Ondaki 8:1-17
8 Akɔna ele oko kanga lomba? Akɔna eya okandwelo wa okakatanu?* Lomba l’onto pɛtshɛka elungi kande osase ndo nɛndjalɛndjaka ɛnamelo kande ka shikaa.
2 Dimi nte: “Kitanyiya wadjango wa nkumekanga+ l’ɔtɛ wa etshibelo kakayatshibe le Nzambi.+
3 Tosamanyake dia mimɔ oma lalende.+ Tosukɛke dui tshɛ dia kɔlɔ;+ nɛ dia nde koka nsala kɛnɛ tshɛ kalangande,
4 dikambo ɔtɛkɛta wa nkumekanga wekɔ la wolo;+ akɔna akoka mbotɛ ate: ‘Asalayɛ?’”
5 Onto lakitanyiya ɛlɛmbɛ hatohomɔ lokolo l’ɛngɛnɔ,+ ndo otema wa lomba wayeya etena ka dimɛna ndo yoho ya dimɛna ya nsala akambo.*+
6 Dikambo tshɛ diekɔ la etena kadiɔ ndo yoho yasalemadiɔ,*+ nɛ dia ekakatanu w’anto wekɔ efula.
7 Lam’ele ndooko leya kɛnɛ kayotomba, akɔna akoka mbotɛ woho wayodiosalema?
8 Oko wele ndooko lele la lowandji lo lomu* ndo ndooko lakoka nkimɛ lomu, ngasɔ mbele ndooko onto lele la lowandji lo lushi la nyɔi.+ Oko wele ndooko onto lakimɔma etena ka ta, ngasɔ mbele awui wa kɔlɔ hawototshika wanɛ waasala dia vɔ mpandɔ.*
9 Dimi lakɛnyi awui asɔ tshɛ ndo lakadje otema ami lo olimu tshɛ wasalema l’ɛse olongo, etena kolɛ onto wonyande onto dia mbosalɛ kɔlɔ.*+
10 Ndo dimi lakɛnyi akanga wa kɔlɔ wakundɛma, wanɛ wakɔtɔka ndo wakatombaka oma lo dihole di’ekila, koko kombeta edja vɔ wakohamɛ lo osomba lɛnɛ akawasalaka ngasɔ.+ Dui sɔ nto diekɔ anyanya.
11 L’ɔtɛ wahawɔsɛ onto losadi kɔlɔ yɛdikɔ esadi,+ etema w’anto ndjolomɔlomɔka dia nsala kɔlɔ.+
12 Kaanga mbakoka otshi wa pɛkato nsala kɔlɔ mbala 100 koko tetemalaka nsɛna edja, dimi mbeyaka dia akambo wayonga dimɛna le wanɛ woka Nzambi ka mɛtɛ wɔma, nɛ dia vɔ mbookaka wɔma.+
13 Koko akambo hawotonga dimɛna le kanga kɔlɔ+ ndo nshi yande yele oko dɛdi+ hayototaloyama, nɛ dia nde hoke Nzambi wɔma.
14 Ekɔ dui dimɔtshi diele anyanya diasalema la nkɛtɛ: Ekɔ anto w’ɛlɔlɔ wasalɛwɔ akambo wate kana oko vɔ wakasale kɔlɔ,+ ndo ekɔ akanga wa kɔlɔ wasalɛwɔ akambo wate kana oko vɔ wakasale ɔlɔlɔ.+ Dimi lambota dia dui sɔ nto diekɔ anyanya.
15 Ɔnkɔnɛ, dimi lakate dia ngɛnangɛna,+ nɛ dia ndooko dui diele dimɛna le onto l’ɛse olongo oleki ndɛ, nnɔ ndo ngɛnangɛna; nde pombaka monga la awui asɔ etena kakambande olimu wa wolo lo nshi ya lɔsɛnɔ+ lande yakawosha Nzambi ka mɛtɛ l’ɛse olongo.
16 Dimi lakadje otema ami dia nkondja lomba ndo dia menda akambo* tshɛ wasalema la nkɛtɛ,+ oyadi kaanga ndala ongondo otsho la yanyi.*
17 Oma laasɔ, dimi lakasɛdingola olimu tshɛ wa Nzambi ka mɛtɛ, ko lakashihodia dia anto hawokoke nshihodia kɛnɛ kasalema l’ɛse olongo.+ Oyadi welo akɔna wayodja anto, vɔ hawokoke kishihodia. Oyadi vɔ kɔsɛmaka dia wekɔ la lomba efula dia mbeya, vɔ hawokoke mɛtɛ kishihodia.+
Nɔtɛ ka l'ɛse ka dikatshi
^ Kana “kitshimudi ya dikambo?”
^ Kana “elombwelo.”
^ Kana “elombwelo.”
^ Kana “loowe; lɔpɛpɛ.”
^ Kana ondo “awui awɔ wa kɔlɔ hawokoke mbitsha akanga wa kɔlɔ.”
^ Kana “mbɛnya paa; mbosoya.”
^ Kana “olimu.”
^ Kana ondo “anto hawolale oyadi la yanyi kana la otsho.”
