Luka 13:1-35
-
Ndjatshumoya kana nanyema (1-5)
-
Wɛɛla w’osongo wa fingo wahatɔ elowa (6-9)
-
Womoto laki la hemɔ ambɔkɔnɔ lushi la Sabato (10-17)
-
Wɛɛla wa lɔtɔngɔ la mutardɛ ndo wodoya (18-21)
-
Welo walɔmbama dia mbɔtɔ lo soko dia tshitshɛ (22-30)
-
Hɛrɔdɛ, “ɔkɛngɛ ɔsɔ” (31-33)
-
Yeso ambonyanga lo dikambo dia Jɛrusalɛma (34, 35)
13 L’etena kɛsɔ, anto amɔtshi waki laawɔ wakayotɛ Yeso dikambo di’ase Ngalileya wanɛ wele Pilato akasɔhanya dikila diawɔ la elambo awɔ.
2 Ko Yeso akaakadimola ate: “Onde nyu fɔnyaka di’ase Ngalileya asɔ waki atshi wa pɛkato efula oleki ase Ngalileya akina tshɛ l’ɔtɛ wa kɛnɛ kakaakomɛ kɛsɔ?
3 Keema, lambonyotɛ, koko naka nyu hanyoyatshumoyisha, kete nyu tshɛ nyayolanyema+ woho akɔ waamɛ.
4 Kana anto 18 asɔ wakakamamɛ la ehele ka Silɔama ndo wakavu, onde nyu fɔnyaka dia vɔ waki atshi wa kɔlɔ efula oleki anto akina wadjasɛ la Jɛrusalɛma?
5 Keema, lambonyotɛ, koko naka nyu hanyoyatshumoyisha, kete nyu tshɛ nyayolanyema oko vɔ.”
6 Oma laasɔ, nde akawatɛ akambo la wɛɛla ɔnɛ ate: “Onto ɔmɔtshi akonɛ osongo wa fingo lo ekambɔ kande ka vinyɔ, ndo nde akaye ndjenda kana elowa wekɔ lɔkɔ, koko nde kotana ndooko olowa.+
7 Ko nde akatɛ ose olimu wa l’ekambɔ ka vinyɔ ate: ‘Aya ɛnɔnyi 3 wayami ndjoyanga elowa l’osongo ɔnɛ wa fingo, koko haatane ndooko olowa. Kɔtawɔ! Lande na kɔsawɔ dihole wɔsɔsa?’
8 Nde akookadimola ate: ‘Owandji, nyomowotshika ɔnɔnyi ɔnɛ, tokotshima difuku l’omamu awɔ ndo tokodja diangɔ di’ɛtɛtɔ.
9 Naka vɔ wamboyɔtɔ elowa, kete dimɛna. Ko naka bu, ko wɛ ndjɔɔkɔta.’”+
10 Yeso aketshaka lo shinangɔnga mɔtshi lushi la Sabato.
11 Nyolonge, womoto ɔmɔtshi aki la ɔdiɛngɛ w’ɔlɛmbɛlɔ* l’edja k’ɛnɔnyi 18; ndo nde akakotama kota ndo kokokaka nsembɔ.
12 Lam’akandɛnyi womoto akɔ, Yeso akawotɛ ate: “Womoto, wɛ ambotshungɔ oma l’ɔlɛmbɛlɔ ayɛ.”+
13 Ko nde akawahɛ anya ko mbala kakɔ ɔtɔi, nde akasembɔ ndo akatatɛ ntombola Nzambi.
14 Koko owandji wa shinangɔnga aki la nkɛlɛ lo woho wakɔɔkɔnɔla Yeso lushi la Sabato, ndo nde akatɛ olui w’anto ate: “Nshi 6 yekɔ yahombanyu nkamba olimu,+ nshi shɔ mbahombanyu ndjaaka dia vɔ ndjonyɔkɔnɔla, koko aha lushi la Sabato.”+
15 Koko Nkumadiɔndjɔ akookadimola ate: “Nyu akanga wa dungi pende le,+ onde l’atei anyu ndooko onto lakelekola ngɔmbɛ kana mponda kande ndo kitɔla dia tɔ tɔnɔ ashi+ lushi la Sabato?
16 Onde womoto ɔnɛ lele ɔna Abrahama ndo lele Satana akookeleka l’edja k’ɛnɔnyi 18, takandakoki kelekɔma oma l’ɛkɔdi lushi la Sabato?”
