Luka 12:1-59
-
Wodoya w’Afarisɛ (1-3)
-
Mboka Nzambi wɔma, aha anto (4-7)
-
Mbetawɔ dia monga kaamɛ la Kristo (8-12)
-
Wɛɛla wa pami k’enginya kaki ɔngɔnyi (13-21)
-
Nyotshike ndjakiyanya (22-34)
-
Leemba la tshitshɛ l’ɛkɔkɔ (32)
-
-
Nsɛna(35-40)
-
Olami wa kɔlamelo ndo olami waha la kɔlamelo (41-48)
-
Aha wɔladi, koko diatɔnelo (49-53)
-
Ohomba wa nsɛdingola tena (54-56)
-
Mbokana la ɔnɛ lokokole (57-59)
12 L’etena kɛsɔ, lam’akatshumana nunu la nunu di’anto polo ndo wotakamanɛ, nde akatatɛ mbutɛ ambeki ande ate: “Nyewɔ wodoya w’Afarisɛ, mbuta ate lɔkɛwɔ la dungi pende.+
2 Nɛ dia ndooko ɛngɔ koshɛmi etale kahatoshɔma ndo ndooko ɛngɔ kele lo woshɛshɛ kahateyama.+
3 Diakɔ diele, kɛnɛ tshɛ katanyu lo wodjima, kayokɛma l’osase ndo kɛnɛ katanyu lo hiɔtɛhɔtɛ l’etei ka mvudu, kayosambishama oma l’ɛtɛ wa mvudu.
4 Ndo nto, dimi lambonyotɛ nyu angɛnyi ami nte,+ tanyokake wanɛ wadiaka demba ko hawokoke nsala dikambo dikina nto wɔma.+
5 Koko dimi layanga nyɛnya onto lahombanyu mboka wɔma: Ɔnɛ lahombanyu mboka wɔma ele, Ɔnɛ lele l’ɔkɔngɔ wa nde ndjaka ekɔ la wolo wa mbikadja lo Ngɛhɛna.*+ Eelo, dimi lambonyotɛ nte, nyoke Onto ɔsɔ wɔma.+
6 Onde hawotosondjaka sɔlɛ 5 la ekenga 2 wa falanga yele la nɛmɔ dia tshitshɛ?* Koko Nzambi hohɛ* kaanga ɔtɔi l’atei adiɔ.+
7 Kaanga divo dia l’ɛtɛ anyu mbadiemaka tshɛ.+ Tanyokake wɔma, nyu ndeka leemba la sɔlɛ nɛmɔ.+
8 “Lambonyotɛ nte, onto tshɛ lambetawɔ la ntondo k’anto,+ Ɔna onto ayowetawɔ nde lawɔ la ntondo k’andjelo waki Nzambi.+
9 Koko onto tshɛ lamanguna la ntondo k’anto, wayowanguna la ntondo k’andjelo waki Nzambi.+
10 Ndo onto tshɛ latɛkɛta kɔlɔ lo lokombo la Ɔna onto ayodimanyiyama, koko onto tshɛ latɛnga nyuma k’ekila, hatodimanyiyama.+
11 Lam’ayowonyɔtɔla la ntondo k’elui w’anto,* k’emboledi ndo k’ewandji wa lɛɛta, tanyoyakiyanyake lo dikambo dia kɛnɛ kayonyota kana woho wayonyokita dia ndjaswɛ kana kɛnɛ kayonyɔtɛkɛta,+
12 nɛ dia nyuma k’ekila kayonyetsha ko wonya akɔ akambo wayonyɔtɛkɛta.”+
13 Oma laasɔ, onto ɔmɔtshi oma l’atei w’olui w’anto akawotɛ ate: “Ombetsha, tɛ ɔnalengo akahane la mi sango.”
14 Nde akawotɛ ate: “Ɔlɔngɔ, akɔna akambidje shushi kana okakitodi lam’asanyu nyu 2?”
15 Ko nde akawatɛ ate: “Nyodihole washo ndo nyewɔ weho tshɛ wa lokaki,*+ nɛ dia kaanga etena kele onto la diangɔ efula, lɔsɛnɔ lande halolemanɛ la diangɔ diele la nde.”+
16 Ko nde akawaoke wɛɛla ɔmɔtshi ate: “Ekambɔ ka kanga ɔngɔnyi ɔmɔtshi kakangɔnya diangɔ.
17 Ɔnkɔnɛ, nde akatatɛ nkana yimba l’otema ande, ata ate: ‘Ahombami nsala lam’ele laya bu la dihole dia momba diangɔ diami?’
18 Ko nde akate ate, ‘layanga nsala nganɛ:+ Layotola mvudu yami ya eombelo, ndo layoka yoleki weke, ko layotshumanya diangɔ dia dinela diami ndo diangɔ diami tshɛ di’amɛna,
19 ndo layoyatɛ* nte: “Wɛ* ekɔ la diangɔ di’amɛna efula diambombama dikambo di’ɛnɔnyi efula. Aya wɛ tokomuya, ndɛka tsho, nɔka tsho ndo ngɛnangɛnaka.”’
