Ondaki 6:1-12
6 Ekɔ mpokoso kekina kakamɛnyi l’ɛse olongo, ndo tɔ komɛka anto mbala efula:
2 Nzambi ka mɛtɛ mbishaka onto ɛngɔnyi, diangɔ dia l’emunyi ndo lotombo diaha nde mpomba ndooko ɛngɔ kakombolande;* koko Nzambi ka mɛtɛ hawosha akoka wa ngɛnangɛna la diɔ kaanga mbakoka ɔngɛndangɛnda ngɛnangɛna la diɔ. Dui sɔ diekɔ anyanya ndo sui dia wolo.
3 Naka onto pombaka mbota mbala 100 ndo nsɛna ɛnɔnyi efula, ntshunda osombe koko nde* hangɛnangɛna la diangɔ diande di’amɛna la ntondo ka nde ntshɔ lo diombo,* dimi pombaka mbuta dia ɔna lovwe la mbotɔ mboleka.+
4 Nɛ dia oyaya koyende ndo kamondeta lo wodjima ndo lokombo lande lambodimana lo wodjima.
5 Kaanga kahandatɛnaka wonya kana kahandeye ndooko dui, nde ndeka* onto ɔsɔ.+
6 Wahɔ akɔna wele lo nsɛna ɛnɔnyi kinunu (1 000) mbala hiende, koko aha la monga la ɔngɛnɔngɛnɔ? Shi anto tshɛ tshɔka lo dihole diakɔ ɔtɔi?+
7 Olimu tshɛ wa wolo wakamba onto ekɔ dia ndodia onyɔ+ ande; koko ndjala kande* hashilaki pondjo.
8 Nɛ dia wahɔ akɔna wele la kanga lomba wolekinde kanga enginya,+ kana wahɔ akɔna wele la ose wola lo mbeya woho wa ntetemala nsɛna?*
9 Ndeka dimɛna ngɛnangɛna la kɛnɛ kɛna washo lo dihole dia mbekekɔ dia nyanga kɛnɛ kakombola onto.* Dui sɔ nto diekɔ anyanya, oko onto latatshanya lɔpɛpɛ.
10 Ɛngɔ tshɛ kamboyala kamboshilaka monga la lokombo, ndo kɛnɛ kele onto mbeyamaka; ndo nde bu la akoka wa mana* la onto looleki wolo.
11 Efula k’ɛtɛkɛta,* efula k’awui w’anyanya; ko wahɔ akɔna welawɔ onto?
12 Akɔna eya kɛnɛ koleki dimɛna dia onto nsala lo lɔsɛnɔ lo yema ya nshi ya lɔsɛnɔ lande l’anyanya latetaka oko dɛdi?+ Nɛ dia akɔna akoka mbutɛ onto kɛnɛ kayotomba l’ɛse olongo l’ɔkɔngɔ wa nde ntshɔ?
Nɔtɛ ka l'ɛse ka dikatshi
^ Kana “pondja anima ande ndooko ɛngɔ.”
^ Kana “anima ande.”
^ Kana “ndo kaanga diombo diatonge diande.”
^ Tshɛk., “ekɔ la diomuyelo efula.”
^ Kana “ka anima ande.”
^ Tshɛk., “dia nkɛndakɛnda la ntondo ka wanɛ wasɛna.”
^ Kana “lo dihole dia mbeteta lo dikambo dia anima.”
^ Kana “ndjaswɛlɛ.”
^ Kana ondo “diangɔ.”
