Luka 7:1-50
7 Lam’akashidiya Yeso mbuta kɛnɛ kakandalange mbutɛ anto, nde akɔtɔ la Kapɛrnauma.
2 Owandji w’asɔlayi ɔmɔtshi aki l’ose olimu wakandalangaka efula, waki la hemɔ wolo ndo waki l’asa eko la nyɔi.+
3 Lam’akandoke lokumu lendana la Yeso, nde akatome dikumanyi dimɔtshi di’ase Juda le nde dia tɔɔlɔmba dia nde ndja ndjɔkɔnɔla ose olimu ande.
4 Vɔ wakaye le Yeso wakɔɔsɛngasɛnga efula, wata vate: “Nde sunganaka mɛtɛ dia wɛ mbokimanyiya,
5 nɛ dia nde nangaka wodja aso ndo ndamɛ mbakatokɛ shinangɔnga.”
6 Ko Yeso akatshu kaamɛ la wɔ. Lam’akinde aya suke la nkoma lɛkɔ, owandji w’asɔlayi akashile ntoma angɛnyi ande dia ndjowotɛ ɔnɛ: “Nkumadiɔndjɔ toyaɛnyake paa, nɛ dia dimi haasungana dia wɛ mbɔtɔ lo luudu+ lami.
7 Diakɔ diakamɛnyi dia haasungana ndja dimɛ le yɛ. Ta paka dui to, kele ose olimu ami akɔnɔ.
8 Nɛ dia ndo dimi lawɔ lekɔ la lowandji, lekɔ la asɔlayi. Kam’atɛmi ɔmɔtshi nte: ‘Tshɔka,’ ko nde ntshɔ, ndo okina nte: ‘Yaka,’ ko nde ndja, ndo kam’atɛmi ose olimu ami nte: ‘Sala kɛnɛ,’ ko nde kisala.”
9 Lam’akoke Yeso akambo asɔ, nde akaambe efula ndo akatɛ olui w’anto wakayawoyelaka ate: “Lambonyotɛ nte: Kaanga lo Isariyɛlɛ, talɛnyi ndooko onto la mbetawɔ+ ka wolo ka nganɛ.”
10 Lam’akakalola ase olimu wakawatome, vɔ wakayotana ose olimu waki la hemɔ ambɔkɔnɔ.+
11 Yema tshitshɛ l’ɔkɔngɔ wa laasɔ, nde akande lɔkɛndɔ otsha l’osomba welɛwɔ Nayina ndo ambeki ande la olui a woke w’anto wakatshu kaamɛ la nde.
12 Lam’akandakome suke la soko di’osomba, nyolonge, wakayatombaka la odo ɔmɔtshi, ɔna ɛtɔi* laki mama+ kɛmɔtshi kaki wadi aki odo. Olui a woke w’anto w’oma l’osomba waki kaamɛ la mama kakɔ.
13 Lam’akɛnyi Nkumadiɔndjɔ womoto ɔsɔ, nde akawoke kɛtshi+ ndo akawotɛ ate: “Takolela.”+
14 Ko nde akasukana ndo akananda kaka* y’odo, ko wanɛ wakatɛmbaka odo wakemala ndo nde akate ate: “Ɔlɔngɔ, dimi lambokotɛ nte, etɔ!”+
15 Ko ɔnɛ lakavu aketɔ ndo akatatɛ ntɛkɛta ko Yeso akawosha nyango.+
16 Anto tshɛ wakandama la wɔma ndo wakatatɛ ntombola Nzambi, wata vate: “Omvutshi wa woke amboya l’atei aso”+ ndo “Nzambi ambodja anto ande yimba.”+
17 Ko lokumu lande lakahandjɔnɛ lo Judeya y’otondo ndo lo ngelo tshɛ yaki suke.
18 Ambeki waki Joani wakatowotɛ akambo asɔ tshɛ.+
19 Ko Joani akelɛ ambeki ande 2 ndo akaatome le Nkumadiɔndjɔ dia vɔ towombola ɔnɛ: “Onde wɛ kele Ɔnɛ lahomba ndja+ kana sho pombaka nkonga okina?”
