Malaki 2:1-17
2 “Ɛlɔmbɛdi le, ɔnɛ aya didjango dikambo dianyu.+
2 Naka nyu ntona mpokamɛ ndo ntona didja l’etema dia ntombola lokombo lami,” mbata Jehowa kanga lolembelembe, “dimi layonyotomɛ mananu+ ndo layokadimola ɛtshɔkɔ anyu mananu.+ Ɛɛ, dimi lakakadimola ɛtshɔkɔ mananu, nɛ dia nyu hanyodje didjango sɔ l’etema.”
3 “Eenda, l’ɔtɛ anyu,+ dimi layolanya* woho anyu wakanyonɛ ndo dimi layonyotɛ tumi lo dungi dianyu, tumi ta lo fɛtɛ yanyu, ndo nyu nyayɔtɔlama otsha le tɔ.*
4 Ko nyu nyayeya dia dimi lakanyosha didjango sɔ dia sheke yakamadje la Lɛwi ntetemala,”+ mbata Jehowa kanga lolembelembe.
5 “Sheke yakamadje la nde aki ya lɔsɛnɔ ndo ya wɔladi wakamawosha kaamɛ la wɔma.* Nde akamboke wɔma, ɛɛ, nde akoke lokombo lami wɔma.
6 Ɛlɛmbɛ* wa mɛtɛ waki l’onyɔ+ ande ndo ndooko kɔlɔ kakatanema l’ɛlɔmɔ ande. Nde akakɛndakɛnda la mi lo wɔladi ndo lo losembwe,+ ndo nde akakadimola anto efula oma lo kɔlɔ.
7 Nɛ dia ɛlɔmɔ w’ɔlɔmbɛdi pombaka nama ewo, ndo anto pombaka nyanga ɛlɛmbɛ* oma l’onyɔ+ ande, nɛ dia nde ekɔ ɔkɛndji wa Jehowa kanga lolembelembe.
8 “Koko nyuamɛ nyakatakɔ mboka. Nyu nyakatakanya anto efula lo kɛnɛ kendana la ɛlɛmbɛ.*+ Nyu nyakalanya sheke ya Lɛwi,”+ mbata Jehowa kanga lolembelembe.
9 “Diakɔ diele dimi layonyɔnyɔla ndo layonyokitshakitsha la ntondo k’anto tshɛ, nɛ dia nyu konama mboka yami, koko nyakakɛnɛmɔla shɔnɔdi lo okambelo wa la ɛlɛmbɛ.”+
10 “Shi sho tshɛ tekɔ la shɛso+ ɔtɔi? Shi Nzambi ɔtɔi kakatotonge? Ko lande na kasalanɛso+ akambo la lokeso lo mɔnyɔla sheke ya watshɛso?
11 Juda akasale akambo la lokeso, ndo dui dimɔtshi dia wɔnɔnyi diakasalema l’Isariyɛlɛ ndo la Jɛrusalɛma; nɛ dia Juda akɔnyɔla ekila* ka Jehowa,+ kele Nde kilangaka, ndo nde akatshuke ɔna womoto la jambizambi+ y’ase wedja.
12 Jehowa ayonya ɔnɛ tshɛ lasala dui sɔ oma lo mvudu y’apɛma ya Jakɔbɔ, oyadi woho w’onto wende,* oyadi nde mbela olambo wa woshasha le Jehowa kanga lolembelembe.”+
13 “Ndo ekɔ dui dikina* diasalanyu, diasala dia elambwelo ka Jehowa kombama la asɔyi, la delo ndo la akumu, diakɔ diele nde hayodja yimba nto lo elambo anyu wa weshasha kana ngɛnangɛna ɛngɔ tshɛ k’oma lo anya+ anyu.
14 Ko nyu mbutaka nyate: ‘La ɔkɔkɔ akɔna?’ Nɛ dia Jehowa akayala oko ɔmɛnyi lam’asayɛ la wadi la lo nshi yayɛ ya dikɛnda, lakayakese kaanga mbende olonganyi ayɛ ndo wadɛyɛ la sheke.*+
15 Koko ekɔ onto ɔmɔtshi laki kosala dui sɔ, nɛ dia nde aki la yema ya nyuma yakatshikala. Ndo kakɔna kakayangaka onto ɔsɔ? Kanula* ya Nzambi. Ɔnkɔnɛ, nyoyalame lo timba tanyu, ndo onto atokesake wadi la lo nshi yande ya dikɛnda.
16 Nɛ dia dimi* petshaka odiakelo wa diwala,”+ mbata Jehowa Nzambi k’Isariyɛlɛ, “ndo ɔnɛ lakomba dihɔndɔ diande la awui wa ngala,”* mbata Jehowa kanga lolembelembe. “Nyoyalame lo timba tanyu ndo nyu hanyohombe nkesa.+
17 “Nyu nyakalɛndja Jehowa la ɛtɛkɛta+ anyu. Koko nyu mbutaka ɔnɛ: ‘Ngande wakatɔɔlɛndja?’ Lo mbuta ɔnɛ: ‘Onto tshɛ lasala kɔlɔ ekɔ ɔlɔlɔ lo washo wa Jehowa, ndo nde mbɔngɛnangɛnaka,’+ kana lo mbuta ɔnɛ: ‘Lende ele Nzambi ka losembwe?’”
Nɔtɛ ka l'ɛse ka dikatshi
^ Tshɛk., “layohangwɛ.”
^ Mbuta ate lɛnɛ akitshama tumi ta nyama y’elambo.
^ Kana “dilɛmiɛlɔ; wɔma wɔsɔhanyemi la dilɛmiɛlɔ.”
^ Kana “Wetshelo.”
^ Kana “wetshelo.”
^ Kana ondo “la wetshelo anyu.”
^ Kana ondo “tɛmpɛlɔ k’ekila.”
^ Tshɛk., “ɔnɛ lambemɔ ndo ɔnɛ lakadimola.”
^ Tshɛk., “dia hende.”
^ Kana “wadɛyɛ lakayatshuke.”
^ Tshɛk., “Lɔtɔngɔ.”
^ Tshɛk., “nde.”
^ Kana “layasha lo awui wa ngala.”
