Ondaki 1:1-18
1 Ɛtɛkɛta wa otshumanyishi,*+ ɔna Davidɛ nkumekanga ka la Jɛrusalɛma.+
2 “Anyanya w’anyanya!” mbata otshumanyishi,“Anyanya w’anyanya! Tshɛ ekɔ anyanya!”+
3 Kakɔna kakondja onto oma lo olimu ande tshɛ wa woloWɛnande paa l’ɛse olongo?+
4 Lɔlɔnga lɔmɔtshi mbetaka ko lɔlɔnga lokina ndjaaka,Koko nkɛtɛ tshikalaka* pondjo.+
5 Wonya tombaka* ndo wonya mbɔtɔka;Oma laasɔ, vɔ kalolaka la shamanya tshɛ* otsha lɛnɛ atombawɔ nto.+
6 Lɔpɛpɛ tshɔka lo sidɛ ndo tshimbaka otsha lo nɔrdɛ;Lɔ tetemalaka ntshimba ko ntshimba; lɔpɛpɛ tetemalaka nsala otshimbedi alɔ.
7 Ɛkɛdi* tshɛ kɛlaka otsha lo ndjale, koko ndjale halole.+
Vɔ kalolaka oma lɛnɛ akɛla ɛkɛdi dia vɔ nkɛla nto.+
8 Diangɔ tshɛ diambɔlɛmba;Ndooko onto lakoka ntɛkɛta dikambo diadiɔ.
Sso hadiohekɔ mɛna;Ndo toyi hadiohekɔ mboka.
9 Kɛnɛ kakonge kayonga,Ndo kɛnɛ kakasalema kayosalema nto;Ndooko kɛnɛ kele oyoyo l’ɛse olongo.+
10 Onde ekɔ ɛngɔ kɛmɔtshi kakoka onto mbuta ate: “Eenda, ɛngɔ kɛnɛ kekɔ oyoyo”?
Tɔ kamboshilaka monga oma ko edjedja;Tɔ kamboshilaka monga la ntondo ka nshi yaso.
11 Ndooko onto lohɔ anto wa lo nshi yakete;Ndo ndooko onto layohɔ wanɛ wayoya l’ɔkɔngɔ;Ndo vɔ hawotohɔma oma le wanɛ wayoya l’ɔkɔngɔ+ awɔ.
12 Dimi otshumanyishi laki nkumekanga ka Isariyɛlɛ lo Jɛrusalɛma.+
13 Dimi lakadje otema ami dia mbeka ndo nsɛdingola la lomba+ tshɛ kɛnɛ tshɛ kasalema l’ɛse olongo,+ olimu wa shɔkɔ wakasha Nzambi ana w’anto dia vɔ kambaka.
14 Dimi lakende elimu tshɛ wakasalemaka l’ɛse olongo,Ko lakɛnyi dia tshɛ ekɔ anyanya, oko onto latatshanya lɔpɛpɛ.+
15 Kɛnɛ kokotami hakoke nsembɔ,Ndo kɛnɛ kele bu hakoke mbadiema.
16 Ko dimi lakate l’otema ami nte: “Eenda, dimi lakakondja lomba l’efula oleki onto tshɛ laki la ntondo kami la Jɛrusalɛma+ ndo otema ami wakakondja lomba ndo ewo+ lo yɛdikɔ y’efula.”
17 Dimi lakadje otema ami dia mbeya lomba, dia mbeya awui wa kanga dadi* ndo dia mbeya awui w’enginya,+ ndo dui sɔ nto diekɔ oko onto latatshanya lɔpɛpɛ.
18 Nɛ dia efula ka lomba mbelaka efula k’ekiyanu,Ko onto tshɛ lafudia ewo fudiaka kandji.+
Nɔtɛ ka l'ɛse ka dikatshi
^ Kana “osanganyishi.”
^ Tshɛk., “memalaka.”
^ Kana “yanyi mbalɛka.”
^ Kana “kalolaka la lɔhɛngɔ tshɛ.”
^ Kana “Ɛkɛdi wa lo nshi ya tshistshi; Ɛkɛdi wa lo deko.”
^ Kana “w’enginya ka tshɔlɔlɔ.”
