Ruta 4:1-22
4 Bɔaza akatshu la soko di’osomba+ ko akatodjasɛ laawɔ. Otshungodi wakatɛkɛta Bɔaza dikambo diande+ akayetaka laawɔ. Ko Bɔaza akate ate: “Kapanda, ohoya lanɛ kele yodjasɛ.” Ko nde akaye ndo akadjasɛ.
2 Oma laasɔ, Bɔaza akɔshi dikumanyi 10 dia l’osomba+ ko akawatɛ ate: “Nyodjasɛ lanɛ.” Ko vɔ wakadjasɛ.
3 Bɔaza akatɛ otshungodi+ ate: “Naɔmi lambotokalola oma l’ɛtshi ka nkɛtɛ k’ase Mɔaba+ ekɔ lo nanga nsondja ɛtshi ka nkɛtɛ kaki ɔnangɛso Elimɛlɛkɛ.+
4 Ɔnkɔnɛ, dimi lakɛnyi dimɛna kewoya dui sɔ ndo kotɛ nte: ‘Sombatɔ la ntondo k’ase ngelo ndo ka dikumanyi diaso.+ Naka wɛ ayokitshungola, tshungolatɔ. Ko naka wɛ hatokitshungola, ko wɛ mbutɛmi kele mbeye, nɛ dia wɛ kele la lotshungɔ loleki dia kitshungola ndo oma laleyɛ ko dimi.’” Nde akakadimola ate: “Dimi lekɔ suke dia kitshungola.”+
5 Ko Bɔaza akate ate: “Lushi layoyosomba ɛtshi kakɔ ka nkɛtɛ oma le Naɔmi, wɛ pombaka kisomba ndo oma le Ruta ose Mɔaba lele wadi aki dɛwɔ, dia mbolola lokombo laki dɛwɔ lo etenyi kande k’okitɔ.”+
6 Ko otshungodi akate ate: “Dimi bu la akoka wa kitshungola, nɛ dia dimi mbeyaka ndjolanya etenyi kami k’okitɔ. Lambokosha lotshungɔ la kitshungola wɛmɛ dikambo dimi bu la akoka wa kitshungola.”
7 L’etena kɛsɔ, dia nshikikɛ kɛnɛ tshɛ kakasalemaka, lo nshi y’edjedja, ase Isariyɛlɛ waki la mbekelo kɛnɛ lo dikambo dia lotshungɔ la ntshungola ndo mengɔnya: Onto akahombaka nkolola losabata+ lande, ko mbisha ɔnɛ lasala la nde diokanelo ndo ɔsɔ aki yoho ya nshikikɛ diokanelo lo Isariyɛlɛ.
8 Ɔnkɔnɛ lam’akatɛ otshungodi ɔsɔ Bɔaza ate: “Sombatɔ wɛmɛ,” nde akakolola losabata lande.
9 Ko Bɔaza akatɛ dikumanyi ndo anto tshɛ ate: “Nyekɔ ɛmɛnyi+ ɛlɔ, nɛ dia dimi layanga nsomba diangɔ tshɛ diaki Elimɛlɛkɛ ndo diangɔ tshɛ diaki Kiliyɔna nde la Mahilɔna oma le Naɔmi.
10 Dimi layanga mbɔsa ndo Ruta ose Mɔaba, wadi aki Mahilɔna wadi dia mbolola lokombo laki dɛwɔ lo etenyi kande k’okitɔ,+ diaha lokombo la dɛwɔ nshishɔ oma l’atei w’anango ndo oma lo soko di’osomba wa ngelo kande. Nyu nyekɔ ɛmɛnyi ɛlɔ.”+
11 Ko anto tshɛ waki la soko di’osomba ndo dikumanyi wakate vate: “Sho tekɔ ɛmɛnyi! Jehowa etawɔ dia wadi layanga mbɔtɔ lo luudu layɛ monga oko Rashɛlɛ ndo oko Lea, wanɛ wele oma le wɔ mbakakama luudu la Isariyɛlɛ.+ Ɔngɔnɛ lo Efarata+ ndo oyale la lokombo la dimɛna* la Bɛtɛlɛhɛma.+
12 Lo tshimbo ya ɔna layokosha Jehowa oma le ɔna womoto+ ɔnɛ, luudu layɛ layale oko luudu laki Perɛzɛ,+ ɔna lakote Tamara nde la Juda.”
13 Ɔnkɔnɛ, Bɔaza akatshuke Ruta ko nde akayala wadɛnde. Nde akeyana la nde, ko Jehowa akookimanyiya dia nde ntshɔ diemi ndo nde akote ɔna pami.
14 Ko wamato wakatɛ Naɔmi vate: “Jehowa ɔnɛ lahakotshiki aha la otshungodi ɛlɔ atombɔme. Lokombo lande lewoyame lo Isariyɛlɛ!
15 Nde* ambokokaloyɛ* lɔsɛnɔ* layɛ ndo ayokosukɛ lam’ayoyonga osombe, nɛ dia okilo ayɛ wa womoto wakoka ngandji+ ndo woleki ana w’apami 7 le yɛ ambokotɛnde.”
16 Naɔmi akɔshi ɔnakɔ, akawɛmbɛ lo dihɛlɔ ndo nde akookokɛka.*
17 Oma laasɔ, asukanyi ande wa wamato wakawɔlɛ lokombo. Vɔ wakate vate: “Naɔmi ambota ɔna pami,” ndo wakɔlɛ ɔnakɔ Ɔbɛdɛ.*+ Nde kakayotaka Jɛse+ ya she Davidɛ.
18 Ɔlɔndji wa nkumbo* kaki Perɛzɛ vɔ ɔnɛ: Perɛzɛ+ akote Hɛzɛrɔna;+
19 Hɛzɛrɔna akote Rama; Rama akote Aminadaba;+
20 Aminadaba+ akote Nashɔna; Nashɔna akote Salamɔna;
21 Salamɔna akote Bɔaza; Bɔaza akote Ɔbɛdɛ;
22 Ɔbɛdɛ akote Jɛse;+ ndo Jɛse akote Davidɛ.+
Nɔtɛ ka l'ɛse ka dikatshi
^ Tshɛk., “ewoya lokombo.”
^ Mbuta ate okana waki Naɔmi.
^ Kana “aya okaloyishi wa.”
^ Kana “anima.”
^ Kana “aki ɔndɛdi ande.”
^ Kitshimudi ate: “Okambi; Ɔnɛ lakamba.”
^ Tshɛk., “nɔnga.”