20 Lam’akawakome le nde, vɔ wakawotɛ vate: “Joani Obatizanyi kototomi le yɛ dia ndjokombola ɔnɛ: ‘Onde wɛ kele Ɔnɛ lahomba ndja kana sho pombaka nkonga okina?’”
21 Lo wonya akɔ, nde akakɔnɔla anto efula waki la elando+ ndo la hemɔ ya wolo, akatondja ɛdiɛngɛ ndo akakimanyiya akanga wa totshungu efula dia vɔ nsɛna.
22 Nde akaakadimola ate: “Nyotshu, nyototee Joani kɛnɛ kɛnanyu ndo kɛnɛ kokanyu: Akanga wa totshungu wambɔsɛna,+ akanga wa tshumbe wambɔkɛndakɛnda dimɛna, akanga wa sudi wambɔkɔnɔ, akanga wa mpoke wamboka,+ edo wambolɔ ndo ase wola wambosambishama lokumu l’ɔlɔlɔ.+
23 Ɔngɛnɔngɛnɔ le ɔnɛ lahatane le mi+ ndooko dui dia ntakana.”
24 Lam’akakalola anto wakatome Joani, Yeso akambola elui w’anto lo dikambo dia Joani ate: “Akanyatshu tenda l’oswe? Onde sɔpɔ diasutshasutshama la lɔpɛpɛ?+
25 Ko akanyatshu tenda mɛtɛ? Onto lɔlɔtshi ahɔndɔ+ w’oshinga wolo?* Wanɛ walɔta ahɔndɔ w’oshinga wolo ndo wasɛna lɔsɛnɔ la dimɛna wekɔ lo mvudu ya nkumi ya dikanga.
26 Ko lo mɛtɛ, lande na kakanyatshu? Onde dia tenda omvutshi ɔmɔtshi? Ɛɛ, lambonyotɛ nte, onto loleki omvutshi.+
27 Lo dikambo diande mbakawafunde ɔnɛ: ‘Eenda, dimi lambotoma dikɛndji diami la ntondo kayɛ,* nde ayokɔlɔngɔsɔlɛ mboka la ntondo kayɛ.’+
28 Lambonyotɛ nte, l’atei w’anto wakotɔ oma le wamato, ndooko onto loleki Joani woke, koko onto loleki tshitshɛ lo Diolelo dia Nzambi mboleka woke.”+
29 (Lam’akoke anto tshɛ ndo afutshanyi w’elambo ngasɔ, vɔ wakate dia Nzambi ekɔ la losembwe, nɛ dia vɔ wakabatizama la batisimu ka Joani.+
30 Koko Afarisɛ la wanɛ wakayashaka tshavu lo Ɛlɛmbɛ kombetawɔ dako* di’oma le Nzambi,+ nɛ dia vɔ kobatizama le Joani.)
31 “La na ayomɛdika anto wa lo lɔlɔnga lɔnɛ ndo afɔna la wɔ?+
32 Vɔ wekɔ oko ana w’akɛnda wodjashi lo lobingu welɛ asekawɔ watɔkɛnyaka la wɔ ndo wata ɔnɛ: ‘Takanyodɛ hionge, koko nyu kɔɔnɔ. Takanyembɛ esambo w’ɔkɛyi, koko nyu kondela.’
33 Woho akɔ waamɛ mbele, Joani Obatizanyi akaye, koko nde kɔɔndɛka ndo kɔɔnɔka wanu+ oko anto akina, ko nyu mbutaka nyate: ‘Nde ekɔ la ɔdiɛngɛ.’
34 Ɔna onto amboya ndo nde ekɔ lo ndɛ ndo ekɔ lo nnɔ, ko nyu mbutaka nyate: ‘Nyende kanga lɔtɔmɔ ndo ɔnɔshi wa wanu, ɔngɛnyi w’afutshanyi w’elambo ndo w’atshi wa pɛkato!’+
35 Woho akɔ waamɛ mbele, lomba lamboyindjama* oma le ana alɔ tshɛ.”*+
36 Ko Ofarisɛ ɔmɔtshi akatetemala mbɔlɔmba dia nde tɔlɛ yangɔ lakande. Ko nde akatshu lo luudu l’Ofarisɛ akɔ ndo akadjasɛ la mɛsa.
