Tito 1:1-16
1 Dimi Pɔɔlɔ, lele ɔhɔmbɔ wa Nzambi ndo ɔpɔstɔlɔ wa Yeso Kristo lo ndjela mbetawɔ ka asɔnami wa Nzambi ndo ewo k’oshika k’akambo wa mɛtɛ kɔtɔnɛ la omamemelo le Nzambi
2 ndo kohikami lo elongamelo ka lɔsɛnɔ la pondjo+ lakalake Nzambi deko aha nɛ, nde lahakoke mbuta kashi.+
3 Koko lo etena kakandashikikɛ ndamɛ, nde ambeyanya ɔtɛkɛta ande lo tshimbo y’esambishelo kakamalongola ɔkɛndɛ+ lo ndjela didjango dia Nzambi, Oshimbedi aso.
4 Lambofundɛ Tito ɔnami la ngandji lo ndjela mbetawɔ kele la so sho tshɛ nte:
Ɔlɔlɔ waheyama mbɛdika la wɔladi w’oma le Nzambi Shɛso ndo w’oma le Kristo Yeso Oshimbedi aso wayale la yɛ!
5 Dimi lakakotshike la Kɛrɛtɛ dia wɛ nɔngɔsɔla akambo waki kɔkɛndakɛndaka dimɛna ndo dia nsɔna dikumanyi l’osomba la osomba oko wakamakotɛ nte:
6 Naka ekɔ pami kɛmɔtshi kele bu la onongo, kele la wadi ɔtɔi, kele la ana wele ambetawudi ndo wahawafunde dia wekɔ la lɔkɛwɔ la mindo* ndo atɔmbɔki.+
7 Nɛ dia oko wende olami wakasɔnama oma le Nzambi, omendji pombaka monga onto lele bu la onongo, laha ɔtɛ wolo,+ lahomala esadi,+ aha ombidjɔki wa wanu, aha kanga ngala,* aha onto lakombola la lokaki tshɛ dia nkondja diangɔ lo nkamba la lokeso,
8 koko onto lalongola angɛndangɛnda,+ onangi w’akambo w’ɛlɔlɔ, lele la yimba y’ɔlɔlɔ,*+ kanga losembwe, kanga kɔlamelo+ ndo lele la ndjakimɛ,+
9 lakukutɛ ɔtɛkɛta wa kɔlamelo* lo kɛnɛ kendana la diewo diande dia mbetsha,+ dia nde monga l’akoka wa nkeketsha* anto oma lo wetshelo w’oshika*+ ndo mpangwɛ+ wanɛ wɔnyɔla wetshelo akɔ.
10 Nɛ dia atɔmbɔki efula wekɔ, akanga wa diyɔkayɔka ndo akesanyi, djekoleko wanɛ wasukɛ wonyelo wa mpota.+
11 Ekɔ ohomba ndjiha anto asɔ enyɔ, nɛ dia vɔ wekɔ lo mfukutanya nkumbo y’etondo dikambo l’ɔtɛ w’eyango awɔ wa lokaki, vɔ wekɔ lo mbetsha anto akambo wahawahombe mbaetsha.
12 Ɔmɔtshi la l’atei awɔ, omvutshi awɔ hita akate ate: “Ase Kɛrɛtɛ wekɔ nshi tshɛ akanga wa kashi, nyama ya ngala ndo akanga wa nɛndɛ weya paka dia deshi to.”
13 Kɛnɛ kakandate kɛsɔ kekɔ mɛtɛ. L’ɔtɛ wa dikambo sɔ, tetemala mbahangwɛ wolo dia vɔ monga la mbetawɔ ka wolo,
14 aha la mbidja yimba lo toshimu t’ase Juda ndo lo ɛlɛmbɛ w’anto watakoya anto mboka k’akambo wa mɛtɛ.
15 Diangɔ tshɛ diekɔ pudipudi le anto wele pudipudi.+ Koko le anto wele mindo ndo wele bu la mbetawɔ, ndooko ɛngɔ kele pudipudi nɛ dia timba tawɔ ndo nkum’etema yawɔ yekɔ mindo.+
16 Vɔ mbutaka lo sɛkɛ dia vɔ mbeyaka Nzambi, koko vɔ mbaangunaka oma l’etsha awɔ+ nɛ dia vɔ wekɔ wɔnɔnyi, vɔ bu la okitanyiya ndo hawetawɔma dia nkamba weho tshɛ w’elimu w’ɛlɔlɔ.
Nɔtɛ ka l'ɛse ka dikatshi
^ Kana “lele oko nyama.”
^ Kana “lakɔmwana.”
^ Kana “wele la ekanelo k’ɔlɔlɔ.”
^ Kana “losango la mɛtɛ.”
^ Kana “ndaka.”
^ Kana “wa dimɛna; w’ohomba.”
