Tokedi 20:1-30
20 Wanu wekɔ ɔsɔkanyi+ ndo wanu wadjoya wekɔ ɔtɔmbɔki;+Onto tshɛ langanyiyama la wɔ bu la lomba.+
2 Wɔma* wa nkumekanga wekɔ oko dikita dia ntambwɛ;*+Onto tshɛ lawomadia mbidjaka lɔsɛnɔ lande hita lo waale.+
3 Mbewɔ owanu+ ekɔ dui dia nɛmɔ le onto,Koko onto tshɛ lele enginya ndjatambiyaka lɔkɔ.+
4 Kanga nɛndɛ hafuse lo nshi ya tshitshi,Ko nde ayoyɔlɔmbana lo nshi ya dinela etena kende ndooko la ɛngɔ.*+
5 Tokanyi* ta lo otema w’onto tekɔ oko ashi wa dingunda,Koko kanga shɛnɔdi mbataholaka.
6 Anto efula tɛkɛtaka dia ngandji kawɔ ka kɔlamelo,Ko akɔna akoka ntana kanga kɔlamelo?
7 Onto ɔlɔlɔ kɛndakɛndaka lo olowanyi+ ande.
Ɔngɛnɔngɛnɔ le anande* waya l’ɔkɔngɔ ande.+
8 Etena kadjasɛ nkumekanga lo kiti ka lowandji dia nombosha,+Nde sɛndingolaka kɔlɔ tshɛ la washo+ ande.
9 Akɔna akoka mbuta ate: “Dimi lambɛdia otema ami;+Dimi lambɛla oma lo pɛkato kami”?+
10 Wetsho wa lokeso ndo tɛdikɔ ta kashi*Ekɔ wɔnɔnyi le Jehowa.+
11 Kaanga ɔna* mbeyamaka oma lo etsha ande,Dia kana dionga diande diekɔ pudipudi ndo dimɛna.+
12 Toyi dioka ndo sso diɛna,Jehowa kakaasale vɔ tshɛ.+
13 Tolangake djɔ, atokoyokoma kanga wola.+
Dihola washo ayɛ, ko wɛ ayolotshama la mbo ya ndɛ.+
14 Osombi mbutaka ate: “Bu dimɛna, bu dimɛna!”Oma laasɔ nde tshɔka ndo ndjafunaka dikambo diande ndamɛ.+
15 Paonyi yekɔ kaamɛ ndo kɔrai* yekɔ efula,Koko ɛlɔmɔ wa ewo wekɔ ɛngɔ k’oshinga wolo.+
16 Ɔsa dihɔndɔ di’onto naka nde akakimɔ ɔkɔlɛ le ɔngɛndangɛnda;+Ɔsa ɔkɔlɛ oma le nde naka nde akasale ngasɔ le womoto l’ose wodja okina.*+
17 Mbo ya ndɛ yokondjami oma lo lokeso yekɔ mpɛ le onto,Koko l’ɔkɔngɔ diko onyɔ ande wayolola tɔɔ la mbɔkɔ.+
18 Sangwelo ndowanaka,* diɛsɛ la ɔkɛtshanyelo,*+Ndo lɔsha ta diayɛ la ɛlɔmbwɛlɔ ka dimɛna.*+
19 Omamanyishi mbetetaka dia tasholaka sawo+ dia sheke;Tekesanɛke la onto lalanga vate vate.*
20 Onto tshɛ ladja she la nyango mananu,Tala diande diayodimala lam’ayoya wodjima.+
21 Etenyi k’okitɔ kakondjama ntondo la lokakiHatonga ɔtshɔkɔ l’ekomelo.+
22 Totake wate: “Dimi layɔsɔmbɔya kɔlɔ!”+
Longamɛ le Jehowa,+ ko nde ayokoshimbɛ.+
23 Wetsho wa lokeso* wekɔ wɔnɔnyi le Jehowa,Ndo kilɔ ya lokeso keema dimɛna.
24 Jehowa kalɔmbɔla+ wanya w’onto;Ngande wakoka onto nshihodia mboka kande hita?*
25 Mbelɛ esadi esadi ɔnɛ: “Ekila!”+ ekɔ djonga le onto.
Paka l’ɔkɔngɔ kayondokanaka yimba lo dɔkɔlɔkɔ+ diakandatshike.
26 Nkumekanga ka lomba sɛndingolaka akanga wa kɔlɔ+Ndo mingitolaka etshimbi wa lo esuswelo laadiko diawɔ.+
27 Loowe l’onto lekɔ tala dia Jehowa,Nyangiayangiaka l’etei ka tshondo yande.
28 Ngandji ka kɔlamelo ndo kɔlamelo shimbɛka nkumekanga;+Diɛsɛ la ngandji ka kɔlamelo nde sukɛka kiti kande ka lowandji.+
29 Lotombo laki ɛlɔngɔ w’apami ele wolo awɔ,+Ndo lɔnɛnɛ l’esombe w’anto ele avo awɔ wa ndjwe.+
30 Wɔkwɛlɔ la mpota minyaka* kɔlɔ,+Ndo dikɔmɔki solaka lonto la l’etei.
Nɔtɛ ka l'ɛse ka dikatshi
^ Kana “sase.”
^ Kana “ɔsɔngɔ wa ntambwɛ wele l’alɛfulɛfu.”
^ Kana ondo “Vɔ wayoyonga lo nshi ya dinela koko hawototana ndooko ɛngɔ.”
^ Tshɛk., “Dako.”
^ Tshɛk., “anande w’apami.”
^ Kana “Wetsho ehende wotshikitanyi wa mbɔkɔ ndo diangɔ pende diotshikitanyi dia yɛdikɔ.”
^ Kana “ɔna pami.”
^ Enda Elembetshielo.
^ Kana “ɔngɛndangɛnda.”
^ Kana “dako.”
^ Kana “shikikalaka.”
^ Kana “ka lomba.”
^ Kana “lakesama la ɛlɔmɔ ande.”
^ Kana “Weho ehende wa mbɔkɔ yɛdikawɔ wotsho.”
^ Kana “mboka ka nde ntshɔ?”
^ Kana “solaka.”
