Ondaki 2:1-26
2 Ko dimi lakate l’otema ami nte: “Yaka kele pembe ɔngɛnɔngɛnɔ* dia dimi mbeya ɔlɔlɔ akɔna wayonga.” Koko dui sɔ nto diekɔ anyanya.
2 Dimi lakate dikambo dia tɔɔla nte: “Ɔsɔ ekɔ awui wa kanga dadi!”
Ndo dikambo di’ɔngɛnɔngɛnɔ* nte: “Naa ohomba awɔ?”
3 Dimi lakasale eyangelo la otema ami lo ndjasha dia mbeya ɔlɔlɔ waya oma lo wanu,+ l’etena kɛsɔ tshɛ lalama lomba lami; dimi lakayasha ndo lo awui w’enginya dia mbeya dui dioleki dimɛna le anto dia nsala lo yema ya nshi yawɔ ya lɔsɛnɔ l’ɛse olongo.
4 Dimi lakakambe elimu efula.+ Dimi lakayakɛ mvudu dikambo diami dimɛ;+ dimi lakayakambɛ dikambɔ dia vinyɔ.+
5 Dimi lakayasalɛ tojardɛ la dikambɔ ndo lakonɛ weho tshɛ w’esongo w’elowa lɔkɔ.
6 Dimi lakayasalɛ eduwa w’ashi dia ndɔyaka hioka* yele l’esongo w’ashashi.
7 Dimi lakakondja ekambi w’apami la wa wamato+ ndo laki la ekambi wakotɔ lo luudu lami.* Ndo nto, dimi lakakondja dongalonga efula, ngɔmbɛ la ɛkɔkɔ+ efula oleki onto tshɛ laki la ntondo kami la Jɛrusalɛma.
8 Dimi lakayamɔtshɛ mfɛsa la paonyi dikambo diami dimɛ,+ diangɔ dia nɛmɔ dia nkumi ya dikanga ndo dia lo prɔvɛnsɛ.+ Dimi lakayatshumanyɛ amembi w’apami ndo wa wamato kaamɛ ndo kɛnɛ kasha ana w’anto ɔngɛnɔngɛnɔ w’efula, mbuta ate womoto, ɛɛ, wamato efula.*
9 Ɔnkɔnɛ, dimi lakayala onto la woke ndo lakaleke onto tshɛ laki la ntondo kami la Jɛrusalɛma.+ Ndo lakatshikala la lomba lami.
10 Dimi kondjadima kaanga ɛngɔ 1 kakamakombola.*+ Dimi kodima otema ami woho ɔmɔtshi w’ɔngɛnɔngɛnɔ,* nɛ dia otema ami waki l’ɔngɛnɔngɛnɔ l’ɔtɛ w’olimu ami tshɛ wa wolo ndo ɔsɔ aki difuto* diami di’oma lo olimu ami wa wolo.+
11 Koko etena kakamakane yimba lo elimu tshɛ wakakambe anya ami ndo olimu wa wolo tshɛ wakamadiɛnɛ dia nkotsha,+ dimi lakɛnyi dia tshɛ ekɔ anyanya oko onto latatshanya lɔpɛpɛ;+ ndooko ɛngɔ kaki la nɛmɔ di’oshika* l’ɛse olongo.+
12 Oma laasɔ, dimi lakɛdiya yimba yami lo lomba, lo awui wa kanga dadi ndo lo awui w’enginya.+ (Nɛ dia kakɔna kakoka onto nsala l’ɔkɔngɔ wa nkumekanga? Paka kɛnɛ kamboshilaka salema.)
13 Ko dimi lakɛnyi dia lomba lekɔ la wahɔ oleki awui w’enginya,+ oko wele osase la wahɔ oleki wodjima.
14 Kanga lomba ekɔ la washo ande lo ɔtɛ ande;*+ koko kanga enginya kɛndakɛndaka lo wodjima.+ Dimi lakayoshihodia nto dia ekomelo kawɔ vɔ tshɛ kekɔ woho ɔtɔi.+
15 Ko lakate l’otema ami nte: “Kɛnɛ kakomɛ kanga enginya kayonkomɛ ndo dimi.”+ Ko kakɔna kakamakondja lo monga la lomba efula? Ko dimi lakate l’otema ami nte: “Dui sɔ nto diekɔ anyanya.”
