Walelo 23:1-30
23 Oma laasɔ, Balama akatɛ Balaka ate: “Ɔnɔngɔsɔlɛ dilambwelo 7+ ndo ngɔmbɛ 7 kaamɛ la ɛkɔkɔ 7 wa waomi.”
2 Mbala kakɔ ɔtɔi Balaka akasale kɛnɛ kakate Balama. Balaka nde la Balama wakalambola ngɔmbɛ 1 la ɔkɔkɔ 1 lo elambwelo la elambwelo.+
3 Ko Balama akatɛ Balaka ate: “Emala lanɛ suke la olambo ayɛ wa lotshumba kele dimi tokotshɔ. Ondo Jehowa ayosawola la mi. Dimi layoyokotɛ kɛnɛ tshɛ kayondombutɛ.” Ɔnkɔnɛ nde akadɛ lo shɔdi ya dikona.
4 Etena kakasawola Nzambi nde la Balama, Balama+ akawotɛ ate: “Dimi lakalɔngɔsɔdi dilambwelo 7 ndo lakalambodi ngɔmbɛ 1 la ɔkɔkɔ 1 lo elambwelo la elambwelo.”
5 Jehowa akadje awui l’onyɔ wa Balama+ ndo akate ate: “Kalola le Balaka kele towote ngasɔ.”
6 Ɔnkɔnɛ, nde akakalola ko akɛnyi Balaka nde l’ewandji tshɛ wa Mɔaba wemadi suke la olambo ande wa lotshumba.
7 Ko nde akate ɛtɛkɛta wa yokedi ɛnɛ ate:+
“Balaka nkumekanga ka Mɔaba akatɔmbɔsa oma la Arama,+Oma l’akona wa lo ɛstɛ ate:
‘Yaka yombidje Jakɔbɔ mananu.
Ɛɛ, yaka yɔtɛkɛtɛ kɔlɔ dikambo di’Isariyɛlɛ.’+
8 Ngande wakokami mbidja mananu le wanɛ wele Nzambi hawadji mananu?
Ndo ngande wakokami ntɛkɛta kɔlɔ dikambo dia wanɛ wele Jehowa hatɛkɛtshi kɔlɔ?+
9 Oma lo tɔsɔdi t’ave kakamawaɛnyi,Ndo oma l’akona kakamawaɛnyi.
Vɔ wamboyadjasɛ oko olui w’anto lɛkɔ,+Vɔ hawoyaɔshi oko wodja l’atei wa wedja.+
10 Akɔna akoka mbadia olui w’aseka Jakɔbɔ+ wele efula oko nsɛkɛ ya ditshu?Kana mbadia kaanga k’anɛi ɔtɔi k’ase Isariyɛlɛ?
Dimi* nte mvu nyɔi k’anto w’ɔlɔlɔ,Ekomelo kami kayale oko kawɔ.”
11 Ko Balaka akatɛ Balama ate: “Lande na kamboyonsalɛ nganɛ? Dimi lakakelɛ dia wɛ ndjodja atunyi ami mananu, ko wɛ hasadi ndooko dikambo, koko ambaatshɔkɔla.”+
12 Nde akakadimola ate: “Onde dimi halahombe ntɛkɛta kɛnɛ tshɛ kadja Jehowa l’onyɔ ami?”+
13 Ko Balaka akawotɛ ate: “Lam’alangayɛ, yete totshu lo dihole dikina diakokayɛ mbaɛna. Wɛ ayowaɛna paka yema tsho, wɛ hatowaɛna vɔ tshɛ. Tombidjewɔ mananu lɛkɔ.”+
14 Ɔnkɔnɛ, nde akatshu la nde l’oswe wa Zɔfima lo shɔdi ya Pisinga,+ ko akatɔlɔngɔsɔla dilambwelo 7 ndo akalambola ngɔmbɛ 1 la ɔkɔkɔ 1 lo elambwelo la elambwelo.+
15 Ko Balama akatɛ Balaka ate: “Emala lanɛ suke la olambo ayɛ wa lotshumba, kele dimi tokotosawola la Nde lengo.”
16 Jehowa akasawola la Balama, akadje awui l’onyɔ+ ande ndo akate ate: “Kalola le Balaka kele towote ngasɔ.”
17 Ko nde akaye le nde ko akootane awokonga suke la olambo ande wa lotshumba ndo ewandji w’ase Mɔaba wele kaamɛ la nde. Balaka akawombola ate: “Jehowa ate na?”
