Luka 23:1-56
23 Ko olui w’anto tshɛ wakemala ndo wakatɔlɛ Yeso otsha le Pilato.+
2 Vɔ wakatatɛ mbofunda le nde+ vate: “Takatane pami kɛnɛ afukutanya wodja aso ndo ashimba anto diaha vɔ mfuta elambo wa Kayisa+ ndo ata dia ndamɛ kele Kristo, nkumekanga.”+
3 Ko Pilato akawombola ate: “Onde wɛ kele Nkumekanga k’ase Juda?” Yeso akookadimola ate: “Wɛmɛ ɔsɔ adita.”+
4 Ko Pilato akatɛ ewandji w’ɛlɔmbɛdi la elui w’anto ate: “Dimi halɛnyi ndooko kɔlɔ kosadi onto ɔnɛ.”+
5 Ko vɔ wakatetemala mbuta vate: “Nde ekɔ lo ntɔmbɔsha anto la wetshelo ande lo Judeya y’otondo, ntatɛ oma la Ngalileya polo ndo lanɛ.”
6 Lam’akoke Pilato ngasɔ, nde akambola dia kana Yeso aki ose Ngalileya.
7 L’ɔkɔngɔ wa nde nshikikɛ dia Yeso aki oma l’ɛtshi ka nkɛtɛ kalɔmbɔla Hɛrɔdɛ,+ nde akootome le Hɛrɔdɛ laki l’etena kɛsɔ la Jɛrusalɛma.
8 Lam’akɛnyi Hɛrɔdɛ Yeso, nde akangɛnangɛna efula. Nɛ dia laasɔ ko aya edja kakandayangaka dia mɛna Yeso l’ɔtɛ w’akambo wakandokaka lo lokombo lande+ ndo nde akalongamɛka dia mbɛɛna asala tolembetelo.
9 Ko nde akɔɔpɔpɛ ambola efula, koko Yeso kombokadimola ndooko dui.+
10 Ewandji w’ɛlɔmbɛdi la afundji wakemalaka ndo wakoofundaka la nkɛlɛ tshɛ.
11 Oma laasɔ, Hɛrɔdɛ la asɔlayi ande wakosalɛ akambo la lohetsho+ ndo wakɔɔsɔkɛ+ lo mbɔlɔtsha dihɔndɔ dia nɛmɔ ndo wakookaloya le Pilato.
12 Oma ko lushi lɔsɔ, Hɛrɔdɛ la Pilato wakayokoma angɛnyi, nɛ dia la ntondo ka laasɔ, vɔ kombokanaka.
13 Ko Pilato akelɛ ewandji w’ɛlɔmbɛdi, emboledi ndo anto k’anto,
14 ko akawatɛ ate: “Nyu nyakambela pami kɛnɛ nyate nde tɔmbɔshaka anto. Nyolonge, dimi lakoolomboshisha la ntondo kanyu, koko ndooko kɛnya dia kɛnɛ koofundanyu+ kekɔ mɛtɛ.
15 Ndo Hɛrɔdɛ lawɔ hootanyi ndooko la dikambo, nɛ dia nde ambookaloya le so, nyolonge, ndooko dikambo diosadinde diakokande ndjakema.
16 Dimi layowosha dilanya+ ko mbokimɔ.”
17 * ——
18 Ko olui tshɛ w’anto wakate la dui dia wolo vate: “Diaka pami* kɛnɛ, ndo ototshungole Barabasɛ!”+
19 (Wakadje pami kɛsɔ lo lokanu, nɛ dia nde akatɔmbɔsha anto l’osomba ndo akadiake onto.)
20 Pilato akawaelɛ nto dia ntɛkɛta la wɔ, nɛ dia nde akalangaka ntshungola Yeso.+
21 Ko vɔ wakatatɛ mbotshutshuya, wata vate: “Hanɛnde l’otamba! Hanɛnde l’otamba!”*+
22 Nde akawatɛ mbala ka 3 ate: “Lande na? Kɔlɔ kakɔna kosadi pami kɛnɛ? Dimi halɛnyi ndooko dikambo diosadinde diakokande ndjakema. Ɔnkɔnɛ, layowosha dilanya ko mbokimɔ.”
23 Koko vɔ wakatɛtɛ, walɔmba la dui dia wolo dia nde ndjakema,* ko awui awɔ wakalɛndja.+
24 Pilato akate ate: Diatshame oko walɔmbanyu.
25 Nde akatshungola pami kakawalɔmbaka, ɔnɛ lakadjama lo lokanu l’ɔtɛ wakandatɔmbɔsha anto ndo wakandadiake onto, ko nde akakimɔ Yeso lo ndjela lolango lawɔ.
26 Lam’akawatatshɔka la Yeso, wakɔshi la wolo pami kɛmɔtshi kelɛwɔ Simɔna, ose Kurɛnɛ lakayayaka oma l’ekambɔ dia nde mɛmba otamba w’asui* l’ɔkɔngɔ wa Yeso.+
27 Leemba la woke l’anto wakayawoyelaka, mbidja ndo wamato waki la kandji k’efula wakayawolelaka.
28 Yeso akakadimɔ otsha le wamato akɔ, ko akawatɛ ate: “Ana wa wamato wa Jɛrusalɛma, nyotshike ndelami. Nyoyalele nyuamɛ ndo nyolele ananyu;+
29 nɛ dia nyolonge, nshi yekɔ lo ndjaye yele anto wayota vate: ‘Diɛsɛ le wamato wa dikomba, etema waki kombota la awɛlɛ waki kɔnɔnya!’+
