Luka 14:1-35
14 Lushi lɔmɔtshi, lam’akɔtɔ Yeso lo luudu l’owandji ɔmɔtshi wa Afarisɛ dia tɔlɛ diangɔ lushi la Sabato, vɔ wakawendaka la yambalo.
2 Nyolonge, pami kɛmɔtshi kaki la hemɔ ka kuta* aki la ntondo kande.
3 Ko Yeso akambola wanɛ wakayashaka tshavu lo Ɛlɛmbɛ kaamɛ la Afarisɛ ate: “Onde ekɔ kɔlɔ nkɔnɔla onto lushi la Sabato kana bu?”+
4 Koko vɔ wakatshikala ki. Ɔnkɔnɛ, nde akakimɛ pami kakɔ, akɔɔkɔnɔla ndo akawotɛ dia nde ntshɔ.
5 Ko nde akawatɛ ate: “Onto akɔna l’atei anyu lele naka ngɔmbɛ kande kana ɔnande nkɔ lo difuku+ ko nde hatowotondja mbala kakɔ ɔtɔi lushi la Sabato?”+
6 Ko vɔ kokoka mbokadimola lo dikambo sɔ.
7 Lam’akandɛnyi anto wakelamɛ wasɔna+ ahole woleki lokumu, nde akawatɛ ate:
8 “Naka wambokelɛ lo fɛtɛ ka diwala, todjasɛke lo dihole dioleki lokumu.+ Nɛ dia ondo onto ɔmɔtshi lokoleki nɛmɔ akelamɛ nde lawɔ lo fɛtɛ kakɔ.
9 Ko ɔnɛ lakanyelɛ wɛ la nde ayoya ndjokotɛ ate: ‘Tshikɛ onto ɔnɛ dihole ndo.’ Ko wɛ ayotshɔ la nsɔnyi tshɛ dia todjasɛ lo dihole dioleki l’ɛse.
10 Koko naka wambokelɛ, todjasɛ lo dihole dioleki l’ɛse kele etena kayoya onto lakakelɛ, nde ayokotɛ ate: ‘Ɔngɛnyi, todjasɛ lo dihole dia nɛmɔ.’ Ko wɛ ayonga la nɛmɔ lo washo w’anto akina tshɛ wakelamɛ.+
11 Nɛ dia onto tshɛ layadiya wayowokitshakitsha ndo onto tshɛ layakitshakitsha wayowodiya.”+
12 Oma laasɔ, nde akatɛ ndo pami kakawelɛ ate: “Etena kalɔngɔsɔlayɛ fɛtɛ kɛmɔtshi, telɛke angɛnyi ayɛ, ananyɔ, ewotɔ ayɛ kana asukanyi ayɛ wele ɛngɔnyi. Nɛ dia vɔ lawɔ mbeyaka ndjokelɛ, ko ɔsɔ ndjonga oko difuto diayɛ.
13 Koko, etena kasalayɛ fɛtɛ, elɛ ase wola, akanga wa dikɔmɔ, akanga wa tshumbe ndo akanga wa totshungu;+
14 ko wɛ ayonga l’ɔngɛnɔngɛnɔ, nɛ dia vɔ ndooko la ɛngɔ ka kofuta. Ko wɛ ayoyofutama lo eolwelo+ k’anto w’ɛlɔlɔ.”
15 Lam’akoke onto ɔmɔtshi lakelamɛ lo fɛtɛ akambo asɔ, nde akawotɛ ate: “Diɛsɛ le ɔnɛ lalɛ* lo Diolelo dia Nzambi.”
16 Yeso akawotɛ ate: “Pami kɛmɔtshi akasale fɛtɛ+ ka woke ndo akelɛ anto efula.
17 Nde akatome ose olimu ande wonya wakeshɔ diangɔ dia totɛ anto wakelamɛ ɔnɛ: ‘Nyoyake, diangɔ tshɛ diaya suke.’
18 Koko vɔ tshɛ wakasha tɛkɛ nɛndɛ.+ Onto la ntondo akate ate: ‘Okimwe, dimi leke kasomba ekambɔ ndo lekɔ lo nanga tokienda.’