37 Nyolonge, womoto ɔmɔtshi lakeyamaka l’osomba oko otshi wa pɛkato akoke dia Yeso akalɛka* lo luudu laki Ofarisɛ akɔ ko nde akaye la ɔlɔndɔ w’alabatrɛ waki la malashi.+
38 Nde akayemala l’ɔkɔngɔ wa Yeso l’ekolo ande, akalele ndo akatatɛ ndɔya ekolo waki Yeso l’asɔyi, ko akaakitolaka la divo dia l’ɔtɛ ande. Ndo nto, nde akake Yeso ɛlɔmɔ l’ekolo ndo akatɛ malashi lɔkɔ.
39 Lam’akɛnyi Ofarisɛ wakawelɛ dia ndjɔlɛ dikambo sɔ, nde akate l’otema ande ate: “Otonga pami kɛnɛ ekɔ omvutshi, tshike nde oteya woho w’onto wele womoto ɔnɛ lawonanda dia nde ekɔ otshi wa pɛkato.”+
40 Koko Yeso akawotɛ ate: “Simɔna, lekɔ lo nanga kotɛ dui dimɔtshi.” Nde akawotɛ ate: “Ota, Ombetsha!”
41 “Anto 2 wakakolama dibasa le onto ɔmɔtshi. Ɔmɔtshi akakolama dɛnariyo* 500 ndo okina 50.
42 Lam’ele vɔ komonga ndooko l’ɛngɔ ka mfuta, nde akaadimanyiya vɔ akɔ 2 l’otema ɔtɔi. Akɔna l’atei awɔ ayoleka mbooka ngandji?”
43 Simɔna akakadimola ate: “Dimi fɔnyaka dia ɔnɛ lakandadimanyiya falanga yoleki efula.” Yeso akawotɛ ate: “Wɛ ambokadimola dimɛna.”
44 Ko nde akakadimɔ otsha le womoto akɔ ndo akatɛ Simɔna ate: “Onde wɛ ekɔ lo mɛna womoto ɔnɛ? Lakamɔtwɛ lo luudu layɛ, wɛ hambisha ashi wa nsola ekolo. Koko womoto ɔnɛ ambosola ekolo ami l’asɔyi ande ndo ambowakitola la divo diande.
45 Wɛ hambisha bizɛ, koko ntatɛ wonya wakamakomi lanɛ, womoto ɔnɛ ekɔ lo ntetemala mbika ɛlɔmɔ ande l’ekolo ami.
46 Wɛ hate esɔ l’ɔtɛ ami, koko womoto ɔnɛ ambotɛ malashi l’ekolo ami.
47 L’ɔtɛ wa dui sɔ, lambokotɛ nte, pɛkato yande yambodimanyiyama+ kaanga mbeyɔ efula,* nɛ dia nde ekɔ la ngandji k’efula. Koko ɔnɛ ladimanyiyama yema tshitshɛ ekɔ la ngandji ka tshitshɛ.”
48 Oma laasɔ, nde akatɛ womoto akɔ ate: “Pɛkato yayɛ yambodimanyiyama.”+
49 Wanɛ wakadjasɛ kaamɛ la nde la mɛsa wakatatɛ ndjambola vate: “Onto akɔna ɔnɛ adimanyiyana pɛkato?”+
50 Ko nde akatɛ womoto akɔ ate: “Mbetawɔ kayɛ kambokotsha,+ tshɔka lakayɛ la ki.”
Nɔtɛ ka l'ɛse ka dikatshi
^ Tshɛk., “ɔna ɛtɔi lakotama.”
^ Kana “tshangetange yɛmbawɔ edo.”
^ Kana “ɔlɔtɔ wa dimɛna?”
^ Tshɛk., “la ntondo k’elungi kayɛ.”
^ Kana “ɛlɔmbwɛlɔ.”
^ Kana “oma lo etombelo alɔ.”
^ Kana “lamboshikikɛma.”
^ Kana “akadjasɛ la mɛsa.”
^ Kana “weke.”