30 Ko vɔ wayotɛ akona vate: ‘Nyotokongotwe!’ ndo tokonakona ɔnɛ: ‘Nyotofe!’+
31 Naka vɔ salaka akambo asɔ etena keke osongo oyoyo, kete hoke lam’ayowoma!”
32 Wakatatshɔka ndo la atshi wa kɔlɔ 2 dia taadiaka vɔ lawɔ.+
33 Lam’akawakome lo dihole dielɛwɔ ɔnɛ Lowako,+ vɔ wakɔkɔkɔla nsɛti l’otamba ndo wakahanɛ atshi wa kɔlɔ akɔ l’etamba, ɔmɔtshi lo lonya lande l’omi, okina lo lonya lande la lɔmɔsɔ.+
34 Ko Yeso akate ate: “Papa, dimanyiyawɔ, nɛ dia vɔ haweye kɛnɛ kasalawɔ.” Ndo nto, vɔ wakoke owale dia nkahana ahɔndɔ+ ande.
35 Ko anto wakemala laawɔ wakendaka. Koko ewandji wakooshilɛka amɛku, wata vate: “Nde akashimbɛka anto akina, ayashimbɛke ndamɛ naka Kristo ndo Ɔsɔnami+ waki Nzambi kende.”
36 Kaanga asɔlayi wakawɔɔlɛ, wakasukana la nde ndo wakawosha wanu w’okayi,+
37 wata vate: “Naka wɛ ekɔ Nkumekanga k’ase Juda, oyashimbe.”
38 Ndo nto, wakahanɛ la diko diande efundelo wata ɔnɛ: “Ɔnɛ ekɔ Nkumekanga k’ase Juda.”+
39 Koko otshi wa kɔlɔ ɔmɔtshi lakahanema l’otamba akatatɛ ntɛkɛta kɔlɔ lo lokombo lande+ ate: “Shi wɛ ekɔ Kristo? Oyashimbɛ kele otoshimbe ndo sho.”
40 Ko osekande akoohangwɛ ate: “Onde wɛ hoke Nzambi wɔma etena kɛnɛ kamboyolongola dilanya dia woho ɔtɔi la nde?
41 Sho kokaka panema l’etamba l’ɔtɛ w’akambo tshɛ wa kɔlɔ wakatasale, koko onto ɔnɛ kosala ndooko dikambo dia kɔlɔ.”
42 Ko nde akate ate: “Yeso, kombohɔ lam’ayoyonga lo Diolelo+ diayɛ.”
43 Ko Yeso akawotɛ ate: “Lo mɛtɛ kakotɛmi ɛlɔ nte: Wɛ ayoyala la mi lo Paradiso.”+
44 Laasɔ ko aya suke la wonya wa 6,* wodjima wakayala lo wodja w’otondo polo lo wonya wa 9,*+
45 nɛ dia osase wa wonya wakadimala, ndo dihɔndɔ di’okombɔ dia lo tɛmpɛlɔ k’ekila+ diakatɛ l’atei.+
46 Ko Yeso akate la dui dia wolo ate: “Papa, lambokimɔ lomu+ lami l’anya ayɛ.” L’ɔkɔngɔ wa nde mbuta ngasɔ, nde akakitshiya lomu.*+
47 Lam’akɛnyi owandji w’asɔlayi kɛnɛ kakatombe, nde akatatɛ ntombola Nzambi, ata ate: “Lo mɛtɛ, pami kɛnɛ aki onto ɔlɔlɔ.”+
48 Ndo elui w’anto tshɛ wakasangana laawɔ dia menda kɛnɛ kayeta lam’akawɛnyi akambo wakasalema, wakakalola la ngelo watayakɔmɔla lo ntolo.
49 Ndo anto tshɛ wakaweyaka wakemala tshalola. Ndo wamato wakayayaka kaamɛ la nde oma la Ngalileya waki laawɔ ndo wakɛnyi akambo asɔ.+
50 Nyolonge, pami kɛmɔtshi lokombo lande Yɔsɛfu, laki ose tominadi ta laadiko t’ase Juda, aki onto ɔlɔlɔ ndo kanga losembwe.+
51 (Nde kosukɛ yɛdikɔ yawɔ.) Nde aki ose Arimateya, osomba ɔmɔtshi wa la Judeya ndo nde akakongaka Diolelo dia Nzambi.
52 Nde akatshu le Pilato ko akɔɔlɔmbɛ odo wa Yeso.
53 Ko nde akahanola odo akɔ,+ akawɔmbɛ ahɔndɔ wa linɛnɛ la dimɛna ndo akatowodja lo diombo* dia lo wooko wa dive+ diahawatakundɛka ndooko odo lɔkɔ.
54 Ɔsɔ aki lushi la Ɛlɔngɔswɛlɔ+ ndo Sabato+ kaki suke la ntatɛ.
55 Koko wamato wakaye oma la Ngalileya kaamɛ la nde wakatawayelaka, wakendaka diombo* ndo woho wakawakitsha odo ande lɔkɔ.+
56 Ko vɔ wakakalola dia tɔlɔngɔsɔla diangɔ di’opumu ndo malashi. Koko vɔ wakahombe momuya lushi la Sabato+ lo ndjela Ɛlɛmbɛ.
Nɔtɛ ka l'ɛse ka dikatshi
^ Tshɛk., “Nya ɔnɛ.”
^ Kana “Diakande l’otamba! Diakande l’otamba!”
^ Kana “ndjakema l’otamba.”
^ Enda Elembetshielo.
^ Mbuta ate oya lo eshidi 12 wa yanyi.
^ Mbuta ate oya lo eshidi 3 wa dikɔlɔ.
^ Kana “akahɛngɛ mbala k’ekomelo.”
^ Kana “diombo diohɔma.”
^ Kana “diombo diohɔma.”
