Luka 15:1-32
15 Afutshanyi w’elambo tshɛ ndo atshi wa pɛkato, wakatetemala ntshumana lale Yeso dia mbohokamɛ.+
2 Afarisɛ la afundji wakangunangunaka, wata vate: “Onto ɔnɛ nongolaka atshi wa pɛkato ndo nde ndɛka kaamɛ la wɔ.”
3 Ko nde akawaoke wɛɛla ɔnɛ ate:
4 “Onto akɔna l’atei anyu lele la ɛkɔkɔ 100 ko lam’ayondoshisha 1, ko nde hatshike 99 l’oswe ko ntshɔ dia toyanga wɔnɛ wamboshishɔ polo ndo lam’ayondowɛna?+
5 Lam’ayondowɛna, nde ayowahɛ l’ahɛka ndo ayɔngɛnangɛna.
6 Ndo lam’ayondokoma la ngelo, nde ayelɛ angɛnyi ndo asukanyi ande, ko ayowatɛ ate: ‘Nyɔngɛnɛngɛnɛ kaamɛ la mi, nɛ dia lambɛna ɔkɔkɔ ami wakashishɔ.’+
7 Dimi lambonyotɛ nte, ngasɔ mbayonga ɔngɛnɔngɛnɔ efula l’olongo dikambo dia otshi wa pɛkato 1 wamboyatshumoya,+ oleki dikambo dia anto w’ɛlɔlɔ 99 wele bu l’ohomba wa ndjatshumoya.
8 “Kana womoto akɔna lele la ekenga wa drakimɛ* 10 ko naka nde amboshisha okenga* ɔmɔtshi, ko nde hahɛtsha tala ndo hɔmbɛ luudu lande dia nyanga dimɛna dimɛna polo ndo lam’ayondowɛna?
9 Lam’ayondowɛna, nde ayelɛ angɛnyi* ndo asukanyi ande, ko ayowatɛ ate: ‘Nyɔngɛnɛngɛnɛ kaamɛ la mi, nɛ dia lambɛna okenga wa drakimɛ* wakamashisha.’
10 Woho akɔ waamɛ mbele lambonyotɛ nte, andjelo wa Nzambi mongaka la ɔngɛnɔngɛnɔ lo dikambo dia otshi wa pɛkato 1 wamboyatshumoya.”+
11 Oma laasɔ, nde akate ate: “Pami kɛmɔtshi aki la ana 2.
12 Ɔna la kose akatɛ she ate: ‘Papa, ombisha etenyi kami ka sango.’ Ko she akaakahanya diangɔ diande.
13 L’ɔkɔngɔ wa nshi ngana, ɔna la kose akɔshi diangɔ diande tshɛ ko akatshu lo wodja w’etale ndo akatomana diangɔ diande lo nsɛna lɔsɛnɔ la mindo.*
14 Lam’akandamane diangɔ diande tshɛ, ndjala k’efula kakayala lo wodja ɔsɔ, ko nde akonge lo dihombo.
15 Nde akatekesanɛ l’onto ɔmɔtshi la lo wodja ɔsɔ, ko onto akɔ akootome lɛnɛ ele dongalonga diande dia toolamɛka nsombo yande.+
16 Nde akakombolaka ndjalotsha la mposo yakalɛka nsombo ndo ndooko onto lakawoshaka yangɔ ya ndɛ.
17 “Lam’akandakane yimba, nde akate ate: ‘Ande efula k’ase olimu wa papa wele la mbo ya ndɛ tshavutshavu, ko dimi ɔnɛ avɔ ndjala lanɛ lee!
18 Dimi layonɛɛ, layotshɔ le papa, ndo layotowotɛ nte: “Papa, dimi lakasalɛ olongo kɔlɔ ndo lakakosalɛ kɔlɔ.
19 Dimi handjokoka mbelamɛ ɔnayɛ. Ɔmbɔshi oko ose olimu ayɛ.”’
20 Ko nde akonɛɛ ndo akatshu otsha le she. Lam’akinde eke lo tshalola, she akawɛnyi, nde akawoke kɛtshi, akalawɔ otsha le nde, akookumbatɛ* ndo akawosha bizɛ.
21 Ko ɔnakɔ akawotɛ ate: ‘Papa, dimi lakasalɛ olongo kɔlɔ ndo lakakosalɛ kɔlɔ.+ Dimi handjosungana mbelamɛ ɔnayɛ.’
22 Ko she akatɛ ase olimu ande ate: ‘Nyela okutu woleki dimɛna esadi ndo nyɔɔlɔtshawɔ, nyɔɔlɔtsha mpɛtɛ lo lonya ndo sabata l’ekolo.
23 Ndo nyela ngɔmbɛ ka wata, nyokidiake kele tole ndo tosale fɛtɛ,
24 dikambo ɔnami ɔnɛ akavu, ko nde amboyala la lɔsɛnɔ nto;+ nde akashishɔ, ko ambɛnama.’ Ko vɔ wakatatɛ ngɛnangɛna.
25 “Ɔnande l’enondo aki lo ekambɔ. Etena kakandayakalolaka, lam’akandakome suke la ngelo, nde akoke londjo la mishiki ndo anto wanɔ lokombe.
26 Ko nde akelɛ ose olimu ɔmɔtshi ndo akawombola dia mbeya kɛnɛ kambotomba.
27 Ose olimu akawotɛ ate: ‘Ɔnanyɔ kamboya ndo shɔ akadiaki ngɔmbɛ ka wata, nɛ dia nde ambokalola demba ki.’*
28 Nde akoke nkɛlɛ ndo akatone mbɔtɔ lo lokombo. Ko she akaye ndo akayɔɔsɛngasɛnga.
29 Nde akakadimola she ate: ‘Eenda, aya ɛnɔnyi efula wamomokokambɛ ndo ndooko lushi lakamahindola ɛlɛmbɛ ayɛ, koko wɛ atambishaka kaanga ɔna mbudi dia dimi ngɛnangɛna la angɛnyi ami.
30 Koko kam’ambokoma ɔnayɛ ɔnɛ lakatomana* diangɔ diayɛ la wamato wa numba, wɛ amboodiakɛ ngɔmbɛ ka wata.’
31 Ko nde akawotɛ ate: ‘Ɔnami, wɛ ekɔ kaamɛ la mi nshi tshɛ ndo diangɔ diami tshɛ diayɛ mbediɔ.
32 Takahombi nsala fɛtɛ ndo ngɛnangɛna, nɛ dia ɔnanyɔ ɔnɛ akavu, ko nde amboyala la lɔsɛnɔ nto ndo nde akashishɔ, ko ambɛnama.’”
Nɔtɛ ka l'ɛse ka dikatshi
^ Kana “angɛnyi ande wa wamato.”
^ Kana “l’otshupatshupa; laha la shɛnɔdi.”
^ Tshɛk., “akawomamɛ lo nkingo.”
^ Kana “aha la dikambo.”
^ Tshɛk., “lakatɔlɛ.”
