Tito 3:1-15
3 Tetemala mbaohola dia vɔ ndjakitshakitsha ndo nkitanyiya awui w’emboledi ndo w’ewandji,+ dia vɔ monga suke dia nkamba elimu w’ɛlɔlɔ tshɛ,
2 diaha vɔ ntɛkɛta kɔlɔ lo dikambo di’onto, diaha vɔ monga akanga w’ewanu, koko dia vɔ monga l’ekanelo k’ɔlɔlɔ+ ndo dia vɔ nkɛnɛmɔla memakana otsha le anto tshɛ.+
3 Nɛ dia ndo sho mbaki ntondo dinginya, anto waha la okitanyiya, takanganyiyama, taki mfumbe ya nsaki ya weho la weho ndo y’ɛngɛnɔngɛnɔ, takasɛnaka lo kɔlɔ ndo taki la kandjema, taki anto wahetshama ndo takahetshanaka lam’asaso.
4 Koko, etena kakɛnama ɔlɔlɔ w’otema waki Nzambi,+ Oshimbedi aso ndo ngandji kakandoke anto
5 (aha l’ɔtɛ w’etsha ɛmɔtshi w’ɛlɔlɔ wakatasale,+ koko l’ɔtɛ wa kɛtshi kande),+ nde akatoshimbɛ lo tshimbo ya ɛɔkɛlɔ kakatokonya lo lɔsɛnɔ+ ndo lo tetɛ eyoyo l’ekimanyielo ka nyuma k’ekila.+
6 Nde akatotshulwɛ nyuma kande la lokaho tshɛ lo tshimbo ya Yeso Kristo, Oshimbedi+ aso,
7 kele l’ɔkɔngɔ wa sho mbɔsama oko anto w’ɛlɔlɔ diɛsɛ la ɔlɔlɔ ande waheyama mbɛdika, katonge+ ekitɔ+ lo ndjela elongamelo ka lɔsɛnɔ la pondjo.+
8 Ɛtɛkɛta ɛsɔ wekɔ mɛtɛ ndo dimi nangaka dia wɛ ntetemala nshikimala wolo l’akambo asɔ, kele wanɛ wambetawɔ Nzambi watetemale nshikikɛ timba tawɔ lo monga l’etsha w’ɛlɔlɔ. Akambo asɔ wekɔ ɔlɔlɔ ndo wekɔ la wahɔ le anto.
9 Koko wɛ, toyashake lo taamu t’anyanya la ɛlɔndji wa dioho di’anto la ewanu ndo nkakatana lo dikambo dia Ɛlɛmbɛ, nɛ dia akambo asɔ bu la wahɔ ndo wekɔ anyanya.+
10 Ewɔ+ dia mbekesanɛ l’onto latondja yaato y’ɔtɛmwɛlɔ,+ l’ɔkɔngɔ wa wɛ mbosha alako+ wa wolo* mbala ka ntondo ndo ka hende,
11 lo mbeya dia onto ɔsɔ ambotakɔ mboka, ekɔ lo nsala pɛkato ndo ekɔ lo ndjaanya ndamɛ.
12 Lam’ayomotoma Aratɛma kana Tishiko+ le yɛ, kosale tshɛ dia ndja le mi la Nikɔpɔli, nɛ dia lɛkɔ mbamomɔsa yɛdikɔ ya tetsha nshi ya tshitshi.
13 Kɔlɔngɔsɔlɛ lɔkɛndɔ laki Zena dimɛna, nde lamboyasha tshɛ lo Ɛlɛmbɛ ndo laki Apolo diaha vɔ mpomba ndooko ɛngɔ lo lɔkɛndɔ+ lawɔ.
14 Koko, asekaso pombaka mbeka dia monga la etsha w’ɛlɔlɔ, dia vɔ kimanyiyaka etena konga ohomba wa wanyandja,+ diaha vɔ monga anto wahatɔ elowa.+
15 Anto tshɛ wele kaamɛ la mi wambokotomɛ mɔyɔ. Ombishe wanɛ wele la ngandji le so lo mbetawɔ mɔyɔ.
Ɔlɔlɔ waheyama mbɛdika wa Nzambi wayale la nyu, nyu tshɛ!
Nɔtɛ ka l'ɛse ka dikatshi
^ Kana “mbɔhɛmɔla.”