17 Lam’akandate akambo asɔ, atunyi ande tshɛ wakoke nsɔnyi, koko olui w’anto tshɛ wakangɛnangɛna l’ɔtɛ w’akambo tshɛ wa diambo wakandasale.+
18 Ko nde akate ate: “Ngande wele Diolelo dia Nzambi, ndo la na akokami diɛdika?
19 Diɔ diekɔ oko lɔtɔngɔ la mutardɛ lele onto ɔmɔtshi akɔshi ko akonɛ lo ekambɔ kande, ko lɔ lakole ndo lakayala tshondo y’osongo ko tofudu ta l’olongo ndjodjasɛka lo ntahe yawɔ.”+
20 Nde akate nto ate: “La na akokami mbɛdika Diolelo dia Nzambi?
21 Diɔ diekɔ oko wodoya wele womoto ɔmɔtshi akɔshi ko nde nsɔhanya lo tɛdikɔ* 3 ta weke t’ofushi polo ndo lam’akade ofushi tshɛ wakandasɔhɛ.”+
22 Ndo nde akatatshɔka l’osomba l’osomba ndo lo ngelo la ngelo atetsha etena kakandatatetemalaka la lɔkɛndɔ otsha la Jɛrusalɛma.
23 Ko pami kɛmɔtshi akawotɛ ate: “Nkumadiɔndjɔ, onde anto wayoshimbamɛ wekɔ yema tshitshɛ?” Nde akawotɛ ate:
24 “Nyodje welo w’efula dia mbɔtɔ lo soko dia tshitshɛ,+ nɛ dia lambonyotɛ nte, anto efula wayoyanga dia mbɔtɔ lɔkɔ, koko hawotokoka mbɔtɔ.
25 Kam’ayemala kanga luudu, nde ayodiha lokuke ko nyu nyayotshikala l’andja, nyakɔkɔla lo lokuke ndo nyata nyate: ‘Nkumadiɔndjɔ, otodihola.’+ Koko nde ayonyokadimola ate: ‘Dimi haleye oma lɛnɛ ayanyaye.’
26 L’etena kɛsɔ, nyu nyayota nyate: ‘Sho takalɛka ndo takanɔka laleyɛ ndo wɛ aketshaka l’ɛsɛsɛ aso wa weke.’+
27 Koko nde ayonyotɛ ate: ‘Dimi haleye oma lɛnɛ ayanyaye. Nyomangane, nyu atshi w’akambo wa kɔlɔ!’
28 Lɛkɔ mbayonyolela ndo mbayonyokakatanya wanyu lam’ayonyɛna Abrahama, Isaka la Jakɔbɔ ndo amvutshi tshɛ lo Diolelo dia Nzambi, koko nyu nyayokashema l’andja.+
29 Ndo nto, anto wayoya oma lo ɛstɛ ndo owɛstɛ ndo oma lo nɔrdɛ ndo sidɛ ndo wayodjasɛ la mɛsa lo Diolelo dia Nzambi.
30 Ndo nyolonge, wanɛ wele l’ɔkɔngɔ wayoyala la ntondo ndo wanɛ wele la ntondo wayoyala l’ɔkɔngɔ.”+
31 Ko wonya akɔ, Afarisɛ amɔtshi wakaye ko wakayowotɛ vate: “Tomba ndo mɔ oma lanɛ, nɛ dia Hɛrɔdɛ ekɔ lo nanga kodiaka.”
32 Ko nde akawatɛ ate: “Nyotshu, nyotote ɔkɛngɛ ɔsɔ nyate: ‘Hokamɛ, dimi lekɔ lo ntondja ɛdiɛngɛ ndo lekɔ lo nkɔnɔla anto ɛlɔ la loyi ndo lushi la 3, dimi layoshidiya olimu ami.’
33 Koko dimi pombaka ntetemala la lɔkɛndɔ lami ɛlɔ, loyi la wedi a loyi, nɛ dia omvutshi hakoke* ndjakema l’andja wa Jɛrusalɛma.+
34 Jɛrusalɛma, Jɛrusalɛma, osomba wadiaka amvutshi ndo woka wanɛ wotomɛwɔ+ ave, ande mbala efula yakamalange nsanganya anayɛ kaamɛ woho watosanganyaka waale a nkɔkɔ anatɔ lo ahafu atɔ lee! Koko nyu konanga.+
35 Nyolonge, Nzambi ambonyokalɛɛ luudu lanyu.+ Dimi lambonyotɛ nte, nyu hanyotɔmɛna nto edja ndo lam’ayonyota nyate: ‘Ɔnɛ layaye lo lokombo la Jehowa*+ atshɔkwame!’”
