Ondaki 12:1-14
12 Ɔnkɔnɛ, ohɔke Otungi ayɛ wa Woke lo nshi yayɛ y’ɔlɔngɔlɔngɔ,+ la ntondo ka nshi ya paa* yataye+ ndo ɛnɔnyi watakoke wayoyota wate: “Dimi haawangɛnangɛna;”
2 la ntondo ka wonya, osase ndo ngɔndɔ la tɔɔtɔ nyimala,+ ndo ka wange nkalola l’ɔkɔngɔ wa* mvula;
3 lushi layonga alami wa luudu wotshingatshinga,* epele w’apami wokotama, wamato wambotshika ntɔ nɛ dia waya bu efula, ndo esekaseka watolengɛka lo adidishi wɛnaka wodjima+ oto;
4 etena kadihama nkuke y’otsha lo shinga, etena kakitakita londjo la wanɛ wahɛla lo dive di’ɔhɛlɔ, etena kemɔ onto oma lo djɔ la londjo la fudu, ndo kalɛmba ana wa wamato wemba osambo.+
5 Ndo nto, etena konga onto ooka kɛnɛ kele la diko wɔma ndo wɔma wa mamba waya lo shinga. Ndo osongo w’amandɛ wambodja alɛmbɔlɛmbɔ,+ dikata dioyakotola dɔamɛ, ndo elowa wa kapiro wambokamɔ, nɛ dia onto otatshu otsha lo luudu lande la pondjo+ ndo asadi w’otanda weteta lo shinga;+
6 la ntondo ka ɔkɔdi wa mfɛsa minyɛma, ka dɔnga dia paonyi mbolɛ, ka mbaka ka lo ɛtɛkɔ mbolɛ, ndo ka etshimbi wakotola ashi lo ɛtɛkɔ minɔma.
7 Oma laasɔ, ditshu kalolaka lo nkɛtɛ,+ oko wakidiɔ ndo lomu* kalolaka le Nzambi ka mɛtɛ lakalisha.+
8 “Anyanya w’anyanya!” mbata otshumanyishi.+ “Tshɛ ekɔ anyanya!”+
9 Otshumanyishi komonga tsho la lomba koko nde akatetemala mbetsha anto kɛnɛ kakandeyaka,+ ndo nde akakane yimba ndo akasale eyangelo wa lotshimola dia nsanganya* tokedi+ efula.
10 Otshumanyishi akasale eyangelo dia ntana tɔtɛkɛta t’amɛna+ ndo dia mfunda tɔtɛkɛta t’eshika ta mɛtɛ.
11 Ɛtɛkɛta wa akanga wa lomba wekɔ oko diangɔ di’ɛsɔdi,+ ndo ɛtɛkɛta awɔ wa losanganya wekɔ oko nsɛti yɔkɔkɔmadi wolo; vɔ wakakimɔma oma le olami w’ɛkɔkɔ ɔtɔi.
12 Ɔnami, ewɔ akambo akina tshɛ laadiko dia akambo anɛ: Osalelo wa abuku efula bu la ekomelo, ndo ndjasha efula lɔkɔ kɔmɔlaka demba.+
13 Akambo tshɛ wambokɛma, ekomelo ka dikambo tɔ kɛnɛ: Oka Nzambi ka mɛtɛ wɔma+ ndo kitanyiyaka ɛlɛmbɛ ande,+ nɛ dia ɔsɔ kele ɔkɛndɛ woleki ohomba lo lɔsɛnɔ l’onto.+
14 Nɛ dia Nzambi ka mɛtɛ ayolombosha anto l’ɔtɛ wa kɛnɛ tshɛ kasalawɔ, mbidja ndo dikambo tshɛ dioshɛmi, oyadi di’ɔlɔlɔ kana dia kɔlɔ.+
Nɔtɛ ka l'ɛse ka dikatshi
^ Kana “nshi yele la mpokoso.”
^ Kana ondo “kaamɛ la.”
^ Kana “wosaka lokomba.”
^ Tshɛk., “nyuma.”
^ Kana “nɔnga l’ɔnɔngɔ.”