18 Ko nde akate ɛtɛkɛta wa yokedi ɛnɛ ate:+
“Balaka le, emala ndo hokamɛ.
Ɔna Zipɔrɛ le, ompokame.
19 Nzambi keema onto l’anyanya lata kashi,+Ndo nde keema ɔna onto latshikitanya kanyi yande.*+Naka nde ambota dui dimɔtshi, onde nde hatoditsha?
Naka nde ambɔtɛkɛta, onde nde hatokotsha?+
20 Dimi lakɔsama dia tɔtshɔkɔla;Ko Nde ambɔtshɔkɔla,+ ndo dimi halakoke ntshikitanya.+
21 Nde hetawɔ dia wolo ɔmɔtshi wa maji ndɔshana la Jakɔbɔ,Ndo nde hetawɔ dia waale ɔmɔtshi komɛ Isariyɛlɛ.
Jehowa Nzambi kande ekɔ kaamɛ la wɔ,+Ndo nde ekɔ lo tombɔma oko nkumekanga l’atei awɔ.
22 Nzambi ekɔ lo ndjaatondja oma l’Edjibito.+
Nde ekɔ oko nseke ya ndjate le wɔ.+
23 Nɛ dia ndooko lakoka nsenga Jakɔbɔ,+Ndo ndooko diendja diakoka ndɔshana la Isariyɛlɛ.+
L’etena kɛnɛ, nganɛ mbakokadiɔ mbutama dikambo dia Jakɔbɔ la Isariyɛlɛ:
‘Enda kɛnɛ kambosala Nzambi!’
24 Wodja wayonɛɛ oko ntambwɛ vɔ ɔnɛ,Oko ntambwɛ mbayowonɛɛ vɔamɛ.+
Vɔ hawotetama paka wambɔlɛ nyama kondjiwɔNdo wambɔnɔ dikila dia nyama yodiakiwɔ.”
25 Ko Balaka akatɛ Balama ate: “Naka lo wedi ɔmɔtshi wɛ hakoke mbadja mananu, kete lo wedi okina wɛ hahombe mbatshɔkɔla.”
26 Balama akakadimola Balaka ate: “Dimi kokotɛ nte: ‘Kɛnɛ tshɛ kayombutɛ Jehowa kayomosala’?”+
27 Balaka akatɛ Balama ate: “Lam’alangayɛ, etawɔ dia dimi ntshɔ la yɛ lo dihole dikina. Ondo Nzambi ka mɛtɛ ayotetawɔ dia wɛ mbidjɛmiwɔ mananu lɛkɔ.”+
28 Ko Balaka akatshu la Balama lo shɔdi ya Pɛɔrɛ kɛlane la Jeshimɔna.*+
29 L’ɔkɔngɔ wa laasɔ, Balama akatɛ Balaka ate: “Ɔnɔngɔsɔlɛ dilambwelo 7 ndo ngɔmbɛ 7 la ɛkɔkɔ 7 wa waomi.”+
30 Ko Balaka akasale kɛnɛ kakawotɛ Balama ndo nde akalambola ngɔmbɛ 1 la ɔkɔkɔ 1 lo elambwelo la elambwelo.
Nɔtɛ ka l'ɛse ka dikatshi
^ Kana “anima ami.”
^ Kana “lanyanga.”
^ Kana ondo “oswe; oswe wa shɛnga.”