19 Okina akate ate: ‘Okimwe,+ dimi leke kasomba ngɔmbɛ 10 ndo dimi nangaka toyenda.’
20 Okina nto akate ate: ‘Dimi leke katshukana ndo l’ɔtɛ wa dikambo sɔ, halakoke ndja.’
21 Ko ose olimu akaye ndo akayotɛ owandji ande akambo asɔ. Oma laasɔ, kanga luudu akomala ndo akatɛ ose olimu ande ate: ‘Tshɔka esadi lo toshinga ta weke ndo l’asanga wa l’osomba kele toye la ase wola, akanga wa dikɔmɔ, akanga wa totshungu ndo akanga wa tshumbe.’
22 Lam’akakalola ose olimu, nde akate ate: ‘Owandji, lambosala kɛnɛ kakayatshi, koko ahole wekekɔ.’
23 Ko owandji akatɛ ose olimu ate: ‘Tshɔka l’ɛsɛsɛ ndo lo toshinga, totshutshuya anto la wolo dia vɔ ndja kele luudu lami lalole l’anto.+
24 Nɛ dia lambonyotɛ nte ndooko onto lakelamɛ layɔlɛta diangɔ diakamakate.’”+
25 Elui a weke w’anto wakatatshɔka kaamɛ la nde, ko nde akakadimɔ ndo akawatɛ ate:
26 “Naka onto amboya le mi ko nde hahetshisha* she, nyango, wadɛnde, anande, anango, akadiyɛnde, eelo, ndo kaanga lɔsɛnɔ*+ lande hita, kete nde hakoke monga ombeki+ ami.
27 Onto tshɛ lahɛmbɛ otamba ande w’asui* ndo lahandjele hakoke monga ombeki+ ami.
28 Ɛnyɛlɔ, onto akɔna l’atei anyu lalanga mbika luudu lotangakadi ko nde hatadjashi ntondo dia nkamba akumi ndo menda kana nde ayonga l’akoka wa lishidiya?
29 Naka nde hasadi ngasɔ, kete nde ayotatɛ mbika, koko hatonga l’akoka wa lishidiya, ko anto tshɛ wenda wayotatɛ mbɔɔla,
30 wata vate: ‘Pami kɛnɛ akatatɛ mbika luudu, koko nde hongi l’akoka wa lishidiya.’
31 Kana, nkumekanga kakɔna kayotshɔ dia tɔlɔsha nkumekanga kekina ko nde hatadjashi ntondo dia menda kana nde l’asɔlayi ande nunu dikumi (10 000) wayonga l’akoka wa ndɔ la ɔnɛ layaye ndjɔɔlɔsha l’asɔlayi nunu akumi ahende (20 000)?
32 Naka mɛtɛ nde bu l’akoka wa nsala dikambo sɔ, etena keke ɔndɔshi ande ɔsɔ etale, nde ayotoma atomami dia tɔlɔmba dia vɔ mbidja wɔladi.
33 Woho akɔ waamɛ mbele, onto tshɛ la l’atei anyu lahoke diangɔ diande tshɛ ɔkɔngɔ* hakoke monga ombeki+ ami.
34 “Lo mɛtɛ, lɛɛhɔ lekɔ ɛngɔ ka dimɛna. Koko naka lɛɛhɔ lambosuwɔ, la na ayowolietɛ mpɛ nto?+
35 Lɔ halotonga ohomba nto oyadi le nkɛtɛ kana dia mbisha ɛtɛtɔ. Wayolikasha l’andja. Ɔnɛ lele l’atoyi wa mboka, ooke.”+
Nɔtɛ ka l'ɛse ka dikatshi
^ Kana “wodelo,” ashi wamboleka efula lo demba.
^ Tshɛk., “lalɛ mapa.”
^ Kana “aha mbaoka ngandji koleki kambokande.”
^ Kana “anima.”
^ Enda Elembetshielo.
^ Kana “lahatshike.”