20 Ko Nzambi akawotɛ ate: ‘Enginya le, wayokɔlɔmba lɔsɛnɔ* layɛ l’otsho w’ɛlɔ. Ko diangɔ diakayombe diayonga diaki na?’+
21 Ngasɔ mbediɔ ndo lo dikambo di’onto layaombɛ diangɔ dia nɛmɔ, koko bu ɔngɔnyi lo washo wa Nzambi.”+
22 Ko nde akatɛ ambeki ande ate: “Diakɔ dianyotɛmi nte: Nyotshike ndjakiyanya dikambo dia nsɛnɔ* yanyu nyate: Ayotɔlɛ na? Kana lo dikambo di’alemba anyu nyate: Ayotɔlɔta na?+
23 Nɛ dia lɔsɛnɔ* ndeka mbo ya ndɛ ndo demba ndeka ahɔndɔ.
24 Nyende angwangwa: Vɔ hawonɛ, hawone ndo vɔ bu la ediko ndo la ahole wa momba diangɔ, koko Nzambi mbaleshaka.+ Onde nyu hanyoleki tofudu nɛmɔ?+
25 Onto akɔna l’atei anyu ayokoka nkotsha kaanga kubita* 1 lo otale wa lɔsɛnɔ lande l’ɔtɛ wayakiyanyande?
26 Ko naka hanyokoke nsala dikambo dia tshitshɛ sɔ, lande na kayakiyanyanyu di’akambo akina?+
27 Nyende woho watolaka alɛmbɔlɛmbɔ: Vɔ hawokambe ndo hawɔtɛlɛ ahɔndɔ, koko lambonyotɛ nte: Kaanga Sɔlɔmɔna lo lotombo lande tshɛ kɔndɔta oko ɔtɔi ɔmɔtshi wa l’atei awɔ.+
28 Ko naka Nzambi ndɔtshaka tombatomba diɛnama ɛlɔ ko loyi diambokashema lo dja ngasɔ, kete hoke nyu! Shi nde ayoleka nyɔlɔtsha, nyu akanga wa mbetawɔ ka tshitshɛ?
29 Ɔnkɔnɛ, nyotshike nyanga kɛnɛ kayonyɔlɛ ndo kɛnɛ kayonyɔnɔ, ndo nyotshike ndjakiyanya;+
30 nɛ dia wedja tshɛ wa la nkɛtɛ toyangaka diangɔ sɔ tshɛ la lokaki, koko Shɛnyu mbeyaka dia nyekɔ l’ohomba wa diangɔ sɔ.+
31 Koko, nyotetemale nyanga Diolelo diande, ko wayonyokotshɛ+ diangɔ sɔ.
32 “Tanyokake wɔma, nyu leemba la tshitshɛ l’ɛkɔkɔ,+ nɛ dia Shɛnyu aketawɔ nyosha Diolelo.+
33 Nyosondja diangɔ diele la nyu ndo nyokimɔ weshasha wa kɛtshi.*+ Nyoyasale atapa wa falanga wahalana, ɛngɔ k’oshinga wolo kahashile l’olongo,+ lɛnɛ ahakoke wevi nsukana kana loombo ndanya.
34 Nɛ dia lɛnɛ ele ɛngɔ kayɛ ka nɛmɔ, lɛkɔ mbayoyala ndo otema ayɛ.
35 “Nyɔlɔtɛ ahɔndɔ, nyoyalɔngɔsɔlɛ*+ ndo atala anyu wahɛtake.+
36 Ndo nyu pombaka monga oko anto wakonga owandji awɔ lam’ayondokalola+ oma lo fɛtɛ ka diwala+ dia nyu ndjoodihola kam’ayondɔkɔkɔla.
37 Diɛsɛ le ase olimu asɔ wele lam’ayoya owandji awɔ ko nde mbatana wasɛna! Lo mɛtɛ kanyotɛmi nte, nde ayɔlɔta ahɔndɔ* w’olimu, ayowadjashiya la mɛsa ndo ayowakitshɛ mbo ya ndɛ.
