Walelo 24:1-25
24 Lam’akɛnyi Balama dia Jehowa nangaka* ntshɔkɔla ase Isariyɛlɛ, nde kotshɔ dihole dikina nto dia tosala diendja,+ koko nde akakadimola elungi kande otsha l’oswe.
2 Lam’akonyiya Balama washo ndo lam’akandɛnyi ase Isariyɛlɛ wohangi lo ndjela waoho awɔ,+ nyuma ka Nzambi kakaye le nde.+
3 Ko nde akate ɛtɛkɛta wa yokedi ɛnɛ ate:+
“Ɛtɛkɛta wa Balama ɔna Beɔrɛ,Ɛtɛkɛta w’onto lele washo ande wakadihɔ,
4 Ɛtɛkɛta wa ɔnɛ lakoke ɔtɛkɛta wa Nzambi,Ɔnɛ lakɛnyi ɛnɛlɔ ka Kanga-Wolo-Tshɛ,Ɔnɛ lakaholɔ l’ɛse la washo wambokombɔ:+
5 Jakɔbɔ le, ande amɛna wele mvudu yayɛ y’apɛma,Ahole wadjasɛyɛ, wɛ Isariyɛlɛ!+
6 Oko ekidi, yɔ yambosembɔnɛ lo mboka,+Oko dikambɔ l’omamu w’ɔkɛdi.Oko aloe wakonɛ Jehowa,Oko esongo w’elondo wele l’omamu w’ashi.
7 Ashi wekɔ lo ntetemala mpongɔ oma lo kati yande 2 ya dikoho,Ndo lɔtɔngɔ* lande lambonɛma suke l’ashi w’efula.+
Nkumekanga kande+ ayoleka Anganga+ woke,Ndo diolelo diande diayonga wolo.+
8 Nzambi kayootondja oma l’Edjibito;Nde ekɔ oko nseke ya ndjate le wɔ.
Nde ayolanya wedja, atunyi ande,+Nde ayɔtɛtshatɛtsha weka awɔ ndo nde ayowatshieta la mpito yande.
9 Nde ambonyama, nde ambetama oko ntambwɛ,Oko ntambwɛ, ayosombɔ mboonyiya?
Wanɛ wakɔtshɔkɔla watshɔkwame,Wanɛ wakodja mananu wadjame mananu.”+
10 Ko Balaka akomalɛ Balama nkɛlɛ k’efula. Balaka akade lokambo la lɔsɔkɔ tshɛ ko akatɛ Balama ate: “Dimi lakakelɛ dia wɛ ndjodja atunyi ami mananu, ko wɛ hasadi ndooko dikambo,+ koko ambaatshɔkɔla mbala 3 y’etondo.
11 Kalola esadi otsha lakayɛ. Dimi lakalangaka kosha kɛnɛmɔ k’efula,+ koko Jehowa ambokodimatɔ.”
12 Balama akakadimola Balaka ate: “Onde dimi kombutɛ akɛndji wakayatome nte:
13 ‘Oyadi kaanga Balaka kombishaka luudu lande loludi tɔɔ la mfɛsa ndo la paonyi, dimi hantokoka ntamba didjango dia Jehowa la lolango lami,* oyadi dia dimɛna kana dia kɔlɔ! Kɛnɛ kayombutɛ Jehowa keto kayomokotɛ’?+
14 Wonya ɔnɛ, dimi lotatshu otsha le anto ami. Yaka takote kɛnɛ kayosalɛ anto anɛ wodja ayɛ lo nshi yayaye.”*
15 Ko nde akate ɛtɛkɛta wa yokedi ɛnɛ ate:+
“Ɛtɛkɛta wa Balama ɔna Beɔrɛ,Ɛtɛkɛta w’onto lele washo ande wakadihɔ,+
16 Ɛtɛkɛta wa ɔnɛ lakoke ɔtɛkɛta wa Nzambi,Ɔnɛ lele la ewo ka Ɔnɛ-Laheme-Tshɛ,Nde akɛnyi ɛnɛlɔ ka Kanga-Wolo-TshɛEtena kakandaholɔ la washo wambodihɔ:
17 Dimi layowɛna, koko aha wonya ɔnɛ;Dimi layowɛna, koko aha kakiye.
Yɔɔtɔ+ yayotomba oma le Jakɔbɔ,Ndo danga+ diayotomba oma le Isariyɛlɛ.+
Nde ayominola okoko wa Mɔaba*+Ndo lowako l’ana tshɛ wa lofunguso.
18 Ɛdɔmɛ wayoyala wande,+Ɛɛ, Seirɛ+ kayoyala k’atunyi ande,+Etena kayɔkɛnɛmɔlaka Isariyɛlɛ dihonga diande.
19 Oma le Jakɔbɔ kayotomba ɔnɛ latalɛndja,+Ndo nde ayolanya wanɛ tshɛ wayohanda l’elanyelo k’osomba.”
20 Lam’akandɛnyi Amalɛka, nde akatetemala la ɛtɛkɛta ande wa yokedi, ata ate:
“Amalɛka aki wodja wa ntondo l’atei wa wedja,+Koko l’ekomelo nde ayolanyema.”+
21 Lam’akandɛnyi ase Kenɛ,+ nde akatetemala la ɛtɛkɛta ande wa yokedi, ata ate:
“Edjaselo kanyu kokamɛ oko kefu kele laadiko dia dive.
22 Koko onto ɔmɔtshi ayotshumba Kaina.*
Nshi ngana yambotshikala la ntondo k’ase Asuriya nyɔtɔla lo mfumbe?”
23 Ko nde akatetemala la ɛtɛkɛta ande wa yokedi, ata ate:
“Ande mananu! Akɔna ayoshimbamɛ lam’ayosala Nzambi dui sɔ?
24 Masuwa wayoya oma la Kitimɛ,+Ko vɔ wayosoya Asuriya,+Wayosoya Ebɛrɛ.
Koko ndo nde lawɔ ayoyolanyema.”
25 Oma laasɔ, Balama+ akonɛɛ ko akakalola lo dihole diande. Balaka nde lawɔ akatshu lo mboka kande.
Nɔtɛ ka l'ɛse ka dikatshi
^ Tshɛk., “aki dimɛna lo washo wa.”
^ Kana “kanula.”
^ Tshɛk., “oma l’otema ami.”
^ Kana “lo ekomelo ka nshi.”
^ Kana “mpakatoyi y’ɔtɛ wa Mɔaba.”
^ Mbuta ate dioho di’ase Kenɛ.