16 Nɛ dia ndooko onto lohɔma pondjo oyadi kanga lomba kana kanga enginya.+ Lo nshi yayaye, onto tshɛ ayohamɛ. Ndo oko wavɔ kanga lomba mbavɔ kanga enginya.+
17 Ko dimi lakayohetsha lɔsɛnɔ,+ nɛ dia dui tshɛ diasalema l’ɛse olongo mɛnamaka dia diekɔ lo mbishami paa, nɛ dia tshɛ ekɔ anyanya+ oko onto latatshanya lɔpɛpɛ.+
18 Dimi lakayohetsha kɛnɛ tshɛ kakamakambe olimu wa wolo dia kikondja l’ɛse olongo,+ nɛ dia dimi layohomba kitshikɛ onto layoya l’ɔkɔngɔ ami.+
19 Eeya kana nde ayonga kanga lomba kana enginya?+ Koko nde ayɔlɔmbɔla kɛnɛ tshɛ kakamamane wolo ami ndo lomba lami dia kikondja l’ɛse olongo. Dui sɔ nto diekɔ anyanya.
20 Ɔnkɔnɛ, dimi lakatatɛ nkɔmɔ l’otema ami l’ɔtɛ wa olimu wa wolo tshɛ wakamadiɛnɛ la nkamba l’ɛse olongo.
21 Nɛ dia onto mbeyaka nkamba olimu wa wolo, nɔmbwama la lomba, la ewo ndo la diewo, koko nde pombaka nkimɔ yema yande* le onto laki kokamba dia kikondja.+ Dui sɔ nto diekɔ anyanya ndo mpokoso ka woke.
22 Kakɔna mɛtɛ kakondja onto oma lo olimu ande tshɛ wa wolo ndo tokanyi tawɔlɔmbɔla* dia nkamba olimu wa wolo l’ɛse olongo?+
23 Nɛ dia l’edja ka nshi yande tshɛ, olimu ande mbelaka paka paa la ekiyanu,+ ndo kaanga l’otsho, otema ande hawomuya.+ Dui sɔ nto diekɔ anyanya.
24 Ndooko kɛnɛ kele dimɛna le onto oleki ndɛ la nnɔ ndo ngɛnangɛna* lo olimu ande wa wolo.+ Dimi lakashihodia dia dui sɔ nto ndja oma lo lonya la Nzambi+ ka mɛtɛ,
25 nɛ dia akɔna alɛ ndo anɔ dimɛna ndekami?+
26 Onto lɔɔngɛnyangɛnya, nde mboshaka lomba, ewo ndo ɔngɛnɔngɛnɔ,+ koko otshi wa pɛkato, nde mboshaka olimu wa nsanganya ndo mɔtshanya tsho diangɔ dia mbisha ɔnɛ langɛnyangɛnya Nzambi ka mɛtɛ.+ Dui sɔ nto diekɔ anyanya oko onto latatshanya lɔpɛpɛ.
Nɔtɛ ka l'ɛse ka dikatshi
^ Kana “ɔlɔ.”
^ Kana “ɔlɔ.”
^ Kana “okonda.”
^ Tshɛk., “ana wa lo luudu.”
^ Kana “ɔna womoto, ɛɛ, ana wa wamato.”
^ Tshɛk., “kakalɔmbɛ washo ami.”
^ Kana “ɔlɔ.”
^ Kana “yema.”
^ Kana “wahɔ.”
^ Kana “washo ande wekɔ hwe.”
^ Kana “nkimɔ ɛngɔ tshɛ.”
^ Tshɛk., “ndo welo wadja otema ande.”
^ Kana “nsala dia anima ande mɛna ɔlɔ.”
