kɔlɔ;Elanyelo ndo mfɔnu kekɔ lo mboka yawɔ.+
8 Vɔ haweye mboka ka wɔladi,Ndo losembwe bu lo ɛsɛsɛ awɔ.+
Vɔ mbetɛka mboka yawɔ akɔtɛ akɔtɛ;Ndooko onto lakɛndakɛnda lɔkɔ layeya wɔladi.+
9 Diakɔ diele sambo k’ɔlɔlɔ mangana etale la so,Ndo losembwe halotonde.
Tekɔ lo ntetemala nongamɛ osase, ko ohenda, ekɔ paka wodjima oto;Ndo wɛnɛkɛdi, koko tekɔ lo ntetemala nkɛndakɛnda lo wodjima wa tshududu.+
10 Tekɔ lo mamamba lo ehele oko akanga wa totshungu;Oko wanɛ wele bu la washo mbatetemalaso mamamba.+
Sho takanaka la yanyi ya midi wate kana oko lo wodjima wa la dikɔlɔ di’otsho;L’atei wa akanga wa wolo, sho tekɔ oko edo.
11 Sho tshɛ mbawanaka oko ndjaondoNdo kiyanaka la delo oko benga.
Sho nongamɛka losembwe, koko lɔ bu;Ndo panda, koko tɔ mangana etale la so.
12 Nɛ dia ɛtɔmbɔkwɛlɔ aso wekɔ efula la ntondo kayɛ;+Pɛkato yaso tshɛ yekɔ lo tɔsɔngwɛ.+
Nɛ dia ɛtɔmbɔkwɛlɔ aso wekɔ kaamɛ la so;Sho mbeyaka dimɛna munga yaso.+
13 Sho takasale kɔlɔ ndo takanguna Jehowa;Sho takoke Nzambi kaso ɔkɔngɔ.
Sho takatɛkɛta dia ɔhɛnyɔhɛnyɔ ndo dia ɔtɔmbɔkwɛlɔ;+Sho takatshu kashi diemi ndo takangunanguna ɛtɛkɛta wa kashi oma lo otema.+
14 Sambo k’ɔlɔlɔ kambokaloyama,+Ndo losembwe lambemala etale;+Nɛ dia mɛtɛ* kambotakana lo asanga,Ndo kɛnɛ kele osembɔki keema la akoka wa mbɔtɔ.
15 Mɛtɛ* kambolanyema,+Ndo onto tshɛ lakadimɔ oma lo kɔlɔ, diangɔ diande mimbamaka.
Jehowa akɛnyi dui sɔ, ko nde kɔngɛnangɛna,*Nɛ dia losembwe komonga.+
16 Nde akɛnyi dia komonga ndooko onto,Ndo nde akaambe dia mɛna dia ndooko onto lakatɛkɛtɛ anto akina,Ko lonya lande hita lakela panda,*Ndo losembwe lande hita lakosukɛ.
17 Oma laasɔ, nde akalɔtɛ losembwe oko dikɔti dia mboloNdo lofulɛ la panda* lo ɔtɛ ande.+
Nde akalɔtɛ ahɔndɔ wa shɔmbɔya oko dihɔndɔ diande+Ko akayaɔmbɛ la ohetoheto oko dikɔti.*
18 Nde ayowafuta l’ɔtɛ wa kɛnɛ kambowosala:+
Nkɛlɛ le andɔshi ande ndo shɔmbɔya le atunyi ande.+
Nde ayofuta asɛnga kɛnɛ kahombawɔ nongola.
19 Oma ko ɛɔtwɛlɔ ka wonya, vɔ wayoka lokombo la Jehowa wɔmaNdo oma ko ehotwelo ka wonya, lotombo lande,Nɛ dia nde ayɔtɔ oko ɔkɛdi wambɔmbɔ,Wele nyuma ka Jehowa kekɔ lo mbosokoya.
20 “Otshungodi+ ayoya+ la Siɔna,Le aseka Jakɔbɔ wakadimɔ oma lo kɔlɔ,”+ mbata Jehowa.
21 “Le mi, ɔsɔ kele sheke yamomodja la wɔ,”+ mbata Jehowa. “Nyuma kami kele le yɛ ndo ɛtɛkɛta ami wamomodja lo onyɔ ayɛ hawotonyɛma oma lo onyɔ ayɛ, oma lo onyɔ wa anayɛ,* kana oma lo onyɔ wa ekana ayɛ,”* mbata Jehowa, “oma ko kakianɛ ndo pondjo pondjo.”
Nɔtɛ ka l'ɛse ka dikatshi
^ Tshɛk., “bu wolo.”
^ Kana “kele anyanya.”
^ Kana “losembwe.”
^ Kana “losembwe.”
^ Tshɛk., “ndo diaki kɔlɔ lo washo ande.”
^ Kana “otshumba le nde.”
^ Kana “okutu wele bu la anya.”
^ Kana “otshumba.”
^ Tshɛk., “lɔtɔngɔ layɛ.”
^ Tshɛk., “lɔtɔngɔ la lɔtɔngɔ layɛ.”
