Bible—Ekadimwelo k’andja w’oyoyo (Mateo–Ɛnyɛlɔ) kakatondjama lo Angɛlɛ lo 1950, ndo Bible—Ekadimwelo k’andja w’oyoyo k’otondo kakatondjama lo 1961. Oma ko etena kɛsɔ, miliyɔ akumi y’ambadi wa lo ɛtɛkɛta ndekaka 210 wakakondja wahɔ oma lo ekadimwelo ka mɛtɛ ndo ka wɔdu mbadia ka Afundelo w’Ekila w’oma lo ɛtɛkɛta wa ntondotondo.

Kɔmite k’Okadimwelo wa Bible k’andja w’oyoyo akɛnyi ohomba wa nkamba la tɔtɛkɛta tananda etema w’ambadi wa nshi nyɛ. Diakɔ diele, takayele toho tɔmɔtshi t’ofundelo ndo atɔndɔ amɔtshi wendana la ofundelo lo ekadimwelo kɛnɛ tele la eyango wayela ɛnɛ lo yimba:

• Nkamba la tɔtɛkɛta ta nshi nyɛ ndo tokɛma. Ɛnyɛlɔ, etelo k’ɔnɛ “womoto kanga loseka” akahɛnyama la “womoto la numba.” (Etatelo 38:15) Lo ekadimwelo kɛnɛ, “monanyi” akakadimɔma ɔnɛ “awui wa mindo wa dieyanelo”; “lɔkɛwɔ la mindo” akakadimɔma ɔnɛ “lɔkɛwɔ la fumbɔ nsɔnyi”; ndo “ɛngɛnɔngɛnɔ wa kɔlɔ” akakadimɔma ɔnɛ “fɛtɛ yele l’awui wa tshambandeko.”—Ngalatiya 5:19-21.

  Lo Hɛbɛru ndo lo Grɛkɛ k’edjedja, tshɛkɛta “lɔtɔngɔ” kokaka nembetshiya lɔtɔngɔ la etombatomba kana ɔna kana kanula y’onto kana alɔmi. Lam’ele lo Ɔtɛtɛla hawoleke nkamba la tshɛkɛta “lɔtɔngɔ” etena katɛkɛtawɔ dikambo dia anto, yɔ yakahɛnyama la tshɛkɛta yatondja lokanyi lo ndjela awui watɛkɛtama laawɔ. (Etatelo 1:11; 22:17; 48:4; Mateo 22:24; Joani 8:37) Lo ahole efula, takakambe la tshɛkɛta “kanula” etena katɛkɛtawɔ dikambo dia daka dia lo Ɛdɛna diatanema lo Etatelo 3:15.

• Ditelo dia lo Bible diakalembetshiyama. Tɔtɛkɛta tɔmɔtshi tatanema lo dikadimwelo efula dia Bible dia lo Ɔtɛtɛla diakakadimɔma lo ekadimwelo kɛnɛ lo yoho yokɛma hwe. Ɛnyɛlɔ, dikadimwelo dimɔtshi kambaka la “otamba wa mpeketanya” dia nembetshiya woho wakawakɔkɔla Yeso nsɛti lo otamba w’asui, ko mbishaka kanyi yele oko nde akakelekama kana akakɔkɔma nsɛti lo kurusɛ. Koko ekadimwelo kɛnɛ kambaka la ditelo nɛ “mbodiaka l’otamba” ndo ‘mbɔkɔkɔla nsɛti l’otamba’ dia ntondja lokanyi lokɛma hwe l’ɔnɛ Yeso akavu l’otamba w’asui.—Mateo 20:19; 27:31, 35.

Ekadimwelo ka Bible kɛnɛ kekɔ la weho ɛmɔtshi wa nɔtɛ ya l’ɛse ka dikatshi. Weho wa nɔtɛ yakɔ vɔ ɛnɛ:

• “Kana” Yoho kina yakoka dui kadimɔma oma lo Hɛbɛru, oma lo Arameyɛ kana oma lo Grɛkɛ dia mbisha lokanyi laamɛ lɔtɔnɛ.—Etatelo 1:2, nɔtɛ kele lo “wolo waki Nzambi wakamba olimu”; Jashua 1:8, “la dui di’ɔkɔkɛ.”

• “Kana ondo” Yoho kina yetawɔma yakoka dui kadimɔma, koko lokanyi ntshikitana yema.—Etatelo 21:6, “ayɔlaka kaamɛ la mi”; Zɛkariya 14:21, “ose Kanana.”

• “Tshɛk.,” Okadimwelo wa tshɛkɛta lo tshɛkɛta w’oma lo Hɛbɛru, Arameyɛ kana w’oma lo Grɛkɛ kana lokanyi l’ohomba la lo etelo k’oma lo ɔtɛkɛta wa ntondo.—Etatelo 30:22, “ntshɔ diemi”; Etombelo 32:29, “nyoyakitsha laande.”

• Kitshimudi ndo elembetshielo ekina Kitshimudi ya nkombo (Etatelo 3:17, “Adama”; Etombelo 15:23, “Mara”); elembetshielo wendana la wotsho ndo tɛdikɔ (Etatelo 6:15, “kubita”); elembetshielo w’ohomba wele lo Apandisɛ ndo lo Elembetshielo wa tɔtɛkɛta.—Etatelo 37:35, “Diombo”; Mateo 5:22, “Ngɛhɛna.”

Etenyi ka l’etatelo kele l’ɔtɛ a dui ɔnɛ: “Mbɔtwɛlɔ ka Ɔtɛkɛta wa Nzambi,” kekɔ la ɛtɛ w’awui wa wetshelo w’etatelo wa lo Bible. Kam’ashila avɛsa wa lo Bible ko “Nkombo y’abuku wa lo Bible,” ko “Ɛndɛksɛ wa tɔtɛkɛta ta lo Bible,” ndo “Elembetshielo wa tɔtɛkɛta ta lo Bible.” Etenyi ka Elembetshielo kimanyiyaka ombadi dia nde nshihodia ditelo dimɔtshi diakasɔnama lo ndjela okambelo adiɔ wa shikaa lo Bible. Apandisɛ A wekɔ la awui wayela anɛ: “Atɔndɔ wendana la okadimwelo wa Bible,” “ Akambo wa laande wele lo ekadimwelo kɛnɛ,” “Woho wakakome Bible le so,” “Lokombo laki Nzambi lo Afundelo wa lo Hɛbɛru,” “Lokombo laki Nzambi lo Afundelo w’Akristo wa lo Grɛkɛ,” “Tablo: Amvutshi ndo nkumi ya dikanga ya Juda ndo ya Isariyɛlɛ,” ndo “Akambo wa weke wakasalema lo nshi yaki Yeso la nkɛtɛ.” Apandisɛ B wekɔ la kartɛ, tablo ndo awui akina wele ohomba le ambeki wa Bible wele la etete.

Lo avɛsa wa lo Bible, dibuku tshɛ diekɔ la awui wɔtɛkɛtami lo tshena pe lo tshapita tshɛ kaamɛ ndo la avɛsa wendana la wɔ ndo dui sɔ kimanyiyaka ombadi dia monga la lokanyi la lo tshena pe la kɛnɛ kɔtɛkɛtami lo dibuku di’otondo. Ɔnɔngɔ wa l’atei wa dikatshi tshɛ wekɔ la rɛferansɛ ɛmɔtshi watoma otsha lo avɛsa akina wa lo Bible wɔtɔnɛ la wɔ.