Luka 17:1-37
17 Oma laasɔ, Yeso akatɛ ambeki ande ate: “Akambo watakanya wayoyalaka. Koko mananu le onto layela akambo akɔ!
2 Ndeka dimɛna mbokeleka dive di’ɔhɛlɔ lo nkingo ko mbotambiya lo ndjale lo dihole dia nde ntakanya 1 ɔmɔtshi l’atei w’anto wa totshitshɛ anɛ.+
3 Nyende ɔlɔlɔ. Naka ɔnanyɔ ambokosalɛ kɔlɔ, hangwɛnde+ ndo naka nde amboyatshumoya, dimanyiyande.+
4 Oyadi kaanga nde ambokosalɛ pɛkato mbala 7 lo lushi, ko nde amboya le yɛ mbala yakɔ 7 ndjokotɛ ate: ‘Okimwe,’ wɛ pombaka mbodimanyiya.”+
5 Ko apɔstɔlɔ wakatɛ Nkumadiɔndjɔ vate: “Otosha mbetawɔ k’efula.”+
6 Ko Nkumadiɔndjɔ akate ate: “Naka nyu monga la mbetawɔ ka woke oko lɔtɔngɔ la mutardɛ, kete nyayotɛ osongo wa woke ɔnɛ nyate: ‘Kundɔ oma lanɛ ndo tonɛme lo ndjale!’ ko osongo akɔ wayonyokitanyiya.+
7 “Onto akɔna l’atei anyu lele la ose olimu wokambɛ kana wolamɛ dongalonga diande lele lam’ayondokalola oma l’ekambɔ ko nde ayowotɛ ate: ‘Yaka yole la mɛsa’?
8 Shi nde ayowotɛ ate: ‘Ɔnɔngɔsɔlɛ yangɔ ya ndɛ, lɔta dihɔndɔ di’olimu kele okitshe diangɔ dia ndɛ polo dimi lamboshidiya ndɛ ndo lambɔnɔ, l’ɔkɔngɔ diko mbayoyokoka ndɛ ndo nnɔ’?
9 Nde hatonga la lowando le ose olimu ɔsɔ, nɛ dia ose olimu akakotshisha ɛkɛndɛ wakawawosha, shi mɛtɛ?
10 Woho akɔ waamɛ mbele, nyu lawɔ, lam’ayonyosala akambo tshɛ wakawanyotɛ dia nsala, kanyote nyate: ‘Ase olimu w’anyanya mbeso. Takasadi kɛnɛ kakatahombi nsala.’”+
11 Lam’akandatatshɔka otsha la Jɛrusalɛma, nde akete lam’asa Samariya la Ngalileya.
12 Etena kakandatɔtɔka lo ngelo kɛmɔtshi, nde akɛnyi akanga wa sudi 10, koko vɔ wakemala lo tshalola.+
13 Ko vɔ wakate la dui dia wolo vate: “Yeso, Ombetsha, otoke kɛtshi!”
14 Etena kakandawaɛnyi, nde akawatɛ ate: “Nyotshu, nyotoyaɛnya le ɛlɔmbɛdi.”+ Lam’akawatatshɔka, vɔ wakɛdiama.+
15 Lam’akɛnyi ɔmɔtshi la l’atei awɔ dia nde ambɔkɔnɔ, nde akakalola ayatombola Nzambi la dui dia wolo.
16 Ko nde akayakɔsha ekukumadi l’ekolo wa Yeso, akawosha losaka. Ndo nto, nde aki ose Samariya.+
17 Yeso akate ate: “Shi anto 10 mbakakɔnwɛ? Ko lende ele akina 9?
18 Ndooko onto okina lakakalodi dia ndjotombola Nzambi paka pami kɛnɛ k’ose wodja okina?”
19 Nde akawotɛ ate: “Emala, tshɔka, mbetawɔ kayɛ kambokɔkɔnɔla.”+
20 Lam’akawombolaka Afarisɛ etena kayoya Diolelo dia Nzambi,+ nde akaakadimola ate: “Diolelo dia Nzambi hadiotoya lo woho wayɛnama le anto tshɛ.
21 Ndo anto hawotota vate: ‘Eenda diɔ nɛ diele lanɛ!’ kana ɔnɛ: ‘Eenda diekɔ lɛnɛ!’ nɛ dia, nyolonge, Diolelo dia Nzambi diekɔ l’atei anyu.”*+
22 Oma laasɔ, nde akatɛ ambeki ande ate: “Nshi yayoya yayonyokombola mɛna kaanga lushi ɔtɔi l’atei wa nshi ya Ɔna onto, koko hanyotoliɛna.
23 Ndo naka anto wambonyotɛ vate: ‘Nyende lanɛ!’ kana ɔnɛ: ‘Nyende lɛnɛ!’ tanyotshɔke ndo tanyaayelake.+
24 Nɛ dia oko watɛnamaka osase wa dingadimu dia mvula oma lo koma mɔtshi ya l’ɛse olongo polo lo koma nkina ya l’ɛse olongo, ngasɔ mbayonga Ɔna onto+ lo lushi lande.+
25 Koko ntondo, nde pombaka soyama efula ndo sɛkama oma le lɔlɔnga lɔnɛ.+
26 Ndo nto, oko wakidiɔ lo nshi ya Nɔa,+ ngasɔ mbayoyala lo nshi ya Ɔna onto:+
27 Vɔ wakalɛka, wakanɔka, apami wakatshukaka, wamato wakatshukamaka, polo ndo lushi lakɔtɔ Nɔa lo waato a luudu,+ ko Mvula k’elola kakalɔ ndo kakaadiake vɔ tshɛ.+
28 Ngasɔ mbakidiɔ lo nshi ya Lɔta:+ Anto wakalɛka, wakanɔka, wakasombaka, wakasondjaka, wakonɛka ndo wakakaka mvudu.
29 Koko lushi lakatombe Lɔta oma la Sɔdɔma, mvula ka dja ndo ka mbɔkɔ kakalɔ oma l’olongo ndo kakaadiake vɔ tshɛ.+
30 Ngasɔ mbayonga ndo lushi layɛnama Ɔna onto.+
31 “Lo lushi lɔsɔ, onto lele lo tshoto ya luudu ndo lele la diangɔ diande l’etei ka luudu atoholɔke dia ndjodiɔsa ndo woho akɔ waamɛ, ɔnɛ lele l’ekambɔ atokalolake lɛnɛ ele diangɔ diakandatshike l’ɔkɔngɔ.
32 Nyohɔ wadi a Lɔta.+
33 Onto tshɛ layanga dia nkokɛ lɔsɛnɔ* lande ayolishisha, koko onto tshɛ lashisha lɔsɛnɔ lande ayolilama.+
34 Lambonyotɛ nte, l’otsho ɔsɔ, anto 2 wayonga lo mbeto 1, wayɔsa ɔmɔtshi ko ntshika+ okina.
35 Ayonga wamato 2 wahɛla kaamɛ, wayɔsa ɔmɔtshi ko ntshika okina.”
36 * ——
37 Ɔnkɔnɛ, vɔ wakookadimola vate: “Lende na, Nkumadiɔndjɔ?” Nde akawatɛ ate: “Lɛnɛ ele odo mbayosangana+ ndo mpongo.”