38 Ndo diɛsɛ le wɔ naka nde nkoma la kati k’otsho* kana l’ɔkɔngɔ wa midi k’otsho* ko nde mbatana wasɛna!
39 Koko nyeye dia naka kanga luudu mbeya wonya wayoya wovi, kete nde ayɔsɛnaka ndo hatetawɔ dia luudu lande tondɔma.+
40 Nyu lawɔ nyoyalɔngɔsɔlɛ, nɛ dia Ɔna onto ayoya lo wonya wahanyafɔnya.”+
41 Oma laasɔ, Petero akate ate: “Nkumadiɔndjɔ, onde sho ato mbokɛyɛ wɛɛla ɔsɔ kana ndo anto akina tshɛ?”
42 Ko Nkumadiɔndjɔ akate ate: “Akɔna mɛtɛ ele olami wa kɔlamelo* ndo kɛsɔ* wele nkumɛnde ayowokitsha laadiko di’ekambi ande* dia nde mbashaka yɛdikɔ ya mbo ya ndɛ l’etena kahombama?+
43 Diɛsɛ le ɔhɔmbɔ ɔsɔ, naka nkumɛnde mbotana asala dikambo sɔ lam’ayondoya!
44 Lo mɛtɛ kanyotɛmi nte, nde ayowokitsha laadiko wa diangɔ diande tshɛ.
45 Koko naka ɔhɔmbɔ ɔsɔ ayota l’otema ande ate: ‘Nkumɛmi aakatshimbatshimba,’ ko nde ntatɛ nkɔmɔla asekande ekambi w’apami ndo wa wamato ndo ndjasha lo deshi, lo nɔshi ndo lo wodjwelo wa wanu,+
46 Nkumɛnde ayoya lushi lahandalongamɛ ndo wonya wahandeye, ko nde ayowosha dilanya dioleki wolo ndo ayowodja lo lɛkɛ l’anto wele bu la kɔlamelo.
47 Ɔhɔmbɔ ɔsɔ wakashihodia lolango la nkumɛnde, koko kondjalɔngɔsɔla kana kosala kɛnɛ kakandɔɔlɔmbɛ* ayɔkɔmama efula.+
48 Koko ɔnɛ laki koshihodia ko akasale akambo wahombande kɔmama, ayɔkɔmama yema tshitshɛ. Eelo, onto tshɛ lakawasha efula, wayowɔlɔmba efula ndo onto tshɛ lakalongola ɛkɛndɛ efula, wayoleka mbɔlɔmba efula.+
49 “Dimi lakaye ndjodja dja la nkɛtɛ, ko akombolami nto naka yɔ yamboshila mpɛta?
50 Eelo, dimi lekɔ la batisimu kahombami batizama ndo lekɔ mɛtɛ l’okiyanu polo lam’ayoshila+ batisimu kakɔ!
51 Onde nyu fɔnyaka dia dimi lakaye ndjodja wɔladi la nkɛtɛ? Keema, lambonyotɛ nte, dimi lakaye dia ndjodja diatɔnelo.+
52 Nɛ dia oma ko kakianɛ anto 5 wa lo luudu 1 wayatɔna dia ndɔshana, 3 dia ndɔsha 2 ndo 2 dia ndɔsha 3.
53 Vɔ wayatɔna, papa dia ndɔsha ɔnande la pami, ɔna pami dia ndɔsha she, mama dia ndɔsha ɔnande la womoto, ɔna womoto dia ndɔsha nyango, nyango omi dia ndɔsha wadi aki ɔnande, ndo womoto lotshukami dia ndɔsha nyango omɛnde.”+
54 Oma laasɔ, nde akatɛ elui w’anto nto ate: “Lam’atonyɛnaka dinge diayaye oma lo owɛstɛ, nyu totaka nyate, ‘mvula ngembe koyaye,’ ko tɔ toyaka.
55 Ndo lam’atonyɛnaka lɔpɛpɛ lapɛpa oma lo sidɛ, nyu totaka nyate: ‘Yanyi yayowalɛ wolo,’ ko dui sɔ toyalaka.
56 Nyu akanga wa dungi pende le, nyu mbeyaka nsɛdingola ɛnamelo ka nkɛtɛ ndo k’olongo, ko woho akɔna wahanyeye nsɛdingola etena ka laande kɛnɛ?+
57 Lande na kahanyeye nyuamɛ kɛnɛ kele ɔlɔlɔ?
58 Ɛnyɛlɔ, etena katayatshu wɛ la onto lele la yɛ la dikambo dia kilombo le owandji wa lɛɛta, nyotokanyi etena kekenyu lo mboka diaha nde tokofunda le shushi, ko shushi tokokimɔ le apulushi, ko apulushi tokodja lo lokanu.+
59 Lambokotɛ nte, wɛ hatotomba oma lɛkɔ paka wɛ ambofuta polo ndo okenga ayɛ woleki tshitshɛ w’ekomelo.”*
Nɔtɛ ka l'ɛse ka dikatshi
^ Enda Elembetshielo.
^ Kana “hanya yimba.”
^ Kana “la ntondo ka toshinangɔnga.”
^ Kana “ɔkɔmiya.”
^ Kana “anima ami.”
^ Kana “Anima, wɛ.”
^ Kana “anima.”
^ Kana “anima.”
^ Kana “anima.”
^ Kana “weshasha le ase wola.” Enda Elembetshielo.
^ Tshɛk., “nyɔlɔtɛ eya anyu.”
^ Kana “oya.”
^ Oma lo midi k’otsho polo eshidi 3 w’otsho.
^ Oma l’eshidi 9 w’otsho polo midi k’otsho.
^ Kana “ɔnɔmbɔdi wa luudu.”
^ Kana “wa lomba.”
^ Kana “ekambi wa lo luudu.”
^ Kana “nsala lo ndjela lolango lande.”
