Tito 2:1-15
2 Koko wɛ, tetemala mbuta akambo wɔtɔnɛ la wetshelo+ w’oshika.*
2 Epalanga w’apami wonge la wɛdimo lo mbekelo yawɔ, wonge anto w’eshika, wonge la yimba y’ɔlɔlɔ, wayale nge lo mbetawɔ, lo ngandji ndo lo ekikelo.
3 Ndo wamato w’epalanga vɔ lawɔ wonge la lɔkɛwɔ l’anto wele la dilɛmiɛlɔ di’efula le Nzambi, watongake amamanyishi kana emunga wa wanu, koko wayale embetsha w’akambo w’ɛlɔlɔ,
4 dia vɔ ndaka* esekaseka dia vɔ nanga waomɛwɔ ndo anawɔ,
5 dia vɔ monga la yimba y’ɔlɔlɔ, dia vɔ monga pudipudi, dia vɔ nkamba elimu lawakawɔ,* dia vɔ monga anto w’ɛlɔlɔ wele l’ɛse ka awui wa waomɛwɔ,+ diaha anto mɔnyɔla ɔtɛkɛta wa Nzambi.
6 Woho akɔ waamɛ mbele, tetemala nkeketsha ɛlɔngɔlɔngɔ dia vɔ monga la yimba y’ɔlɔlɔ,+
7 lo akambo tshɛ, onga ɛnyɛlɔ k’onto lele l’etsha w’ɛlɔlɔ. Etshaka kɛnɛ kele pudipudi* la kɛnɛmɔ+ tshɛ,
8 lo kambaka la ɛtɛkɛta w’amɛna* wahakoke onto mɔnyɔla,+ dia wanɛ watɔlɔsha mbotshama nsɔnyi, aha la monga la dikambo dia kɔlɔ dia mbuta lo lokombo laso.+
9 Mfumbe wayakitshakitsha l’ɛse ka nkumi yawɔ lo akambo tshɛ,+ lo nsala la wolo dia mbangɛnyangɛnya aha la mbahendwɛ,
10 aha la mbava,+ koko wɛnya dia nkumi yawɔ koka mbɛkɛ etema le wɔ lo akambo tshɛ, kele lo akambo tshɛ, kawokoke nɛnga wetshelo wa Nzambi,+ Oshimbedi aso.
11 Nɛ dia ɔlɔlɔ waheyama mbɛdika waki Nzambi wambɛnama ndo vɔ mbelaka weho w’anto tshɛ+ panda.
12 Vɔ tetshaka dia ntona akambo wa kɔlɔ ndo nsaki+ y’andja ɔnɛ ndo dia nsɛna la yimba y’ɔlɔlɔ, la losembwe ndo omamemelo le Nzambi l’atei wa dikongɛ nɛ di’akambo,*+
13 etena kakongaso elongamelo+ k’ɔngɛnɔngɛnɔ ndo wɛnamelo wa lotombo wa Nzambi ka woke ndo wa Oshimbedi aso, Yeso Kristo,
14 lakayakimɔ dikambo diaso+ dia totshungola+ oma lo weho tshɛ w’akambo wa kɔlɔ ndo dia mbɛdia dikambo diande ndamɛ, wodja wele ɛngɔ kande ka laande kele la ohetoheto lo etsha w’ɛlɔlɔ.+
15 Tetemala mbuta akambo asɔ, tetemala ndaka* ndo mpangɔ la lowandji+ tshɛ. Onto atokɔnyɔlake.
Nɔtɛ ka l'ɛse ka dikatshi
^ Kana “wa dimɛna; w’ohomba.”
^ Kana “ndowanya.”
^ Kana “nɔngɔsɔlaka mvudu yawɔ.”
^ Kana ondo “Etshaka la pudipudi tshɛ.”
^ Kana “w’eshika; w’ohomba.”
^ Kana “etena kɛnɛ.” Enda Elembetshielo.
^ Kana “nkeketsha.”
