Ondaki 10:1-20
10 Oko watodjaka edo wa ntshingo nsolo lo esɔ k’osadi wa malashi, ngasɔ mbele yema y’enginya ndanyaka lomba ndo lotombo.+
2 Otema wa kanga lomba mbɔlɔmbɔlaka lo mboka ka dimɛna,* koko otema wa kanga enginya mbɔlɔmbɔlaka lo mboka ka kɔlɔ.*+
3 Oyadi mboka kakɔna kakɛndakɛnda kanga enginya, nde bu la ekanelo k’ɔlɔlɔ,*+ ndo nde salaka dia onto tshɛ mbeya dia nde ekɔ enginya.+
4 Naka omboledi ambokooka nkɛlɛ,* tomɔke oma lo dihole diayɛ,+ nɛ dia wɔlamu tutshaka pɛkato+ ya weke.
5 Ekɔ dui dimɔtshi diasha paa diakamɛnyi l’ɛse olongo, woho wa munga kasala wanɛ wele la lowandji:+
6 Akanga wa dinginya kitshamaka lo ahole efula wa la diko, koko wanɛ wele la akoka* tshikalaka lo ahole wa l’ɛse.
7 Dimi lakɛnyi ekambi laadiko dia mfalasa, koko ewandji watakɛndakɛnda l’ekolo oko ekambi.+
8 Onto latshima difuku koka ntambɛ lɔkɔ;+ ndo ɔnɛ lanyukola ehele ka l’ave koka numatama oloyi.
9 Otshimi mbɔkɔ koka pomuyama la yɔ, ndo onto laata esongo koka monga lo waale oma le wɔ.*
10 Naka shɔka yambotshuna ko onto hayidje mpɛmɔ, nde ayohomba mbidja welo efula. Koko lomba kimanyiyaka dia ntondoya dikambo.
11 Naka oloyi numata osaki w’ekanga wa manamana la ntondo ka nde nsaka ekanga ande, osakelo ande w’ekanga bu la wahɔ le nde.
12 Ɛtɛkɛta w’oma lo onyɔ wa kanga lomba pomuyaka lokolo l’ɔlɔ,+ koko ɛlɔmɔ wa kanga enginya wekɔ elanyelo+ kande.
13 Ɛtɛkɛta wa ntondo w’oma lo onyɔ ande wekɔ awui w’enginya,+ ndo ɛtɛkɛta w’ekomelo wekɔ awui wa kanga dadi wa kɔlɔ efula.
14 Koko kanga enginya tetemalaka ntɛkɛta.+
Onto heye kɛnɛ kayosalema; akɔna akoka mbotɛ kɛnɛ kayosalema l’ɔkɔngɔ ande?+
15 Olimu wa wolo wa kanga enginya mbɔlɛndjaka demba, nɛ dia nde heye kaanga woho wa ntana mboka k’otsha lo osomba.
16 Ande kɔlɔ le wodja etena konga ɔna dikɛnda nkumekanga+ ndo katatɛ ewandji nsala fɛtɛ la pindju lee!
17 Ande ɔngɛnɔngɛnɔ le wodja etena konga ɔna ɛlɔhɛ nkumekanga ndo kalɛ ewandji lo etena kahombama dia nkondja wolo, koko aha dia mbidjɔ wanu+ lee!
18 L’ɔtɛ wa nɛndɛ kamboleka, nsambe ka luudu mɛngamaka, ndo l’ɔtɛ wa anya wa kanga osuwa luudu selaka.+
19 Mbo ya ndɛ salemaka dikambo dia tɔɔla, ndo wanu mbetɛka lɔsɛnɔ ɔngɛnɔngɛnɔ;+ koko falanga kotshaka ehomba+ tshɛ.
20 Oyadi kaanga lo tokanyi* tayɛ, todjake nkumekanga mananu*+ ndo todjake kanga ɔngɔnyi mananu lo luudu layɛ la ndala; nɛ dia fudu* koka mɛmba wondjo wa dui,* kana etongami kele la ahafu koka mbuta kɛnɛ kakatami.
Nɔtɛ ka l'ɛse ka dikatshi
^ Tshɛk., “wekɔ lo lonya lande l’omi.”
^ Tshɛk., “wekɔ lo lonya lande la lɔmɔsɔ.”
^ Tshɛk., “otema ande bu.”
^ Tshɛk., “nyuma; loowe.”
^ Tshɛk., “ɔngɔnyi.”
^ Kana ondo “pombaka monga la yambalo la wɔ.”
^ Kana ondo “lo mbeto kayɛ.”
^ Kana “mbidja etshii.”
^ Tshɛk., “etongami kafumbɔ l’olongo.”
^ Kana “losango.”
